ການເຊື່ອມຈອດສາມາດສະໜອງກຳລັງແຮງໃໝ່ໃຫ້ແກ່ການຮ່ວມມືດ້ານເສດຖະກິດລະຫວ່າງຈີນ-ອາຊຽນ
ຕາມຂ່າວCRI: ວັນທີ3ກັນຍານີ້, ງານວາງສະແດງສິນຄ້າຈີນ-ອາຊຽນຄັ້ງທີ10ແລະກອງປະຊຸມສຸດຍອດການຄ້າແລະການລົງທຶນຈີນ-ອາຊຽນຄັ້ງທີ10ໄດ້ໄຂຂຶ້ນຢູ່ນະຄອນໜານນິງຂອງເຂດປົກຄອງຕົນເອງເຜົ່າຈ້ວງກວາງຊີຈີນ. ຫົວຂໍ້ຂອງກອງປະຊຸມສຸດຍອດການຄ້າແລະການລົງທຶນຄັ້ງນີ້ແມ່ນ"ຊຸກຍູ້ການເຊື່ອມຈອດ, ລົງເລິກການຮ່ວມມືລະຫວ່າງຂະແໜງການ". ການເຊື່ອມຈອດໄດ້ກາຍເປັນຈຸດເດັ່ນໃໝ່ດ້ານການຮ່ວມມືລະຫວ່າງຈີນ-ອາຊຽນ. ຜູ້ຊ່ຽວຊານຈີນແລະອາຊຽນທີ່ໃຫ້ສຳພາດຕໍ່ນັກຂ່າວເຫັນວ່າ, ການເຊື່ອມຈອດສາມາດສະໜອງກຳລັງແຮງໃໝ່ໃຫ້ແກ່ການຮ່ວມມືດ້ານເສດຖະກິດລະຫວ່າງຈີນແລະອາຊຽນ, ຊຸກຍູ້ໃຫ້ຈັດຕັ້ງປະຕິບັດສັນຍາກ່ຽວກັບເຂດການຄ້າເສລີຈີນ-ອາຊຽນທີ່ສອງຝ່າຍໄດ້ເຊັນກັນນັ້ນໄດ້ບັນລຸຢ່າງຮອບດ້ານ.
ທ່ານວິຈິດ ຊິນດາວົງ, ຜູ້ຊ່ວຍລັດຖະມົນຕີວ່າການກະຊວງແຜນການແລະການລົງທຶນລາວ, ຮອງປະທານຄະນະກຳມະການການຮ່ວມມືລາວ-ຈີນເຫັນວ່າ, ການບັນລຸການເຊື່ອມຈອດດ້ານພື້ນຖານໂຄງລ່າງ, ສາມາດຫຼຸດຄວາມຫຼຸດໂຕນກັນໃນພາກພື້ນໃຫ້ໜ້ອຍລົງ, ເຊິ່ງມີຜົນດີຕໍ່ການສ້າງສຳເລັດປະຊາຄົມອາຊຽນ.
ທ່ານວິຈິດ ຊິນດາວົງກ່າວວ່າ:
"ສອງຝ່າຍຈີນກັບອາຊຽນເພີ່ມທະວີການຮ່ວມມືກ່ຽວກັບການພັດທະນາດ້ານພື້ນຖານໂຄງລ່າງເພື່ອແນໃສ່ການເຊື່ອມຈອດລະຫວ່າງບັນດາປະເທດອາຊຽນ, ລວມທັງຖະໜົນຫົນທາງ, ຂົວ, ການຄົມມະນາຄົມ, ໂທລະຄົມ-ສື່ສານ, ມັນຈະເປັນສິ່ງອຳນວຍຄວາມສຳດວກໃຫ້ແກ່ການສົ່ງເສີມການຄ້າ, ການລົງທຶນ, ການທ່ອງທ່ຽວ, ລວມໄປເຖິງການໄປມາຫາສູ່ກັນຂອງປະຊາຊົນລະຫວ່າງບັນດາປະເທດອາຊຽນກັບຈີນ, ຈະເປັນການປະກອບສ່ວນອັນສຳຄັນເຂົ້າໃນການເຮັດໃຫ້ຄວາມຫຼຸດໂຕນກັນດ້ານການພັດທະນາລະຫວ່າງບັນດາປະເທດອາຊຽນໃຫ້ແຄບລົງ. ເຖິງວ່າດຽວນີ້ພວກເຮົາຈະມີການພັດທະນາຢູ່, ແຕ່ວ່າບໍ່ພຽງພໍ, ໃນການຊ່ວຍເຫຼືອອາຊຽນໃນດ້ານການສ້າງປະຊາຄົມເສດຖະກິດອາຊຽນໃນປີ2015. "
