ງານວາງສະແດງສິນຄ້າຈີນ-ອາຊຽນຄັ້ງທີ 10 ໄດ້ອັດລົງຢູ່ທີ່ນະຄອນໜານໜິງ ເຂດປົກຄອງຕົນເອງເຜົ່າຈ້ວງກວາງຊີ່ຈີນໃນວັນທີ 6 ກັນຍານີ້. ຫົວຂໍ້ຂອງງານວາງສະແດງສິນຄ້າໃນຄັ້ງນີ້ແມ່ນ: ການພັດທະນາການຮ່ວມມືໃນພາກພື້ນ-ກາລະໂອກາດໃໝ່, ກຳລັງຊຸກດັນໃໝ່ ແລະ ໄລຍະໃໝ່. ຜູ້ຊ່ຽວຊານຂອງຈີນແລະອາຊຽນໄດ້ໃຫ້ສຳພາດຕໍ່ນັກຂ່າວ ໂດຍເຫັນວ່າ, ພາຍໃຕ້ເງື່ອນໄຂທີ່ການຟື້ນຕົວຂອງເສດຖະກິດໂລກອ່ອນເພຍ, ຈີນແລະອາຊຽນໄດ້ລວມຕົວເປັນກຸ່ມ ແລະ ເພີ່ມທະວີການຮ່ວມມືໃນພາກພື້ນ, ຈະສາມາດຍົກສູງບົດບາດຂອງຈີນແລະອາຊຽນຂຶ້ນ.
ເມື່ອກ່າວເຖິງຫົວຂໍ້ຂອງງານສະແດງສິນຄ້າຈີນ-ອາຊຽນໃນຄັ້ງນີ້, ທ່ານຫວາງຢີ້ຈູ, ຫົວໜ້າຫ້ອງການຄົ້ນຄວ້າການຮ່ວມມືສະຖາບັນພາກພື້ນອາຊີປາຊີຟິກ ສະພາບັນດິດວິທະຍາສາດ-ສັງຄົມຈີນ ກ່າວວ່າ: ຈີນແລະອາຊຽນລ້ວນແຕ່ພວມພັດທະນາກ້າວຂຶ້ນ, ການພົວພັນຄູ່ຮ່ວມມືຍຸດທະສາດລະຫວ່າງສອງຝ່າຍຕ້ອງຍົກຂຶ້ນສູ່ລະດັບໃໝ່; ສອງຝ່າຍພວມປະເຊີນກັບບັນຫາຕ່າງໆ, ເຊັ່ນ ການຫັນປ່ຽນຮູບແບບການເຕີບໂຕເປັນຕົ້ນ, ການເພີ່ມທະວີການຮ່ວມມືລະຫວ່າງຈີນ-ອາຊຽນ ມີປະສິດທິຜົນທີ່ບົ່ມຊ້ອນຢູ່ອັນມະຫາສານ.
ທ່ານ ກີ ເຊເຣວັດ, ນັກວິຊາການສະຖາບັນການພົວພັນສາກົນຂອງສະຖາບັນຄົ້ນຄວ້າລາຊະນາວີກຳປູເຈຍ ກ່າວວ່າ: ການບັນລຸໃຫ້ ເສດຖະກິດພາກພື້ນເຊື່ອມໂຍງເຂົ້າກັນແມ່ນທ່າອ່ຽງຂອງທົ່ວໂລກ, ຈີນແລະອາຊຽນຄວນຊ່ວຍຊູຍູ້ໜູນກັນດ້ານທ່າແຮງ, ເພື່ອບັນລຸການພັດທະນາຮ່ວມກັນ.
ທ່ານ ນາງສົງລີອິ່ງ, ຜູ້ຊ່ຽວຊານກ່ຽວກັບມຽນມາ ສະຖາບັນຄົ້ນຄວ້າອາຊີຕາເວັນອອກສຽງໃຕ້ ສະພາບັນດິດວິທະຍາສາດ-ສັງຄົມແຂວງຢຸນນານຈີນ ກ່າວວ່າ: ການເຊື່ອມຈອດລະຫວ່າງບັນດາປະເທດອາຊຽນ ແລະ ການເຊື່ອມຈອດລະຫວ່າງຈີນ-ອາຊຽນ ຈະເສີມຂະຫຍາຍບົດບາດອັນສຳຄັນໃນການຊຸກຍູ້ການເຊື່ອມໂຍງເສດຖະກິດພາກພື້ນ ແລະ ການຮ່ວມມືໃນພາກພື້ນ ກໍຄື ການຮ່ວມມືໃນອະນຸພາກພື້ນ.
RCEP ແມ່ນກົນໄກການຮ່ວມມືການເຊື່ອມໂຍງດ້ານເສດຖະກິດຂອງພາກພື້ນອາຊີຕາເວັນອອກ ເຊິ່ງແມ່ນອາຊຽນເປັນແກນນຳ. ໃນເວລາກ່າວຄຳປາໄສໃນພິທີໄຂງານວາງສະແດງສິນຄ້າຈີນ-ອາຊຽນຄັ້ງທີ 10 ໃນວັນທີ 3 ກັນຍານີ້, ທ່ານເລເລື່ອງມິງ, ເລຂາທິການໃຫຍ່ອາຊຽນ ກ່າວວ່າ: ອາຊຽນແລະຈີນຄວນຕັ້ງໜ້າເຂົ້າຮ່ວມຂະບວນການເຈລະຈາເພື່ອສະແຫວງ ຫາການບັນລຸການເຊັນສັນຍາການຮ່ວມມືດ້ານເສດຖະກິດທີ່ຮອບດ້ານ, ມີຄຸນນະພາບສູງ ແລະ ຕ່າງຝ່າຍຕ່າງມີຜົນປະໂຫຍດ ພາຍໃຕ້ຂອບ RCEP, ນີ້ຈະສາມາດອຳນວຍໂອກາດຢ່າງຫຼວງຫຼາຍໃຫ້ແກ່ເຂດການຄ້າເສລີຈີນ-ອາຊຽນ.
ທ່ານ ນູເຊີວັນ ໃຈນັນ ອາບີດິນ, ເຈົ້າໜ້າທີ່ອາວຸໂສທີ່ຮັບຜິດຊອບວຽກງານອາຊຽນຂອງມະເລເຊຍ ກ່າວວ່າ: ການເນັ້ນໜັກການພັດ ທະນາການຮ່ວມມືໃນພາກພື້ນມີຄວາມໝາຍໃນຕົວຈິງ, ທ່ານເຫັນວ່າ, ຈີນສະໜັບສະໜູນອາຊຽນເສີມຂະຫຍາຍບົດບາດເປັນແກນນຳໃນການຮ່ວມມືອາຊີຕາເວັນອອກ, ຈີນກໍຈະເສີມຂະຫຍາຍບົດບາດອັນສຳຄັນໃນການພັດທະນາການຮ່ວມມືໃນພາກພື້ນເຊັ່ນກັນ.
© China Radio International.CRI. All Rights Reserved. 16A Shijingshan Road, Beijing, China. 100040 |