ທ່ານສີຈິ້ນຜິງຖະແຫລງຕໍ່ທ່ານຊິນໂຈ ອາເບະກ່ຽວກັບຫລັກໝັ້ນຫລັກການຂອງຈີນຕໍ່ການພົວພັນລະຫວ່າງຈີນກັບຍີ່ປຸ່ນ
ວັນທີ5ກັນຍານີ້,ກອງປະຊຸມສຸດຍອດຜູ້ນໍາຈີ20ຄັ້ງທີ8ໄດ້ຈັດຂຶ້ນທີ່ເມືອງເຊັນປີເຕີສະເບີກຂອງລັດເຊຍ.ກ່ອນຈະເປີດກອງປະຊຸມ,ທ່ານສີຈິ້ນຜິງ,ປະທານປະເທດຈີນກັບທ່ານຊິນໂຈ ອາເບະ,ນາຍົກລັດຖະມົນຕີຍີ່ປຸ່ນໄດ້ພົບກັນຢູ່ຫ້ອງວິໄອພີທີ່ມີຜູ້ນໍາປະເທດຕ່າງໆລໍຖ້າຢູ່.ສອງຝ່າຍໄດ້ໂອ້ລົມກັນເປັນເວລາສັ້ນ.
ທ່ານສີຈິ້ນຜິງໄດ້ຖະແຫລງຫລັກໝັ້ນຫລັກການຂອງຈີນໂດຍຊີ້ອອກວ່າເມື່ອມໍ່ໆນີ້,ການພົວພັນລະຫວ່າງຈີນກັບຍີ່ປຸ່ນກໍາລັງປະສົບກັບຄວາມຫຍຸ້ງຍາກອັນໜັກໜ່ວງ,ນີ້ແມ່ນສິ່ງທີ່ພວກຂ້າພະເຈົ້າບໍ່ຢາກເຫັນ.ຈີນຍິນດີສືບຕໍ່ຊຸກຍູ້ການພົວພັນຍຸດທະສາດແບບຕ່າງຝ່າຍຕ່າງມີຜົນປະໂຫຍດລະຫວ່າງຈີນກັບຍີ່ປຸ່ນບົນພື້ນຖານເອກະສານທາງການເມືອງ4ສະບັບທີ່ຈີນແລະຍີ່ປຸ່ນໄດ້ລົງນາມຮ່ວມກັນ.
ທ່ານສີຈິ້ນຜິງກ່າວເນັ້ນວ່າ,ຍີ່ປຸ່ນຄວນແກ້ໄຂບັນຫາຕ່າງໆທີ່ອ່ອນໄຫວໃຫ້ຖືກຕ້ອງເຊັ່ນບັນຫາເກາະຕ້ຽວຢູ,ບັນຫາປະຫວັດສາດແລະອື່ນໆແລະສະແຫວງຫາວິທີຄວບຄຸມຄວາມຂັດແຍ່ງແລະແກ້ໄຂບັນຫາຢ່າງເໝາະສົມດ້ວຍຈິດໃຈທີ່ກ້າປະເຊີນໜ້າກັບປະຫວັດສາດແລະປິ່ນໜ້າໄປສູ່ອະນາຄົດ.
ທ່ານຊິນໂຈ ອາເບະໄດ້ກ່າວວ່າ,ຫວັງຢ່າງຍິ່ງທີ່ຈະໄດ້ພົບກັບທ່ານສີຈິ້ນຜິງຢູ່ທີ່ນີ້ແລະຂ້າພະເຈົ້າຫວັງຢ່າງຍິ່ງທີ່ຈະປັບປຸງການພົວພັນລະຫວ່າງຍີ່ປຸ່ນກັບຈີນໃຫ້ດີຂຶ້ນ.
