ທ່ານສີຈິ້ນຜິງພົບປະກັບທ່ານບາຣັກໂອບາມາ
(GMT+08:00) 2013-09-07 13:49:26 cri
ຕາມຂ່າວ CRI: ວັນທີ 6 ກັນຍານີ້, ຢູ່ທີ່ແຊງບີເຕີສບວກຂອງຣັດຊເຍ, ທ່ານສີຈິ້ນຜິງ, ປະທານປະເທດຈີນໄດ້ພົບປະກັບທ່ານບາຣັກໂອບາມາ, ປະທານາທິບໍດີອາເມລິກາ.
ໃນການພົບປະທີ່ເປັນເວລາ 2 ຊົ່ວໂມງ, ສອງຝ່າຍໄດ້ລົງເລິກແລກປ່ຽນຄວາມເຫັນກ່ຽວກັບບັນຫາຕ່າງໆຢ່າງກວ້າງຂວາງເຊັ່ນ ບັນຫາການພົວພັນລະຫວ່າງສອງຝ່າຍ, ວຽງານອາຊີປາຊິກຟິກ, ສະຖານະການແຫລມເກົາຫລີ, ບັນຫາຊີຣີແລະບັນຫາອື່ນໆ.
ສອງຝ່າຍເຫັນດີຊອກຄົ້ນຈຸດຮ່ວມມືໃຫ້ຫລາຍໃນການພົວພັນລະຫວ່າງສອງຝ່າຍ, ແລະກ່າວວ່າຈະເພີ່ມທະວີການແລກປ່ຽນແລະປະສານງານກັນໃນວຽກງານສາກົນກໍ່ຄືວຽກງານພາກພື້ນ. ກ່ຽວກັບວຽກງານອາຊີປາຊີຟິກ, ທ່ານສີຈິ້ນຜິງຊີ້ອອກວ່າ, ປັດຈຸບັນ, ພາກພື້ນອາຊີປາຊິກຟິກພວມປະເຊີນກັບໂອກາດທີ່ສຳຄັນທີ່ຈະມີການພັດທະນາຕື່ມອີກ, ແລະກໍ່ມີບັນຫາຕ່າງໆເຊັ່ນສິດແລະຜົນປະໂຫຍດດ້ານທະເລ,ແລະຄວາມຂັດແຍ່ງກັນກ່ຽວກັບເກາະດອນ. ຫວັງວ່າອາເມລິກາມີທ່າທີນອກຕົວແລະຍຸດຕິທຳເພື່ອຊຸກຍູ້ໃຫ້ປະເທດທີ່ກ່ຽວຂ້ອງມີການກະທຳຕົວຈິງ, ແລະເສີມຂະຫຍາຍບົດບາດອັນຕັ້ງຫນ້າໃນການປົກປັກຮັກສາສັນຕິພາບ, ສະຖຽນລະພາບແລະຄວາມຈະເລີນຮຸ່ງເຮືອງຂອງພາກພື້ນອາຊີປາຊິກຟິກ.
ທ່ານບາຣັກ ໂອບາມາກ່າວວ່າ, ຝ່າຍອາເມລິກາຫວັງວ່າອາເມລິກາກັບຈີນສ້າງການພົວພັນຫມູ່ຮອບດ້ານໃນວຽກງານອາຊີປາຊິກຟິກ, ຫວັງວ່າຝ່າຍທີ່ກ່ຽວຂ້ອງກັບບັນຫາຕ່າງໆນັ້ນຈົ່ງປຶກສາຫາລືກັນເພື່ອແກ້ໄຂຄວາມຂັດແຍ່ງກັນດ້ວຍວິທີການທູດ, ແລະຍິນດີເສີມຂະຫຍາຍບົດບາດອັນຕັ້ງຫນ້າໃນການແກ້ໄຂບັນຫາເຫລົ່ານີ້.
ກ່ຽວກັບບັນຫາຊີຣີ, ທ່ານສີຈິ້ນຜິງກ່າວເນັ້ນວ່າ, ການແກ້ໄຂໂດຍທາງການເມືອງແມ່ນທາງອອກພຽງເສັ້ນດຽວທີ່ຖືກຕ້ອງ. ທ່ານໂອບາມາກ່າວວ່າຍິນດີຮັກສາການແລກປ່ຽນກັນກັບຝ່າຍຈີນກ່ຽວກັບບັນຫານີ້.
