ທ່ານສີຈິ້ນຜິງພົບປະເຈລະຈາກັບທ່ານນາຈາບາເຢຟ
(GMT+08:00) 2013-09-08 13:51:55 cri
ວັນທີ 7 ກັນຍານີ້, ຢູ່ທີ່ນະຄອນຫລວງອັສຕານາ,ທ່ານສີຈິ້ນຜິງ ປະທານປະເທດຈີນໄດ້ພົບປະເຈລະຈາກັບທ່ານນາຈາບາເຢຟ, ປະທານາທິບໍດີກາຊັກສະຖານ.ປະມຸກລັດສອງປະເທດໄດ້ສະຫລຸບການຂະຫຍາຍຕົວຂອງການພົວພັນລະຫວ່າງຈີນກັບກາຊັກສະຖານ, ໄດ້ວາງແຜນໃຫ້ການຮ່ວມມືໃນອະນາຄົດຢ່າງຮອບດ້ານ, ແລະໄດ້ມີເຫັນເປັນເອກະພາບກັນທີ່ສຳຄັນແລະກວ້າງຂວາງກ່ຽວກັບການລົງເລິກການພົວພັນຫມູ່ຄູ່ຍຸດທະສາດຮອບດ້ານຈີນກາຊັກສະຖານ.
ທ່ານສີຈິ້ນຜິງກ່າວວ່າ, ການພົວພັນຫມູ່ຄູ່ຍຸດທະສາດຮອບດ້ານລະຫວ່າງຈີນກັບກາຊັກສະຖານແມ່ນແບບຢ່າງຂອງໄມຕີຈິດມິດຕະພາບຖານປະເທດໃກ້ຄຽງ ແລະການຮ່ວມມືທີ່ຕ່າງຝ່າຍຕ່າງມີຜົນປະໂຫຍດ.ການຂະຫຍາຍມິດຕະພາບແລະການຮ໋ວມມືກັບກາຊັກສະຖານແມ່ນວຽກງານບູລິມະສິດຂອງການຕ່າງປະເທດຈີນ. ຈີນຍິນດີຮ່ວມມືກັບກາຊັກສະຖານພະຍາຍາມຊຸກຍູ້ການພົວພັນລະຫວ່າງສອງປະເທດກ້າວໄປສູ່ເປົ້າຫມາຍທີ່ມີລະດັບສູງກວ່າເກົ່າ, ແລະໄດ້ຮັບຫມາກຜົນອັນອຸດົມສົມບູນ,ເພື່ອຮັບໃຊ້ວຽກງານພັດທະນາແລະສ້າຄວາມຈະເລີນຮຸ່ງເຮືອງຂອງສອງປະເທດໃຫ້ດີກວ່າເກົ່າ, ແລະປະກອບສ່ວນຫລາຍກວ່າເກົ່າເຂົ້າໃນສັນຕິພາບແລະຄວາມຈະເລີນຮຸ່ງເຮືອງຂອງພາກພື້ນແຫ່ງນີ້.
ປະມຸກລັດສອງປະເທດເຫັນວ່າ, ໃນບັນຫາທີ່ກ່ຽວພັນເຖິງຜົນປະໂຫຍດໃຈກາງແລະບັນຫາທີ່ຝ່າຍກົງກັນຂ້າມໃຫ້ຄວາມສົນໃຈຢ່າງສູງນັ້ນ, ຕ້ອງຍຶດຫມັ້ນໃຫ້ການສະຫນັບສະຫນູນເຊິ່ງກັນແລະກັນ,ນີ້ແມ່ນທາດແທ້ຂອງການພົວພັນຫມູ່ຄູ່ຍຸດທະສາດຮອບດ້ານລະຫວ່າງຈີນກັບກາຊັກສະຖານ.ສອງຝ່າຍຈະສືບຕໍ່ຮັກສາການແລກປ່ຽນແລະປະສານງານກັນຢ່າງແຫນ້ນແຟ້ນໃນບັນຫາສຳຄັນຕ່າງໆ.
ປະມຸກລັດສອງປະເທດກ່າວເນັ້ນວ່າ, ສອງປະເທດແມ່ນຄູ່ຮ່ວມມືດ້ານພະລັງງານທີ່ເປັນເວລາຍາວນານ, ຫມັ້ນທ່ຽງແລະໄວ້ເນື້ອເຊື່ອໃຈໄດ້.ສອງຝ່າຍຕ້ອງພົວພັນກັບຍຸດທະສາດພັດທະນາຂອງຕົນເອງ, ປັບປຸງອົງປະກອບການຄ້າລະຫວ່າງສອງຝ່າຍ, ແລະຊຸກຍູ້ໃຫ້ການຄ້າມີຫລາຍຮູບຫລາຍແບບ.
ປະມຸກລັດສອງປະເທດຍັງໄດ້ແລກປ່ຽນຄວາມເຫັນກ່ຽວກັບບັນຫາສຳຄັນໃນສາກົນແລະພາກພື້ນ.
ຫລັງຈາກໄດ້ພົບປະເຈລະຈາກັນແລ້ວ, ປະມຸກລັດທັງສອງທ່ານໄດ້ລົງນາມໃນຖະແຫລງການຮ່ວມລະຫວ່າງຈີນກາຊັກສະຖານກ່ຽວກັບການລົງເລິກການພົວພັນຫມູ່ຄູ່ຍຸດທະສາດຮອບດ້ານຕື່ມອີກ.
