ທ່ານຫລີເຄີ້ສຽງພົບປະກັບຜູ້ຕາງໜ້ານັກທຸລະກິດທັງພາຍໃນແລະຕ່າງປະເທດທີ່ເຂົ້າຮ່ວມເວທີປຶກສາຫາລືດາວໍສລະດູຮ້ອນ
ຕອນບ່າຍວັນທີ10ກັນຍານີ້,ທ່ານຫລີເຄີ້ສຽງ,ນາຍົກລັດຖະມົນຕີຈີນ ໄດ້ພົບປະກັບຜູ້ຕາງໜ້ານັກທຸລະກິດທັງພາຍໃນແລະຕ່າງປະເທດທີ່ເຂົ້າຮ່ວມເວທີປຶກສາຫາລືດາວໍສລະດູຮ້ອນຄັ້ງທີ7ທີ່ເມືອງຕ້າຫລຽນຂອງຈີນ.
ຕົວແທນນັກທຸລະກິດແລະບໍລິສັດທີ່ມີສື່ສຽງທົ່ວໂລກ200ກວ່າທ່ານໄດ້ພົບປະຢ່າງໃກ້ຊິດກັບນາຍົກລັດຖະມົນຕີຈີນ.ທ່ານຄຼາວສຼ ສະວາດ,ປະທານເວທີປຶກສາຫາລືເສດຖະກິດໂລກເປັນປະທານກອງປະຊຸມສົນທະນາຄັ້ງນີ້.
ໃນການສົນທະນາແລະການແລກປ່ຽນກັບຜູ້ຕາງໜ້ານັກທຸລະກິດທັງພາຍໃນແລະຕ່າງປະເທດ,ທ່ານຫລີເຄີ້ສຽງໄດ້ແຈ້ງໃຫ້ຊາບເຖິງສະພາບຫລ້າສຸດຂອງເສດຖະກິດຈີນ.ທ່ານກ່າວວ່າ,ຈີນມີຄວາມສາມາດແລະມີເງື່ອນໄຂເພື່ອຮັກສາໃຫ້ເສດຖະກິດຈີນມີການຂະຫຍາຍຕົວທີ່ຍືນຍົງແລະປອດໃສໃນໄລຍະຍາວນານ.ການປະກອບອາຊີບເປັນສິ່ງທີ່ຕິດພັນກັບຊີວິດການເປັນຢູ່ຂອງປະຊາຊົນທີ່ສຸດ,ລັດຖະບານຈີນຢຶດໝັ້ນນະໂຍບາຍການປະກອບອາຊີບທີ່ຕັ້ງໜ້າເປັນເວລາຍາວນານ.ພ້ອມກັນນັ້ນ,ລັດຖະບານຈີນຈະສືບຕໍ່ຊຸກຍູ້ການປະຕິຮູບດ້ວຍຄວາມຕັດສິນໃຈທີ່ເດັດດ່ຽວ,ເຮັດໃຫ້ຕະຫລາດສາມາດເສີມຂະຫຍາຍບົດບາດຂອງຕົນໄດ້,ເຊິ່ງເປັນການຊຸກຍູ້ໃຫ້ມີຄວາມຊີວິດຊີວາກວ່າເກົ່າເພື່ອໃຫ້ປະຊາຊົນໄດ້ຮັບຜົນຈາກການປະຕິຮູບ.
ທ່ານສະວາດກ່າວວ່າ,ທ່ານຫລີເຄີ້ສຽງໄດ້ແລກປ່ຽນກັບນັກທຸລະກິດຢ່າງເປີດອົກເປີດໃຈໄດ້ເຮັດໃຫ້ພວກຂ້າພະເຈົ້າມີຄວາມຮັບຮູ້ກ່ຽວກັບສະພາບແລະນະໂຍບາຍຂອງເສດຖະກິດຈີນຢ່າງຮອບດ້ານ,ເລິກເຊິ່ງແລະຖືກຕ້ອງກວ່າເກົ່າແລະມີຄວາມໝັ້ນໃຈຕໍ່ອະນາຄົດຂອງເສດຖະກິດຈີນຫລາຍກວ່າເກົ່າ.ຂ້າພະເຈົ້າເຊື່ອໝັ້ນວ່າຈີນຈະເສີມຂະຫຍາຍບົດບາດອັນເໝາະສົມຂອງຕົນໃນການຟື້ນຕົວຂອງເສດຖະກິດໂລກ.
