ສະຫະພັນແມ່ຍິງລາວ-ຈີນ ຮັດແໜ້ນການຮ່ວມມືສອງຝ່າຍ
ວັນທີ 11 ກັນຍານີ້, ທ່ານນາງ ສີໃສ ລືເດດມູນສອນ, ປະທານສະຫະພັນແມ່ຍິງລາວ ໄດ້ຕ້ອນຮັບການເຂົ້າຢ້ຽມຢາມຂອງ ທ່ານ ນາງ ເຜີງຫົງ ພັນລະຍາຂອງທ່ານເອກອັກຄະລັດຖະທູດຈີນ ພ້ອມດ້ວຍບັນດາພັນລະຍາເຈົ້າໜ້າທີ່ການທູດທ່ານອື່ນໆຂອງຈີນປະຈຳລາວ ຢູ່ສູນຝຶກອົບຮົມແມ່ຍິງລາວ ບ້ານໂພນທັນເມືອງໄຊເຊດຖານະຄອນຫຼວງວຽງຈັນ.
ທ່ານ ນາງ ສີໃສ ລືເດດມູນສອນ ໄດ້ສະແດງຄວາມຍ້ອງຍໍຊົມເຊີຍຕໍ່ພັນລະຍາທ່ານທູດ ຈີນ ພ້ອມດ້ວຍຄະນະ ທີ່ໄດ້ເຫັນຄວາມສຳຄັນ ຂອງແມ່ຍິງລາວທົ່ວປະເທດ. ການຢ້ຽມຢາມໃນຄັ້ງນີ້ເຖິງເປັນເວລາອັນສັ້ນ ແຕ່ກໍ່ມີຄວາມໝາຍສຳຄັນຍິ່ງ ໃນການພົວພັນແລກປ່ຽນບົດ ຮຽນເຊິ່ງກັນ ແລະ ກັນ ລະຫວ່າງສອງປະເທດ ພວກຂ້າພະເຈົ້າຍິນດີຮ່ວມມືໃນຂັ້ນຕໍ່ໄປ ເພື່ອເປັນ ການຮັດແໜ້ນສາຍພົວພັນສອງຊາດ ລາວ-ຈີນ ໂດຍສະເພາະລະຫວ່າງສະຫະພັນແມ່ຍິງລາວ-ຈີນ ໃຫ້ນັບມື້ດີຂື້ນເທື່ອລະກ້າວ.
ໃນໂອກາດນີ້, ທ່ານ ນາງ ເຜີງຫົງ ໄດ້ກ່າວສະແດງຄວາມຂອບອົບຂອບໃຈຢ່າງຍິ່ງຕໍ່ສະຫະພັນແມ່ຍິງລາວທີ່ໃຫ້ການຕ້ອນຮັບອັນອົບອຸ່ນ ທ່ານກ່າວວ່າ: ການຢ້ຽມຢາມຄັ້ງນີ້ ເປັນ ການຮ່ວມເພື່ອເປັນຕົວແທນຂອງແມ່ຍິງຈີນ ມາປະຕິບັດໜ້າທີ່ເປັນຂົວຕໍ່ລະຫວ່າງສອງປະເທດ ແລະ ຍິນດີທີ່ຈະເສີມສ້າງສາຍພົວພັນລະຫວ່າງສອງປະເທດໃຫ້ດີຂື້ນ.
ຈາກນັ້ນ, ທ່ານ ນາງ ເຜີງຫົງ ພ້ອມດ້ວຍຄະນະ ໄດ້ຢ້ຽມຊົມສູນຝືກສີມືແຮງງານຕັດ ຫຍິບ, ປຸງແຕ່ງອາຫານ ແລະ ເສີມຄວາມງາມ ຂອງບັນດາເອື້ອຍນ້ອງແມ່ຍິງລາວພາຍໃນສູນດັ່ງກ່າວ ແລະ ໄປຢ້ຽມຊົມຫັດຖະກຳຕໍ່າສິ້ນໄໝຂອງບັນດາເອື້ອຍນ້ອງແມ່ຍິງລາວຢູ່ບ້ານນາ ສ້າງເຫຼັກ, ເມືອງສີໂຄດຕະບອງ ນະຄອນຫຼວງວຽງຈັນ ອີກດ້ວຍ.
