38 ປະເທດທີ່ກຳລັງພັດທະນາສົ່ງເຈົ້າໜ້າທີ່ມາຈີນເພື່ອສະແຫວງຫາການຮ່ວມມືດ້ານກະສິກຳ
ວັນທີ 12 ກັນຍານີ້, ມີເຈົ້າໜ້າທີ່ດ້ານກະສິກຳ 100 ກວ່າທ່ານຈາກ 38 ປະເທດທີ່ກຳລັງພັດທະນາໄດ້ເດີນທາງມາຮອດນະຄອນສາງຊ່າ ເທດສະ ບານແຂວງຫູໜານຈີນ ເພື່ອເຂົ້າຮ່ວມກອງປະຊຸມການຮ່ວມມືສາກົນສະຫະພັນຂະແໜງກະສິກຳຫູໜານ, ໂດຍຫວັງວ່າຈະສາມາດຊຸກຍູ້ການຮ່ວມມືດ້ານກະສິກຳກັບຈີນຢ່າງຮອບດ້ານ ໂດຍຜ່ານການແລກປ່ຽນຂໍ້ມູນຂ່າວສານ, ການສຶກສາຄົ້ນຄວ້າຮ່ວມກັນ ແລະແລກປ່ຽນດ້ານເຕັກໂນໂລຊີເຊິ່ງກັນແລະກັນ.
ທ່ານໂຮເຊ ປາເຊໂຄ, ລັດຖະມົນຕີວ່າການກະຊວງກະສິກຳໂມຊຳບິກ ກ່າວວ່າ, ຫວັງວ່າຈະສາມາດເພີ່ມທະວີການຮ່ວມມືກັບຈີນໃນຂົງເຂດຜະລິດຕະພັນກະສິກຳ ເປັນຕົ້ນແມ່ນໝາກຖົ່ວເຫຼືອງແລະກ້ວຍເປັນຕົ້ນ, ແລະດຳເນີນການຮ່ວມມືໃນການຄົ້ນຄວ້າເຕັກໂນໂລຊີດ້ານເຂົ້າພັນປະສົມ. ເຈົ້າໜ້າທີ່ກະຊວງອຸດສາຫະກຳການຄ້າລີເບຣີ ກ່າວວ່າ: ຫວັງວ່າຈະໄດ້ຮັບການຊ່ວຍເຫຼືອຈາກຈີນດ້ານເຕັກໂນໂລຊີກະສິກຳທີ່ກ້າວໜ້າເພື່ອເພີ່ມພູນຜະລິດຜົນດ້ານກະສິກຳແລະຍົກລະດັບລາຍຮັບຂອງຊາວກະສິກອນໃຫ້ສູງຂຶ້ນ.
ຕາມຕົວເລກຂໍ້ມູນສະຖິຕິຂອງກະຊວງການຄ້າຈີນ, ນັບມາຮອດປັດຈຸບັນ, ຈີນໄດ້ສົ່ງຜູ້ຊ່ຽວຊານດ້ານກະສິກຳແລະນັກວິຊາການດ້ານເຕັກໂນໂລຊີເກືອບພັນຄົນໄປປະເທດທີ່ກຳລັງພັດທະນາຂອງອາຊີ, ອາຟຣິກາ ແລະ ອາເມລິກາລາຕິນ, ໄດ້ສ້າງສູນອົບຮົມດ້ານເຕັກໂນໂລຊີກະສິກຳຫຼາຍແຫ່ງ, ນັບລວມແລ້ວ ໄດ້ອົບຮົມວິຊາການດ້ານກະສິກຳຈຳນວນເກືອບ 1 ໝື່ນ 6000 ຄົນໃຫ້ແກ່ປະເທດທີ່ກຳລັງພັດທະ ນາ.
