ການຄ້າຂ້າມແດນໂດຍຜ່ານທາງເອເລັກໂຕຣນິກຂອງຈີນໃນປີນີ້ຈະເພີ່ມຂຶ້ນ 30%
ວັນທີ 12 ກັນຍານີ້ ຢູ່ທີ່ນະຄອນຫຼວງປັກກິ່ງ, ທ່ານຈ່າງຕ້າໝິງ, ຮອງຫົວໜ້າສູນການຄ້າເອເລັກໂຕຣນິກສາກົນຈີນ ກ່າວວ່າ: ໃນຊຸມປີຜ່ານມານີ້, ການຄ້າຂ້າມແດນໂດຍຜ່ານທາງເອເລັກໂຕຣນິກຂອງຈີນ ໄດ້ມີການພັດທະນາຢ່າງວ່ອງໄວ, ເຊິ່ງມູນຄ່າການຄ້າປີ 2012 ໄດ້ບັນລຸເຖິງ 15 ຕື້ໂດລາສະຫະລັດ, ສະເພາະໃນປີນີ້, ການຄ້າຂ້າມແດນໂດຍຜ່ານທາງເອເລັກໂຕຣນິກຂອງຈີນຈະສືບຕໍ່ຂະຫຍາຍຕົວກວ້າງອອກ, ເຊິ່ງຄາດວ່າຈະເພີ່ມຂຶ້ນຢູ່ລະຫວ່າງ 30% ເມື່ອທຽບກັບປີຜ່ານມາ.ທ່ານຈ່າງຕ້າໝິງ ກ່າວຕື່ມວ່າ: ການຄ້າທາງເອເລັກໂຕຣນິກ ປະສົມປະສານກັນກັບການຄ້າສາກົນ, ພວມກາຍເປັນພະລັງຊຸກຍູ້ໃໝ່ແຫ່ງການພັດທະນາການຄ້າສາກົນ.
ການພັດທະນາການຄ້າທາງເອເລັກໂຕຣນິກ ຕ້ອງມີສະພາບແວດລ້ອມດ້ານການບໍລິການທີ່ດີເພື່ອອຳນວຍຄວາມສະດວກແກ່ການຄ້າ. ທ່ານຈ່າງຕ້າໝິງ ໄດ້ສະເໜີວ່າ: ໃນການຊຸກຍູ້ຂະບວນການພັດທະນາການຄ້າຂ້າມແດນໂດຍຜ່ານທາງເອເລັກໂຕຣນິກໃນອະນາຄົດ, ຕ້ອງປັບປຸງນະໂຍບາຍແລະກົດລະບຽບທີ່ກ່ຽວຂ້ອງໃຫ້ສົມບູນ ເພື່ອສ້າງສະພາບແວດລ້ອມການຄ້າທີ່ໜ້າເຊື່ອຖືໄດ້; ເພີ່ມທະວີກົນໄກການຮ່ວມມືລະຫວ່າງພາກສ່ວນລັດຖະບານ, ຮັບປະກັນໃຫ້ນະໂຍບາຍ, ກົດລະບຽບ ແລະ ມາດຕະຖານທີ່ກ່ຽວຂ້ອງດ້ານການຄ້າທາງເອເລັກໂຕຣນິກ ເປັນເອກະພາບກັນແລະດຳເນີນໄປຢ່າງຕໍ່ເນື່ອງ; ລັດຖະບານຄວນສ້າງກົນໄກແລກປ່ຽນເປັນປົກກະຕິກັບວິສາຫະກິດທີ່ກ່ຽວຂ້ອງ, ຮັບຟັງຄວາມຄິດຄວາມເຫັນຈາກວິສາຫະກິດຢ່າງກວ້າງຂວາງ.
