ຮອງຫົວໜ້າກອງເສນາທິການກອງທັບປົດປ່ອຍປະຊາຊົນຈີນກ່າວວ່າ ຫວັງວ່າອາເມລິກາຈະບໍ່ສົ່ງສັນຍານອັນຜິດພາດໃນບັນຫາເກາະຕ້ຽວອີແລະທະເລຈີນໃຕ້
ວັນທີ 13 ກັນຍານີ້, ຢູ່ໃນເວັບໄຊຂອງກະຊວງປ້ອງກັນປະເທດຈີນ ໄດ້ເປີດເຜີຍລາຍລະອຽດກ່ຽວກັບການປຶກສາຫາລືດ້ານການປ້ອງກັນລະຫວ່າງກະຊວງປ້ອງກັນປະເທດຈີນ-ອາເມລິກາຄັ້ງທີ 14 ທີ່ໄດ້ຈັດຂຶ້ນໃນຫວ່າງບໍ່ດົນມານີ້.
ພົນໂທວາງກ້ວນຈົ່ງ, ຮອງຫົວໜ້າກອງເສນາທິການກອງທັບປົດປ່ອຍປະຊາຊົນຈີນ ກ່າວວ່າ: ກອງທັບຈີນຈະປົກປັກຮັກສາຄວາມປອດໄພດ້ານອະທິປະໄຕແຫ່ງຊາດ, ຜືນແຜ່ນດິນອັນຄົບຖ້ວນ ພ້ອມທັງສິດແລະຜົນປະໂຫຍດທາງທະເລຂອງຈີນຢ່າງເດັດດ່ຽວແລະສະເໝີຕົ້ນສະເໝີປາຍ. ໃນການແກ້ໄຂບັນຫາ, ຈີນໄດ້ວາງນະໂຍບາຍແລະມາດຕະການທີ່ກ່ຽວຂ້ອງ ໂດຍໃຊ້ທ່າທີອົດທົນ ແລະ ຖືສຳຄັນໃນການປົກປັກຮັກສາສັນຕິພາບແລະສະຖຽນລະພາບຂອງພາກພື້ນໂດຍຕະຫຼອດ. ອາເມລິກາຄວນຮັກສາຈຸດຢືນແລະນະໂຍບາຍທີ່ສະເໝີຕົ້ນສະເໝີປາຍ, ບໍ່ຄວນສົ່ງສັນຍານອັນຜິດພາດຕໍ່ພາຍນອກ, ສະໜັບສະໜູນແລະຍຸຍົງໃຫ້ປະເທດທີ່ກ່ຽວຂ້ອງເຮັດຕາມລຳພັງໃຈ. ຫວັງວ່າອາເມລິກາຈະພິຈາລະນາເຖິງພາກສ່ວນໃຫຍ່ຂອງການພົວພັນລະຫວ່າງຈີນ-ອາເມລິກາ, ແກ້ໄຂບັນຫາຢ່າງເໝາະສົມ, ຫຼີກເວັ້ນບໍ່ໃຫ້ມີການກະທົບກະເທືອນເຖິງຄວາມໄວ້ເນື້ອເຊື່ອໃຈກັນດ້ານຍຸດທະສາດລະຫວ່າງສອງປະເທດ.
ຝ່າຍອາເມລິກາໄດ້ກ່າວຢ້ຳເຖິງນະໂຍບາຍແລະຈຸດຢືນຂອງອາເມລິກາໃນບັນຫາກ່ຽວກັບອະທິປະໄຕເໜືອດິນແດນທີ່ມີຄວາມຂັດແຍ້ງກັນ, ໂດຍຮຽກຮ້ອງໃຫ້ຝ່າຍຕ່າງໆຈົ່ງໃຊ້ທ່າທີອົດທົນ, ສະໜັບສະໜູນຈີນແກ້ໄຂຄວາມຂັດແຍ້ງດ້ານດິນແດນໂດຍຜ່ານຊ່ອງທາງການຕ່າງປະເທດ.
