ຈີນຕັ້ງໜ້າຄົ້ນຄວ້າເພື່ອຊຸກຍູ້ຍຸດທະສາດການພັດທະນາຕົວເມືອງແບບກາກບອນຕ່ຳ
ເວທີປຶກສາຫາລືຕົວເມືອງຊີວະພາບສາກົນແຄມທະເລນະຄອນທຽນສິນຈີນຄັ້ງທີ 4 ໄດ້ໄຂຂຶ້ນໃນວັນທີ 15 ກັນຍານີ້, ທ່ານຊຸນເຈິ່ນ, ຮອງຫົວໜ້າກົມຮັບມືການປ່ຽນແປງຂອງດິນຟ້າອາກາດ ຄະນະກຳມະການກາພັດທະນາແລະການປະຕິຮູບແຫ່ງລັດຈີນ ກ່າວວ່າ: ຈີນພວມພະຍາຍາມສ້າງຕະຫຼາດກາກບອນລັກສະນະທົ່ວປະເທດ ໂດຍອີງໃສ່ນິຕິບັນຍັດກ່ຽວກັບການປ່ຽນແປງຂອງດິນຟ້າອາກາດ, ເພື່ອຊຸກຍູ້ໃຫ້ກາຍເປັນລະບຽບການຄຸ້ມຄອງການປ່ອຍອາຍພິດເຮືອນແກ້ວຢ່າງເປັນລະບົບ, ແລະຈະບໍ່ສົ່ງຜົນສະທ້ອນເຖິງຜົນສັກສິດຂອງນະໂຍບາຍນີ້ຍ້ອນຜົນການພັດທະນາເສດຖະກິດທີ່ມີຂຶ້ນໆລົງໆ.
ກ່ອນນີ້ບໍ່ເທົ່າໃດວັນ, ລັດຖະບານຈີນໄດ້ປະກາດແຜນການດຳເນີນງານກ່ຽວກັບການປ້ອງກັນແລະປັບປຸງມົນລະພິດທາງອາກາດ ເປັນຄັ້ງທຳອິດ, ເຊິ່ງໄດ້ສະແດງໃຫ້ເຫັນເຖິງຄວາມຕັດສິນໃຈຂອງຈີນໃນການປັບປຸງມົນລະພິດຂອງຕົວເມືອງ. ໃນແຜນການໄດ້ໃຫ້ຄຳໝັ້ນສັນຍາວ່າ: ຜ່ານການທຳຄວາມພະຍາຍາມເປັນເວລາ 5 ປີ, ເຮັດໃຫ້ຄຸນນະພາບ ຂອງອາກາດໃນທົ່ວປະເທດໄດ້ຮັບການປັບປຸງໂດຍລວມ ແລະ ອາກາດມົນລະພິດຮ້າຍແຮງໄດ້ຫຼຸດລົງຢ່າງຫຼວງຫຼາຍ, ໂດຍສະເພາະແມ່ນເຮັດໃຫ້ຄຸນນະພາບຂອງອາກາດໃນບາງເຂດແຄວ້ນທີ່ຖືກມົນລະພິດຮ້າຍແຮງທີ່ສຸດ ເຊັ່ນ: ນະຄອນຫຼວງປັກກິ່ງ, ນະຄອນທຽນສິນ, ແຂວງເຫີເປີຍ, ເຂດສາມຫຼ່ຽມປາກແມ່ນ້ຳຢາງເຊ ແລະ ເຂດສາມຫຼ່ຽມປາກແມ່ນ້ຳຈູ່ຈ່ຽງ.
ການກໍ່ສ້າງຊີວະພາບຕົວເມືອງຂອງຈີນໄດ້ຮັບຄວາມສົນໃຈຈາກຜູ້ຊ່ຽວຊານຕ່າງປະເທດ. ທ່ານກູສຕັບ ກຣົບ, ຜູ້ລິເລີ່ມທີ່ມີສ່ວນຮ່ວມ ທັງເປັນປະທານສະມາຄົມພະລັງງານທີ່ສະອາດສາກົນ ສະເໜີວ່າ: ໃນການຮ່ວມມືກັບຈີນ, ສາມາດເຫັນໄດ້ວ່າຈີນເອົາໃຈໃສ່ບັນຫາການອະນຸລັກສິ່ງແວດລ້ອມນັບມື້ນັບຫຼາຍຂຶ້ນ. ທ່ານສະເໜີອີກວ່າ: ຈີນຄວນເອົາໃຈໃສ່ຕື່ມຕໍ່ການນຳໃຊ້ພະລັງງານໃໝ່ ແລະ ພະລັງງານໝູນວຽນ ໃນການພັດທະນາຕົວເມືອງ.
