ສັບປະດາການແລກປ່ຽນທາງດ້ານການສຶກສາຈີນ-ອາຊຽນຄັ້ງທີ 6 ໄດ້ຈັດຂຶ້ນຢູ່ນະຄອນກຸ້ຍຢາງຂອງຈີນ
ວັນທີ 16 ກັນຍານີ້, ສັບປະດາການແລກປ່ຽນທາງດ້ານການສຶກສາຈີນ-ອາຊຽນຄັ້ງທີ 6 ໄດ້ຈັດຂຶ້ນຢູ່ນະຄອນກຸ້ຍຢາງ, ເທດສະບານກຸ້ຍໂຈ່ວ, ທາງພາກຕາເວັນຕົກສຽງໃຕ້ຂອງຈີນ ເຊິ່ງມີເຈົ້າໜ້າທີ່ຂັ້ນສູງລັດຖະບານ, ຜູ້ອໍານວຍການໂຮງຮຽນຊັ້ນສູງ, ນັກວິຊາການວົງການການສຶກສາ, ຜູ້ຕາງໜ້ານັກສຶກສາຕ່າງປະເທດທີ່ມາຮຽນຕໍ່ຢູ່ຈີນໄດ້ເຂົ້າຮ່ວມ, ໄດ້ແລກປ່ຽນຄໍາຄິດຄໍາເຫັນຢ່າງກວ້າງຂວາງກ່ຽວກັບຫົວຂໍ້ຕ່າງທໆເຊັ່ນການຊຸກຍູ້ການແລກປ່ຽນທາງດ້ານການສຶກສາລະຫວ່າງຈີນກັບອາຊຽນຕື່ມອີກ, ເພີ່ມທະວີການຮ່ວມມືລະຫວ່າງໂຮງຮຽນຊັ້ນສູງຂອງຈີນແລະອາຊຽນ, ສືບຕໍ່ຊຸກຍູ້ການແລກປ່ຽນດ້ານວັດທະນະທໍາ-ສັງຄົມຂອງສອງຝ່າຍແລະອື່ນໆ.
ໃນເວລາກ່າວຄໍາປາໄສໃນພິທີໄຂງານ,ທ່ານເຊີນຊູ້ນ,ຜູ້ຊ່ວຍລັດຖະມົນຕີວ່າການກະຊວງສຶກສາທິການຈີນຊີ້ອອກວ່າ,ເພື່ອຍົກສູງການຮ່ວມມືແລະການແລກປ່ຽນທາງດ້ານການສຶກສາລະຫວ່າງຈີນແລະອາຊຽນໃຫ້ກ້າວຂຶ້ນສູ່ລະດັບໃໝ່,ຈີນໄດ້ສະເໜີຂໍ້ລິເລີ່ມດັ່ງນີ້:ໜຶ່ງ, ຊຸກຍູ້"ແຜນການແລກປ່ຽນນັກສຶກສາຈໍານວນແສນຄົນ", ເປີດກວ້າງຂະໜາດຂອງນັກສຶກສາຕ່າງປະເທດ, ສົ່ງເສີມການແລກປ່ຽນເຊິ່ງກັນແລະກັນ. ສອງ, ຊຸກຍູ້ການຄົ້ນຄວ້າໃນລະດັບປະເທດແລະພາກພື້ນ,ໃຫ້ຄວາມສໍາຄັນຕໍ່ການຮຽນພາສາ,ລົງເລິກຄວາມເຂົ້າໃຈເຊິ່ງກັນແລະກັນ ແລະສາມ, ຊຸກຍຍູ້ການຝຶກອົບຮົມດ້ານຊັບພະຍາກອນມະນຸດ,ເພີ່ມທະວີການບໍາລຸງສ້າງບຸກຄະລາກອນ, ຍົກສູງລະດັບການແລກປ່ຽນ.
