ອົງການຟາວ ເຕືອນໃຫ້ລະວັງຕໍ່ພະຍາດໄຂ້ຫວັດສັດປີກ
ຕາມຂ່າວສານຊິນຮວາ: ວັນທີ 16 ກັນຍານີ້, ອົງການອາຫານແລະການກະເສດ ຂອງສະຫະປະຊາຊາດ ຫຼື ຟາວ ທີ່ສຳນັກງານໃຫຍ່ຕັ້ງຢູ່ທີ່ນະຄອນເລີແກ ໄດ້ອອກຄຳເຕືອນວ່າ: ພະຍາດໄຂ້ຫວັດສັດປີກສາຍພັນ H7N9 ແລະສາຍພັນ H5N1 ອາດຈະເກີດຂຶ້ນອີກໃນລະດູການໄຂ້ຫວັດໃຫຍ່ທີ່ຈະມາເຖິງນີ້.
ທ່ານເດນນິສ ຄາໂຣນ, ຜູ້ຊ່ຽວຊານອົງການພັດທະນາສາກົນອາເມລິກາ ເຫັນວ່າ, ຜູ້ຊ່ຽວຊານຈີນໄດ້ຄົ້ນພົບເຊື້ອພະຍາດໄຂ້ຫວັດສັດປີກໃນໄລຍະຕົ້ນແລະໄດ້ກຳນົດລັກສະນະຂອງມັນຢ່າງແມ່ນຢຳ ໄດ້ສ້າງໂອກາດທີ່ບໍ່ເຄີຍມີມາກ່ອນໃຫ້ແກ່ການປະສານງານລະຫວ່າງປະເທດຕ່າງໆເພື່ອຢັບຢັ້ງການແຜ່ລະບາດຂອງເຊື້ອພະຍາດ, ແລະໄດ້ສະກັດກັ້ນສະພາບແຜ່ລະບາດທີ່ອາດຈະກະທົບເຖິງທົ່ວໂລກຄັ້ງໜຶ່ງ.
ອົງການຟາວ ສປຊ ແລະອົງການພັດທະນາສາກົນອາເມລິກາ ໄດ້ສະເໜີວ່າ, ປະເທດຕ່າງໆຄວນສືບຕໍ່ຕິດຕາມຄວບຄຸມຢ່າງຕໍ່ເນື່ອງແລະມີລັກສະນະຈຸດສຸມຕໍ່ພະຍາດໄຂ້ຫວັດສັດປີກ, ສ້າງລະບົບຕິດຕາມການຜະລິດແລະການຈຳໜ່າຍສັດປີກ, ແລະວາງແຜນຮັບມືສຸກເສີນແລະມາດຕະການທີ່ຈຳເປັນ.
