ການເຈລະຈາກ່ຽວກັບການຄ້າເສລີລະຫວ່າງຈີນກັບສ.ເກົາຫລີໄດ້ຮັບຜົນສໍາເລັດຕາມຂັ້ນຕອນ 90%ຂອງສິນຄ້າຈະຖືກຍົກເວັ້ນພາສີອາກອນ
ວັນທີ 17 ກັນຍານີ້, ໃນເວລາຕອບຄໍາຖາມໃນກອງປະຊຸມຂ່າວປະຈໍາເດືອນ, ທ່ານເສີນຕ່ານຢາງ, ໂຄສົກກະຊວງການຄ້າຈີນກ່າວວ່າ, ຈີນແລະສ.ເກົາຫລີໄດ້ສໍາເລັດການເຈລະຈາຕາມຂັ້ນຕອນກ່ຽວກັບຮູບແບບເຂດການຄ້າເສລີຈີນແລະສ.ເກົາຫລີໃນຕົ້ນເດືອນກັນຍານີ້. ອີງຕາມຮູບແບບທີ່ສອງຝ່າຍໄດ້ຕົກລົງກັນ, ຜະລິດຕະພັນທີ່ບັນລຸການຫັນເປັນເສລີຄວນກວມເອົາ 90% ໃນບັນຊີລາຍຊື່ສິນຄ້າທີ່ຄ້ອງເສຍພາສີອາກອນ ເຊິ່ງກວມເອົາ 85% ຂອງຍອດມູນຄ່າການນໍາເຂົ້າ.
ທ່ານເສີນຕ່ານຢາງກ່າວຕື່ມວ່າ, ການເຈລະຈາກ່ຽວກັບຮູບແບບເຂດການຄ້າເສລີຈີນແລະສ.ເກົາຫລີເປັນພຽງຜົນສໍາເລັດຕາມຂັ້ນຕອນຂອງການເຈລະຈາທັງໝົດເທົ່ານັ້ນ ເຊິ່ງໄດ້ເປັນບົດຮຽນຈໍານວນໜຶ່ງໃຫ້ແກ່ການເຈລະຈາກ່ຽວກັບເຂດການຄ້າເສລີລະຫວ່າງຈີນ,ຍີ່ປຸ່ນແລະສ.ເກົາຫລີ. ແຕ່ວ່າສະພາບຂອງການເຈລະຈາສອງຄັ້ງນີ້ບໍ່ຄືກັນໝົດ, ທຸກປະເດັນຮູບແບບການເຈລະຈາກໍບໍ່ຄວນເອົາມາໃຊ້ຄືກັນ.
ລາຍງານຂ່າວແຈ້ງວ່າ, ຈີນແລະສ.ເກົາຫລີຕົກລົງຮ່ວມກັນວ່າ, ການເຈລະຈາກ່ຽວກັບເຂດການຄ້າເສລີຮອບຕໍ່ໜ້າຈະຈັດຂຶ້ນຢູ່ສ.ເກົາຫລີພາຍໃນປີນີ້.
