ພັກຝ່າຍຄ້ານກຳປູເຈຍສິ້ນສຸດການເຄື່ອນໄຫວປະທ້ວງ ຄວາມຂັດແຍ້ງຕໍ່ຜົນການເລືອກຕັ້ງທົ່ວໄປອາດຈະສາມາດແກ້ໄຂໄດ້ໂດຍຜ່ານການເຈລະຈາ
ຕາມຂ່າວສານຊິນຮວາ: ພາຍຫຼັງໄດ້ປຶກສາຫາລືກັນກັບພັກກຳອຳນາດແລະໄດ້ບັນລຸຄວາມຮັບຮູ້ທີ່ເປັນເອກະສັນກັນໃນລະດັບໃດໜຶ່ງແລ້ວ, ຕອນບ່າຍວັນທີ 17 ກັນຍານີ້, ພັກກູ້ຊາດກຳປູເຈຍ ໄດ້ສິ້ນສຸດການເຄື່ອນໄຫວປະທ້ວງຂະໜາດໃຫຍ່ທີ່ດຳເນີນມາເປັນເວລາ 3 ວັນ. ທ່ານສຳລັງສີ, ປະທານພັກກູ້ຊາດ ກ່າວວ່າ: ຈະສືບຕໍ່ເຈລະຈາທາງການເມືອງກັບພັກປະຊາຊົນເຊິ່ງເປັນພັກກຳອຳນາດ, ເພື່ອຊອກຫາວິທີການບັນລຸຄວາມຮຽກຮ້ອງດ້ານການເມືອງຂອງພັກກູ້ຊາດ ແລະ ແກ້ໄຂຄວາມຂັດແຍ້ງຕໍ່ຜົນການເລືອກຕັ້ງທົ່ວໄປ.
ເນື່ອງຈາກມີຄວາມບໍ່ພໍໃຈຕໍ່ຜົນການເລືອກຕັ້ງສະພາແຫ່ງຊາດກຳປູເຈຍທີ່ຈັດຂຶ້ນໃນວັນທີ 28 ກໍລະກົດຜ່ານມານີ້, ຜູ້ສະໜັບສະໜູນພັກກູ້ຊາດໄດ້ຈັດງານໂຮມຊຸມນຸມປະທ້ວງຢູ່ນະຄອນຫຼວງພະນົມເປັນນັບແຕ່ວັນທີ 15 ກັນຍານີ້ເປັນຕົ້ນມາ. ໃນງານຊຸມນຸມປະທ້ວງ, ທ່ານສຳລັງສີ ກ່າວວ່າ: ຖ້າບໍ່ດຳເນີນການກວດກາອິດສະຫຼະຕໍ່ການກະທຳຜິດກົດລະບຽບໃນການເລືອກຕັ້ງທົ່ວໄປແລ້ວ, ສະມາຊິກສະພາທີ່ໄດ້ຮັບເລືອກຕັ້ງໃໝ່ຂອງພັກກູ້ຊາດ ກໍຈະປະຕິເສດບໍ່ເຂົ້າຮ່ວມສະພາແຫ່ງຊາດຊຸດໃໝ່. ໃນການເຄື່ອນໄຫວປະທ້ວງ ໄດ້ເກີດການປະທະກັນລະຫວ່າງຜູ້ປະທ້ວງກັບຕຳຫຼວດແລະທະຫານ, ເຮັດໃຫ້ຜູ້ປະທ້ວງເສຍຊີວິດໜຶ່ງຄົນ, ຫຼາຍຄົນໄດ້ຮັບບາດເຈັບ.
ວັນທີ 16 ກັນຍານີ້, ສົມເດັດໂນໂຣດົມ ສີຫາໂມນີ, ມະຫາກະສັດກຳປູເຈຍໄດ້ປະກາດພະລາຊະໂອງການ ໂດຍຮຽກຮ້ອງໃຫ້ຜູ້ປະທ້ວງທີ່ສະໜັບສະໜູນພັກຝ່າຍຄ້ານກັບຕຳຫຼວດແລະທະຫານຈົ່ງຢຸດຕິການປະທະກັນດ້ວຍຄວາມຮຸນແຮງ, ແລະຮັກສາຄວາມອົດທົນທີ່ສຸດ, ເພື່ອຮ່ວມກັນປົກປັກຮັກສາຄວາມສາມັກຄີ ແລະ ຄວາມໝັ້ນທ່ຽງຂອງປະເທດ. ໃນມື້ດຽວກັນ, ທ່ານຮຸນແຊນ, ຮອງປະທານພັກປະຊາຊົນ, ນາຍົກລັດຖະມົນຕີກຳປູເຈຍ ກັບທ່ານສຳລັງສີ ໄດ້ປຶກສາຫາລືກັນເປັນເວລາ 6 ຊົ່ວໂມງ, ແຕ່ສອງຝ່າຍບໍ່ສາມາດບັນລຸຄວາມເປັນເອກະພາບກັນໃນບັນຫາການສ້າງຕັ້ງຄະນະກຳມະການກວດກາອິດສະຫຼະ.
ວັນທີ 17 ກັນຍານີ້, ການນຳຂັ້ນສູງຂອງພັກປະຊາຊົນ ແລະ ພັກກູ້ຊາດ ໄດ້ເຈລະຈາກັນອີກເປັນເວລາ 3 ຊົ່ວໂມງ, ສອງຝ່າຍລ້ວນແຕ່ກ່າວວ່າໄດ້ບັນລຸຄວາມຮັບຮູ້ທີ່ເປັນເອກະສັນກັນໃນຫຼາຍດ້ານ, ແລະກ່າວວ່າຈະສືບຕໍ່ປຶກສາຫາລືກັນຕື່ມອີກກ່ຽວກັບບັນຫາທີ່ກ່ຽວຂ້ອງ.
ຕອນບ່າຍວັນທີ 17 ກັນຍານີ້, ທ່ານສຳລັງສີ ໄດ້ປະກາດຢູ່ສະໜາມອິດສະຫຼະວ່າ, ການເຄື່ອນໄຫວປະທ້ວງຄັ້ງນີ້ມາຮອດມື້ນີ້ໄດ້ສິ້ນສຸດລົງແລ້ວ. ທ່ານກ່າວຕື່ມວ່າ: ການເຄື່ອນໄຫວປະທ້ວງໃນຄັ້ງນີ້ໄດ້ຮັບຜົນສຳເລັດ. ທ່ານຈະເຈລະຈາກັບພັກປະຊາຊົນ, ພະຍາຍາມຊອກຫາວິທີທີ່ເໝາະສົມໃນການແກ້ໄຂຄວາມຂັດແຍ້ງຕໍ່ຜົນການເລືອກຕັ້ງທົ່ວໄປ ໂດຍຜ່ານການເຈລະຈາ, ຖ້າບໍ່ດັ່ງນັ້ນ, ສະມາຊິກສະພາທີ່ໄດ້ຮັບເລືອກຕັ້ງໃໝ່ຂອງພັກກູ້ຊາດຈະປະຕິເສດບໍ່ເຂົ້າຮ່ວມກອງປະຊຸມຄັ້ງທຳອິດຂອງສະພາແຫ່ງຊາດຊຸດໃໝ່ທີ່ຈະຈັດຂຶ້ນໃນວັນທີ 23 ກັນຍານີ້. ພ້ອມກັນນັ້ນ, ທ່ານສຳລັງສີກ່າວວ່າ: ຖ້າການປຶກສາຫາລືບໍ່ສາມາດແກ້ໄຂບັນຫາຄວາມຂັດແຍ້ງຕໍ່ຜົນການເລືອກຕັ້ງທົ່ວໄປ, ພັກກູ້ຊາດກໍຈະຈັດການເຄື່ອນໄຫວປະທ້ວງທີ່ມີຂະໜາດໃຫຍ່ກວ່ານີ້ອີກ.
