ກອງທັບລັດຖະບານຟີລິບປິນໄດ້ກອບກູ້ 123 ຄົນທີ່ຖືກກໍາລັງປະກອບອາວຸດຕໍ່ຕ້ານລັດຖະບານຈັບເປັນຕົວປະກັນ
ວັນທີ 17 ກັນຍານີ້, ເຈົ້າໜ້າທີ່ທະຫານຟີລິບປິນກ່າວວ່າ, ແຕ່ຕອນບ່າຍວັນທີ 16 ຫາວັນທີ 17 ກັນຍານີ້, ກອງຕີພິເສດຂອງກອງທັບລັດຖະບານຟີລິບປິນໄດ້ກອບກູ້ 123 ຄົນທີ່ຖືກກໍາລັງປະກອບອາວຸດແນວໂຮມປົດປ່ອຍຊາດໂມໂຣຈັບເປັນຕົວປະກັນ ແລະໄດ້ສັງຫານກໍາລັງປະກອບອາວຸດແນວໂຮມປົດປ່ອຍຊາດໂມໂຣໄປ 30 ຄົນ, ສ່ວນກອງທັບລັດຖະບານຟີລິບປິນມີ 3 ຄົນເສຍຊີວິດ ແລະ 10 ຄົນໄດ້ຮັບບາດເຈັບ. ເຈົ້າໜ້າທີ່ທະຫານຟີລິບປິນໃຫ້ຊາບວ່າ, ທ່ານໂຈສ໌ ຊິກິໂຕ ມາລາໂຢ, ຫົວໜ້າຕໍາຫລວດເມືອງຊໍາໂບງ່າ ແລະຕໍາຫລວດ 4 ຄົນຖືກກໍາລັງປະກອບອາວຸດແນວໂຮມປົດປ່ອຍຊາດໂມໂຣຈີ້ຕົວໃນຕອນບ່າຍວັນດຽວກັນແລ້ວຖືກສົ່ງໄປເກາະແຫ່ງໜຶ່ງທີ່ໃກ້ກັບເມືອງຊໍາໂບງ່າ. ກອງທັບລັດຖະບານຟີລິບປິນໄດ້ສົ່ງທະຫານໄປເກາະດັ່ງກ່າວເພື່ອກອບກູ້ເປັນການດ່ວນ.
ມາຮອດວັນທີ 17 ກັນຍານີ້, ການສູ້ຮົບລະຫວ່ງກອງທັບລັດຖະບານຟີລິບປິນກັບກໍາລັງປະກອບອາວຸດແນວໂຮມປົດປ່ອຍຊາດໂມໂຣໄດ້ເຂົ້າສູ່ມື້ທີ 9. ແລ້ວຕອນເຊົ້າວັນທີ 9 ກັນຍານີ້, ກໍາລັງປະກອບອາວຸດແນວໂຮມປົດປ່ອຍຊາດໂມໂຣປະມານ 200 ຄົນໄດ້ຂີ່ເຮືອແລະຂຶ້ນບົກຢູ່ເມືອງຊໍາໂບງ່າທີ່ເປັນທ່າເຮືອການຄ້າທີ່ຢູ່ພາກໃຕ້ຟີລິບປິນ, ໄດ້ຍຶດເອົາບ້ານ 6 ແຫ່ງ ໂດຍມີຈຸດປະສົງເພື່ອຊັກທຸງແນວໂຮມປົດປ່ອຍຊາດໂມໂຣຂຶ້ນເສົາຢູ່ຕຶກຫ້ອງການເຈົ້າຄອງເມືອງ, ແຕ່ວ່າໄດ້ຮັບການສະກັດກັ້ນຈາກກອງທະຫານແລະຕໍາຫລວດປະຈໍາທ້ອງຖິ່ນ, ສອງຝ່າຍໄດ້ເກີດການສູ້ຮົບກັນຂຶ້ນຢ່າງຮຸນແຮງ.
