ອົງການຈັດຕັ້ງຊາວສິງກະໂປເຊື້ອສາຍຈີນຈັດກິດຈະກໍາເພື່ອສະຫລອງບຸນໄຫວ້ພະຈັນ
ຕອນຄໍ່າວັນທີ 18 ກັນຍານີ້, ສິງກະໂປໄດ້ຈັດກິດຈະກໍາມະໂຫລານທີ່ຊື່ວ່າ"ປະຊາຊົນກົມກຽວກັນແລະພັນຄົນຫລິ້ນພະນັນຊີງເຂົ້າໜົມໄຫວ້ພະຈັນເພື່ອສະເຫລີມສະຫລອງບຸນໄຫວ້ພະຈັນ" ເຊິ່ງມີຊາວສິງກະໂປເຊື້ອສາຍຈີນຮຸ້ນເກົ່າແລະຊາວຍົກຍ້າຍມາໃໝ່ລວມພັນກວ່າຄົນໄດ້ເຂົ້າຮ່ວມ.
ທ່ານ ໂລເຣັນສ໌ ວອງ ຊູນ ຊາຍ, ຮັກສາການລັດຖະມົນຕີວ່າການກະຊວງວັດທະນະທໍາ ເຂດຊຸມຊົນແລະຊາວໜຸ່ມ ທັງເປັນລັດຖະມົນຕີວຽກງານການເມືອງຊັ້ນສູງກະຊວງໂທລະຄົມແລະຖະແຫລງຂ່າວສິງກະໂປ ກ່າວຄໍາປາໄສດ້ວຍພາສາຈີນວ່າ, ຄົນຮຸ່ນກ່ອນຂອງແຂວງຝູຈ້ຽນຈີນໄດ້ນໍາເອົາຮີດຄອງປະເພນີ"ຫລິ້ນພະນັນຊິງເຂົ້າໜົມໄຫວ້ພະຈັນ" ມາຮອດສິງກະໂປ ແລະໄດ້ກາຍເປັນພາກສ່ວນໜຶ່ງຂອງຮີດຄອງປະເພນີຂອງສິງກະໂປໃນປັດຈຸບັນ. ທ່ານນາງຫລິວຫົງເໝີຍ, ທີ່ປຶກສາທູດທັງເປັນກົງສຸນໃຫຍ່ສະຖານທູດຈີນປະຈໍາສິງກະໂປກ່າວຄໍາປາໄສວ່າ, ງານລາຕີຄັ້ງນີ້ໄດ້ສະແດງໃຫ້ເຫັນເຖິງຫົວຂໍ້"ຄວາມກົມກຽວກັນ", ປະຊາຊົນຮຸ້ນເກົ່າແລະຊາວຍົກຍ້າຍມາໃໝ່ຂອງໃນວົງການຕ່າງໆຂອງສົງກະໂປໄດ້ເຕົ້າໂຮມກັນຢ່າງມ່ວນຊື່ນ ໄດ້ສະແດງໃຫ້ເຫັນເຖິງນະໂຍບາຍຄວາມກົມກຽວກັນລະຫວ່າງເຊື້ອຊາດແລະວັດທະນະທໍາຫລາຍເຄົ້າຂອງສິງກະໂປ.
ໃນກິດຈະກໍາຄັ້ງນີ້, ຊາວຍົກຍ້າຍຮຸ້ນເກົ່າແລະຊາວຍົກຍ້າຍມາໃໝ່ຍັງໄດ້ສະແດງລາຍການຕ່າງໆເຊັ່ນການຮ້ອງເພງ, ງິ້ວປັກກິ່ງ, ມາຍາ ກົນ, ການຟ້ອນເຕັ້ນ ແລະອື່ນໆ ເພື່ອສະເຫລີມສະຫລອງບຸນໄຫວ້ພະຈັນຢ່າງຄຶກຄື້ນ..
