ເຫດການຫລອນໂຈມຕີຢູ່ເຄັນຢາຢ່າງໜ້ອຍເຮັດໃຫ້ມີຜູ້ເສຍຊີວິດ 68 ຄົນເຊິ່ງລວມທັງພົນລະເມືອງຈີນຜູ້ໜຶ່ງ
ເຫດການຫລອນໂຈມຕີທີ່ເກີດຂຶ້ນຢູ່ສູນການຄ້າເວດສແກັດຂອງນະຄອນຫລວງໄນໂຣບີຂອງເຄັນຢາໃນຕອນເຊົ້າວັນທີ 21 ກັນຍານີ້ ຢ່າງໜ້ອຍໄດ້ເຮັດໃຫ້ຜູ້ເສຍຊີວິດ 68 ຄົນ ແລະ 200 ກວ່າຄົນໄດ້ຮັບບາດເຈັບ. ປັດຈຸບັນນີ້, ທະຫານແລະຕໍາຫລວດເຄັນຢາ ແລະກໍາລັງປະກອບອາວຸດຍັງຢູ່ໃນສະພາບປະເຊີນໜ້າກັນຢູ່ ແລະມີຄວາມເປັນໄປໄດ້ທີ່ຈະມີຜູ້ເສຍຊີວິດແລະຮັບບາດເຈັບເພີ່ມຂຶ້ນອີກ.
ວັນທີ 22 ກັນຍານີ້, ສະຖານທູດຈີນປະຈໍາເຄັນຢາຢືນຢັນວ່າມີພົນລະເມືອງຈີນຜູ້ໜຶ່ງໄດ້ເສຍຊີວິດໃນເຫດການຫລອນໂຈມຕີຢູ່ສູນການຄ້າແຫ່ງນີ້. ຜູ້ເສຍຊີວິດດັ່ງກ່າວເປັນແມ່ຍິງ, ອາຍຸ 38 ປີ. ລູກຊາຍຂອງຜູ້ເສຍຊີວິດກໍໄດ້ຮັບບາດເຈັບໃນເຫດການດັ່ງກ່າວນີ້, ປັດຈຸບັນນີ້ກໍາລັງຮັບການປິ່ນປົວຢູ່ໂຮງໝໍ ແລະອາການບາດເຈັບບໍ່ມີຄວາມຮ້າຍແຮງປານໃດ.
ວັນທີ 22 ກັນຍານີ້, ທ່ານຫົງເຫລີຍ, ໂຄສົກກະຊວງການຕ່າງປະເທດຈີນກ່າວວ່າ, ຈີນເດັດດ່ຽວຄັດຄ້ານລັດທິກໍ່ການຮ້າຍທຸກຮູບການ, ແລະກ່າວປະນາມຢ່າງຮຸນແຮງຕໍ່ເຫດການຫລອນໂຈມຕີແບບກໍ່ການຮ້າຍຢູ່ນະຄອນຫລວງໄນໂຣບີຂອງເຄັນຢາ, ໄວ້ອາໄລດ້ວຍຄວາມເສົ້າສະຫລົດໃຈຕໍ່ຜູ້ເສຍຊີວິດໃນເຫດການນີ້, ແລະສະແດງຄວາມເຫັນໃຈຕໍ່ຍາດຕິພີ່ນ້ອງຂອງຜູ້ເສຍຊີວິດແລະຜູ້ຮັບບາດເຈັບ.
ນັບແຕ່ເຫດການດັ່ງກ່າວເກີດຂຶ້ນເປັນຕົ້ນມາ, ທ່ານບານກີມູນ ເລຂາທິການໃຫຍ່ອົງການສະຫະປະຊາຊາດ, ສະພາຄວາມໝັ້ນຄົງອົງການສະຫະປະຊາຊາດ, ສະຫະພາບອາຝຼິກາ, ລັດຖະບານອາເມລິກາ, ຝຣັ່ງ, ການາດາ ແລະປະເທດອື່ນໆໄດ້ອອກຖະແຫລງການເພື່ອກ່າວປະນາມຢ່າງຮຸນແຮງຕໍ່ເຫດການຫລອນໂຈມຕີດັ່ງກ່າວທີ່ແນໃສ່ພົນລະເມືອງແລະສະແດງຄວາມເສົ້າສະຫລົດໃຈຕໍ່ຜູ້ເສຍຊີວິດ.
"ຂະບວນການຊາວໜຸ່ມອິດສະແລມ"ທີ່ເປັນກໍາລັງປະກອບອາວຸດຕໍ່ຕ້ານລັດຖະບານໂຊມາລີໄດ້ເປີດເຜີຍຜ່ານmicroblogວ່າຕົນເອງໄດ້ວາງແຜນແລະກໍ່ເຫດການຫລອນໂຈມຕີດັ່ງກ່າວ.
