ປະທານາທິບໍດີອີຣານກ່າວວ່າ ປະເທດຕາເວັນຕົກຕ້ອງຍອມຮັບສິດກັ່ນເອົາທາດຢູເຣນຽມຂຸ້ນຂອງອີຣານ
ວັນທີ 22 ກັນຍານີ້, ທ່ານຮາຊານ ໂຣຮານີ, ປະທານາທິບໍດີອີຣານກ່າວວ່າປະເທດຕາເວັນຕົກຕ້ອງຍອມຮັບສິດກັ່ນເອົາທາດຢູເຣນຽມຂຸ້ນ.
ໃນພິທີເດີນສວນສະໜາມສະແດງກໍາລັງຂອງອີຣານໂອກາດ"ສັບປະດາປ້ອງກັນປະເທດ"ອີຣານໃນມື້ດຽວກັນ, ທ່ານ ໂຣຮານີກ່າວວ່າ, ການກັ່ນເອົາທາດຢູເຣນຽມຂຸ້ນເປັນ"ສິດທີ່ຕັດຮອນບໍ່ໄດ້"ຂອງອີຣານ, ປະເທດຝ່າຍຕາເວັນຕົກຄວນຍອມຮັບສິດຂອງອີຣານວ່າດ້ວຍການກັ່ນເອົາທາດຢູເຣນຽມຂຸ້ນໃນດິນແດນຂອງຕົນພາຍໃຕ້ຂອບຫລັກມາດຖານແລະສົນທິສັນຍາສາກົນ.
ທ່ານ ໂຣຮານີກ່າວເນັ້ນວ່າ, ອີຣານບໍ່ມີແຜນຈະຄົ້ນຄວ້າແລະຜະລິດອາວຸດທີ່ມີອະນຸພາບທໍາລາຍຂະໜາດໃຫຍ່, ອີຣານມີຄວາມຫວັງໃນການສະແຫວງຫາການພັດທະນາຂອງເສດຖະກິດສັງຄົມໂດຍຜ່ານແຜນນິວເຄຼຍດ້ານພົນລະເຮືອນ. ອີຣານເປັນປະເທດທີ່ນິຍົມສັນຕິພາບ, ມີເຫດຜົນແລະໄມຕີຈິດມິດຕະພາບ, ຈະບໍ່ເປັນໄພຂົ່ມຂູ່ຕໍ່ປະເທດອ້ອມຂ້າງແຕ່ຢ່າງໃດ. ອີຣານໄດ້ກຽມພ້ອມຈະຈັດການເຈລະຈາກັບປະເທດຕາເວັນຕົກໂດຍບໍ່ມີເງື່ອນໄຂ, ແຕ່ວ່າ"ການເຈລະຈາຄວນຢູ່ບົນພື້ນຖານສະເໝີພາບແລະເຄົາລົບນັບຖືເຊິ່ງກັນແລະກັນ".
ວັນທີ 22 ກັນຍານີ້, ທ່ານ ໂຣຮານີຈະເດີນທາງອອກຈາກນະຄອນຫລວງເຕຮາຣານ ເພື່ອເຂົ້າຮ່ວມກອງປະຊຸມໃຫຍ່ອົງການສະຫະປະຊາຊາດຄັ້ງທີ 68 ທີ່ຈະຈັດຂຶ້ນຢູ່ນະຄອນນິວຢອກຂອງອາເມລິກາ.
