ຕອນເຊົ້າວັນທີ 23 ກັນຍານີ້, ສົມເດັດນະໂຣດົມ ສີຫາໂມນີ ກະສັດກໍາປູເຈຍໄດ້ຊົງເຂົ້າຮ່ວມພິທີໄຂກອງປະຊຸມຄັ້ງປະຖົມມະເລີກສະພາແຫ່ງຊາດສະໄໝທີ 5 ແລະຊົງປະກາດເປີດສະພາແຫ່ງຊາດຊຸດໃໝ່. ສະມາຊິກສະພາແຫ່ງຊາດຂອງພັກຝ່າຍຄ້ານພາກັນບໍ່ເຂົ້າຮ່ວມພິທີໄຂກອງປະຊຸມດັ່ງກ່າວ.
ຜູ້ທີ່ໄດ້ຮັບການເລືອກຕັ້ງເປັນສະມາຊິກສະພາແຫ່ງຊາດ 68 ຄົນຂອງພັກປະຊາຊົນກໍາປູເຈຍເຊັ່ນທ່ານ ເຮັງ ຊໍາຣິນ, ປະທານພັກປະຊາຊົນກໍາປູເຈຍ ແລະທ່ານຮຸນແຊນ, ຮອງ ປະທານພັກປະຊາຊົນກໍາປູເຈຍ ແລະທ່ານອື່ນໆໄດ້ເຂົ້າຮ່ວມກອງປະຊຸມດັ່ງກ່າວ. ສົມເດັດ ສີຫາໂມນີໄດ້ຊົງສະແດງຄວາມຂອບໃຈແລະຊົມເຊີຍຕໍ່ຜູ້ທີ່ໄດ້ຮັບການເລືອກຕັ້ງເປັນສະມາຊິກສະພາແຫ່ງຊາດທີ່ເຂົ້າຮ່ວມກອງປະຊຸມຄັ້ງປະຖົມມະເລີກສະພາແຫ່ງຊາດໃນພິທີໄຂກອງປະຊຸມ, ແລະຮຽກຮ້ອງໃຫ້ສະມາຊິກສະພາແຫ່ງຊາດໃຫ້ຄວາມສໍາຄັນຕໍ່ຜົນປະໂຫຍດແຫ່ງຊາດ, ພະຍາຍາມສ້າງສາປະເທດຊາດ ເພື່ອບັນລຸຄວາມຈະເລີນແລະເຂັ້ມແຂງ. ພະອົງຍັງໄດ້ຮຽກຮ້ອງໃຫ້ສະມາຊິກສະພາແຫ່ງຊາດແລະປວງຊົນຊຸກຍູ້ການສ້າງສາຄວາມຍຸຕິທໍາຂອງສັງຄົມແລະຕຸລາການ, ຊຸກຍູ້ການສ້າງສາການປົກຄອງທີ່ຊື່ສັດບໍລິສຸດ,ເພີ່ມທະວີການປະຕິຮູບດ້ານຕຸລາການ ບົນພື້ນຖານຈິດໃຈປົກຄອງດ້ວຍກົດໝາຍແລະປະຊາທິປະໄຕທີ່ສ້າງຕັ້ງຂຶ້ນໃນປີ 1993 ດ້ວຍຈິດໃຈຄວາມສາມັກຄີຊາດ.
ວັນທີ 22 ກັນຍານີ້, ຜູ້ທີ່ໄດ້ຮັບການເລືອກຕັ້ງເປັນສະມາຊິກສະພາແຫ່ງຊາດຂອງພັກກູ້ຊາດ 55 ຄົນໄດ້ເຕົ້າໂຮມກັນຢູ່ເມືອງສຽມລຽບພາຍໃຕ້ການນໍາພາຂອງທ່ານສົມລັງສີ, ປະທານພັກກູ້ຊາດ ແລະສາບານຕົວຕໍ່ສັນຍາລັກສົມເດັດນະໂຣດົມ ສີຫານຸ, ກະສັດພະອົງກ່ອນທີ່ໄດ້ສິ້ນພະຊົນແລ້ວວ່າ, ຈະບໍ່ເຂົ້າຮ່ວມກອງປະຊຸມຄັ້ງປະຖົມມະເລີກສະພາແຫ່ງຊາດຊຸດໃໝ່ທີ່ຈັດຂຶ້ນໃນວັນທີ 23 ກັນຍານີ້.
© China Radio International.CRI. All Rights Reserved. 16A Shijingshan Road, Beijing, China. 100040 |