ຈີນສະແດງຄວາມຊົມເຊີຍຕໍ່ລັດຖະບານຊີຣີທີ່ໄດ້ຍື່ນບັນຊີລາຍຊື່ທີ່ກ່ຽວຂ້ອງແກ່ອົງການຫ້າມໃຊ້ອາວຸດເຄມີ
ວັນທີ 23 ກັນຍານີ້, ທ່ານຫົງເຫລີຍ, ໂຄສົກກະຊວງການຕ່າງປະເທດຈີນກ່າວວ່າ, ການທີ່ລັດຖະບານຊີຣີທີ່ໄດ້ຍື່ນບັນຊີລາຍຊື່ອາວຸດເຄມີແກ່ອົງການຫ້າມໃຊ້ອາວຸດເຄມີ ເປັນມາດຕະການຕັ້ງໜ້າອີກຢ່າງໜຶ່ງນັບແຕ່ຊີຣີປະກາດເຂົ້າຮ່ວມສົນທິສັນຍາວ່າດ້ວຍການຫ້າມໃຊ້ ອາວຸດເຄມີ, ຈີນສະແດງຄວາມຊົມເຊີຍຕໍ່ເລື່ອງນີ້.
ໃນກອງປະຊຸມຂ່າວສາມັນທີ່ຈັດຂຶ້ນໃນມື້ດຽວກັນ, ມີນັກຂ່າວຖາມວ່າ, ວັນທີ 21 ກັນຍານີ້, ອົງການຫ້າມອາວຸດເຄມີກ່າວວ່າ ລັດຖະບານຊີຣີໄດ້ຍື່ນບັນຊີລາຍຊື່ອາວຸດເຄມີທັງໝົດ, ຈີນມີການວິຈານແນວໃດຕໍ່ເລື່ອງນີ້? ຈີນຈະອໍານວຍການສະສະໜັບສະໜູນແລະຄວາມຊ່ວຍເຫລືອແນວໃດແດ່ໃຫ້ແກ່ວຽກງານລົບລ້າງອາວຸດເຄມີຂອງຊີຣີຂອງອົງການຫ້າມໃຊ້ອາວຸດເຄມີ?
ທ່ານຫົງເຫລີຍກ່າວວ່າ, ໃນຖານະທີ່ເປັນສະມາຊິກທີ່ສໍາຄັນຂອງອົງການຫ້າມໃຊ້ອາວຸດເຄມີ, ຈີນໄດ້ສະໜັບສະໜູນວຽກງານຂອງອົງການຫ້າມໃຊ້ອາວຸດເຄມີຢ່າງສະເໝີຕົ້ນສະເໝີປາຍ ແລະໄດ້ອໍານວຍຄວາມສະດວກດ້ານບຸກຄະລາກອນໃຫ້ແກ່ອົງການນີ້ ໂດຍສະເພາະແມ່ນພະນັກງານສືບສວນແລະກວດກາອາວຸດເຄມີ. ຕໍ່ວຽກງານລົບລ້າງອາວຸດເຄມີຂອງຊີຣີ, ຈີນຈະສະໜັບສະໜູນວຽກງານຂອງອົງການຫ້າມໃຊ້ອາວຸດເຄມີຢ່າງສະເໝີຕົ້ນສະເໝີປາຍ ລວມທັງສົ່ງຊ່ຽວຊານເຂົ້າຮ່ວມການເຄື່ອນໄຫວທີ່ກ່ຽວຂ້ອງໂດຍອີງຕາມຄວາມຮຽກຮ້ອງຕ້ອງການຂອງອົງການດັ່ງກ່າວ.
