ລັດຖະມົນຕີການຕ່າງປະເທດຈີນກ່າວວ່າ ຈີນແລະອາຝຼິກາເປັນປະຊາຄົມທີ່ມີໂຊກຊະຕາຮ່ວມກັນ ຕ້ອງຮ່ວມມືກັນເພື່ອເຮັດໃຫ້ຄວາມຝັນປາກົດເປັນຈິງ
ຕອຍບ່າຍວັນທີ 23 ກັນຍານີ້, ການປຶກສາຫາລືດ້ານການເມືອງຄັ້ງທີ 3 ລະຫວ່າງລັດຖະມົນຕີການຕ່າງປະເທດຈີນກັບບັນດາປະເທດອາຝຼິກາໄດ້ຈັດຂຶ້ນຢູ່ສໍານັກງານໃຫຍ່ຂອງອົງການສະຫະປະຊາຊາດຢູ່ນະຄອນນິວຢອກ. ໃນເວລາກ່າວຄໍາປາໄສໃນກອງປະຊຸມຄັ້ງນີ້, ທ່ານຫວາງຢີ້, ລັດຖະມົນຕີວ່າການກະຊວງການຕ່າງປະເທດຈີນກ່າວວ່າ, ຈີນແລະອາຝຼິກາຕ້ອງຮ່ວມມືກັນເພື່ອເຮັດໃຫ້ຄວາມຝັນປາກົດເປັນຈິງ.
ທ່ານຫວາງຢີ້, ລັດຖະມົນຕີວ່າການກະຊວງການຕ່າງປະເທດຈີນແລະທ່ານເມທ໌ ໂຄອານາ-ມາຊາບາເນ, ລັດຖະມົນຕີວ່າການກະຊວງການຕ່າງປະເທດອາຝຼິກາໃຕ້ ໄດ້ຮ່ວມກັນເປັນປະທານຂອງກອງປະຊູມໃນວັນດຽວກັນ. ລັດຖະມົນຕີການຕ່າງປະເທດ ຫລື ຜູ້ຕາງໜ້າ ທີ່ມາຈາກສະຫະພາບປະເທດອາຝຼິກາແລະ 40 ກວ່າປະເທດຂອງອາຝຼິກາໄດ້ເຂົ້າຮ່ວມກອງປະຊຸມຄັ້ງນີ້. ລັດຖະມົນຕີການຕ່າງປະເທດຈີນແລະອາຝຼິກາໄດ້ແລກປ່ຽນຄໍາຄິດຄໍາເຫັນຢ່າງເລິກເຊິ່ງໂດຍປິ່ນອ້ອມຫົວຂໍ້ການຮ່ວມມືລະຫວ່າງຈີນແລະອາຝຼິກາ, ແລະໄດ້ອອກແຈ້ງການຮ່ວມວ່າດ້ວຍ ການປຶກສາຫາລືດ້ານການເມືອງຄັ້ງທີ 3 ລະຫວ່າງລັດຖະມົນຕີການຕ່າງປະເທດຈີນກັບບັນດາປະເທດອາຝຼິກາ.
ທ່ານຫວ່າງຢີ້ກ່າວວ່າ, ຈີນແລະອາຝຼິກາເປັນປະຊາຄົມທີ່ມີໂຊກຊະຕາຮ່ວມກັນຢ່າງສະເໝີຕົ້ນສະເໝີປາຍ, ການພັດທະນາຂອງຈີນແຍກອອກຈາກອາຝຼິກາບໍ່ໄດ້, ການພັດທະນາຂອງອາຝຼິກາກໍຕ້ອງການຈີນ, ຈີນຈະເປັນໝູ່ເພື່ອນທີ່ເຊື່ອໃຈໄດ້ທີ່ສຸດແລະເປັນຄູ່ຮ່ວມມືທີ່ຈິງຈັງທີ່ສຸດຂອງອາຝຼິກາຕະຫລອດໄປ. ການປຶກສາຫາລືດ້ານການເມືອງ ລະຫວ່າງລັດຖະມົນຕີການຕ່າງປະເທດຈີນກັບບັນດາປະເທດອາຝຼິກາຈັດຂຶ້ນສາມປີຕໍ່ຄັ້ງ, ສອງຄັ້ງກ່ອນໄດ້ຈັດຂຶ້ນໃນປີ 2007 ແລະປີ 2010 ຢູ່ນະຄອນນິວຢອກ.
