ປະທານາທິບໍດີເຄັນຢາປະກາດສິ້ນສຸດການເຄື່ອນໄຫວໃນການປາບເຫດການຫຼອນໂຈມຕີສູນການຄ້າເພັສທ໌ກັດມານ
ຕາມຂ່າວສານຊິນຮວາ: ຕອນຄ່ຳວັນທີ 24 ກັນຍານີ້, ທ່ານອູຮູຣູ ເຄັນຢັດຕາ, ປະທານາທິບໍດີເຄັນຢາ ໄດ້ກ່າວຄຳອາໄສຜ່ານທາງໂທລະພາບ, ໂດຍກ່າວວ່າ: ການປະຕິບັດພາລະກິດຂອງທະຫານແລະຕຳຫຼວດເຄັນຢາທີ່ແນໃສ່ພວກກໍ່ການຮ້າຍໃນເຫດການຫຼອນໂຈມຕີສູນການຄ້າເພັສທ໌ກັດມານທີ່ນະຄອນຫຼວງໄນໂຣບີ ໄດ້ສິ້ນສຸດລົງແລ້ວ, ເຊິ່ງເຄັນຢາໄດ້ເອົາຊະນະພວກກໍ່ການຮ້າຍໃນເຫດການນີ້.
ທ່ານເຄັນຢັດຕາ ກ່າວວ່າ: ຕອນຄ່ຳມື້ທີ 4 ຂອງການປະເຊີນໜ້າກັນລະຫວ່າງພວກກໍ່ການຮ້າຍກັບທະຫານແລະຕຳຫຼວດຂອງເຄັນຢາ, ພວກກໍ່ການຮ້າຍໄດ້ຖືກປາບໃນທີ່ສຸດ. ນັບມາຮອດປັດຈຸບັນ, ໃນເຫດການຫຼອນໂຈມຕີກໍ່ການຮ້າຍຄັ້ງນີ້ໄດ້ມີ 240 ຄົນເສຍຊີວິດແລະບາດເຈັບ, ໃນນັ້ນມີພົນລະເມືອງ 61 ຄົນ ພ້ອມທະຫານແລະຕຳຫຼວດເຄັນຢາ 6 ຄົນເສຍຊີວິດ, ພວກກໍ່ການຮ້າຍ 5 ຄົນຖືກສັງຫານ. ນອກນີ້ຍັງຈັບຕົວຜູ້ຕ້ອງສົງໄສໄດ້ 11 ຄົນ.
ທ່ານເຄັນຢັດຕາ ກ່າວຕື່ມວ່າ: ມີແມ່ຍິງອັງກິດ 1 ຄົນ, ຄົນສັນຊາດອາເມລິກາ 3-4 ຄົນອາດຈະມີສ່ວນຮ່ວມເຫດການຫຼອນໂຈມຕີກໍ່ການຮ້າຍໃນຄັ້ງນີ້. ປັດຈຸບັນ, ສູນການຄ້າແຫ່ງນີ້ຍັງປິດປະຕູຢູ່, ພະນັກງານຊ່ວຍເຫຼືອກອບກູ້ພວມເກັບມ້ຽນສົບຂອງຜູ້ປະສົບເຄາະຮ້າຍຢູ່, ຈຳນວນຜູ້ ເສຍຊີວິດຍັງອາດຈະເພີ່ມຂຶ້ນອີກ.
ທ່ານເຄັນຢັດຕາ ປະກາດວ່າ: ທົ່ວປະເທດເຄັນຢາຈະຊັກທຸງຊາດລົງເຄິ່ງເສົາ ເພື່ອໄວ້ອາໄລສະແດງຄວາມເສົ້າສະຫຼົດໃຈໃນທົ່ວປະເທດເປັນເວລາ 3 ວັນໂດຍເລີ່ມແຕ່ວັນທີ 25 ກັນຍານີ້ເປັນຕົ້ນໄປ.
ກຸ່ມປະກອບອາວຸດ "ພັກຊາວໜຸ່ມອິສລາມ" ເຊິ່ງເປັນກຸ່ມປະກອບອາວຸດທີ່ຕໍ່ຕ້ານລັດຖະບານໂຊມາລີທີ່ສຳຄັນ ໄດ້ເປີດເຜີຍວ່າຕົນເອງເປັນຜູ້ກໍ່ເຫດການຫຼອນໂຈມຕີກໍ່ການຮ້າຍຄັ້ງນີ້.
ວັນທີ 24 ກັນຍານີ້, ທ່ານນີໂກລັດ ໄຄ, ຜູ້ຕາງໜ້າພິເສດຂອງເລຂາທິການໃຫຍ່ອົງການສະຫະປະຊາຊາດກ່ຽວກັບບັນຫາໂຊມາລີ ໄດ້ກ່າວປະນາມເຫດການຫຼອນໂຈມຕີກໍ່ການຮ້າຍທີ່ເຄັນຢາ, ແລະຮຽກຮ້ອງໃຫ້ເພີ່ມທະວີການໂຈມຕີ "ຂະບວນການຊາວໜຸ່ມອິສລາມ" ຫຼື "ພັກຊາວໜຸ່ມໂຊມາລີ", ກຸ່ມປະກອບອາວຸດຕ້ານລັດຖະບານໂຊມາລີ ເຊິ່ງເປັນຜູ້ກໍ່ເຫດການຫຼອນໂຈມຕີກໍ່ການຮ້າຍໃນຄັ້ງນີ້.
