ແຜນລັກຟັງຂໍ້ມູນລັບ ຫລື ປຣິຊຶມ ຂອງອາເມລິກາເກີດມີບັນຫາອີກ ເອີຣົບຂົ່ມຂູ່ວ່າຈະຍຸດຕິການຊົມໃຊ້ຂໍ້ມູນຮ່ວມກັບອາເມລິກາ
ວັນທີ 24 ກັນຍານີ້, ສະມາຊິກລັດຖະສະພາເອີຣົບຫລາຍທ່ານກ່າວຢູ່ນະຄອນບລຸກແຊນວ່າ, ຈະສະແຫວງຫາການຍຸດຕິສົນທິສັນຍາວ່າດ້ວຍການຊົມໃຊ້ຂໍ້ມູນດ້ານການທະນາຄານຮ່ວມກັນລະຫວ່າງເອີຣົບກັບອາເມລິກາ ເພື່ອເປັນການຕອບໂຕ້ຕໍ່ແຜນ"ປຣິຊຶມ"ຂອງອາເມລິກາທີ່ໄດ້ລັກເອົາຂໍ້ມູນລັບຈໍານວນໜຶ່ງຂອງປະເທດເອີຣົບ.
ສະມາຊິກລັດຖະສະພາເອີຣົບຊີ້ອອກວ່າ, ແຜນ "ປຣິຊຶມ" ທີ່ເປີດເຜີຍໃຫ້ເຫັນໂດຍທ້າວເອັດວາດ ສະໂນເດັນ ສະແດງໃຫ້ເຫັນວ່າ, ອາເມລິກາໄດ້ "ລັກເອົາ" ຂໍ້ມູນຂອງສະມາຄົມໂທລະຄົມດ້ານການທະນາຄານລະຫວ່າງທະນາຄານທົ່ວໂລກ ຫລື SWIFT ຜ່ານຊ່ອງທາງທີ່ບໍ່ຊອບທໍາ, ສັນຍາວ່າດ້ວຍການຊົມໃຊ້ຂໍ້ມູນດ້ານການທະນາຄານຮ່ວມກັນລະຫວ່າງເອີຣົບກັບອາເມລິກາຄວນຍຸດຕິການບັງຄັບໃຊ້ໂດຍອັດຕະໂນມັດ.
ສັນຍາວ່າດ້ວຍການຊົມໃຊ້ຂໍ້ມູນດ້ານການທະນາຄານຮ່ວມກັນລະຫວ່າງເອີຣົບກັບອາເມລິໄດ້ມີການໂຕ້ຖຽງກັນຢູ່ພາຍໃນລັດຖະສະພາເອີຣົບມາໂດຍຕະຫລອດ. ສັນຍາສະບັບນີ້ໄດ້ຜ່ານໃນປີ 2010 ດ້ວຍຄວາມຫຍຸ້ງຍາກ.
