ລັດຖະມົນຕີການຕ່າງປະເທດຈີນເຂົ້າຮ່ວມກອງປະຊຸມເຈລະຈາເວທີປຶກສາຫາລືການເມືອງຊັ້ນສູງກ່ຽວກັບການພັດທະນາແບບຍືນຍົງອົງການສະຫະປະຊາຊາດ
ວັນທີ 24 ກັນຍານີ້, ທ່ານຫວາງຢີ້, ລັດຖະມົນຕີວ່າການກະຊວງການຕ່າງປະເທດຈີນໄດ້ເຂົ້າຮ່ວມແລະກ່າວຄໍາປາໄສໃນກອງປະຊຸມເຈລະຈາເວທີປຶກສາຫາລືການເມືອງຊັ້ນສູງກ່ຽວກັບການພັດທະນາແບບຍືນຍົງອົງການຊະຫະປະຊາຊາດ. ປະມຸກລັດ ແລະຫົວໜ້າລັດລັດຖະບານ, ລັດຖະມົນຕີການຕ່າງປະເທດທີ່ມາຈາກເກືອບ 70 ປະເທດ ແລະເຈົ້າໜ້າທີ່ອົງການຈັດຕັ້ງສາກົນຕົ້ນຕໍ ກໍໄດ້ເຂົ້າຮ່ວມແລະກ່າວຄໍາປາໄສໃນກອງປະຊຸມຄັ້ງນີ້.
ທ່ານຫວາງຢີ້ກ່າວວ່າ, ຈີນມີຄວາມຮັບຮູ້ເປັນຢ່າງດີຕໍ່ນິຍາມການພັດທະນາແບບຍືນຍົງ. ລັດຖະບານຈີນຖືການພັດທະນາແບບຍືນຍົງເປັນນະໂຍບາຍພື້ນຖານແຫ່ງຊາດ ແລະກ່າວເນັ້ນວ່າຈະບໍ່ໄປຕາມທາງເກົ່າທີ່ມົນລະພິດເກີດຂຶ້ນແລ້ວຈຶ່ງມາແກ້ໄຂຕາມຫລັງ ເພື່ອຮັບຜິດຊອບຕໍ່ລູກຫລານແລະປະຊາຄົມໂລກ.
ທ່ານຫວາງຢີ້ກ່າວຕື່ມວ່າ, ຄວນອອກແຮງສ້າງສາຄວາມສິວິໄລດ້ານຊີວະພາບແລະຍຶດໝັ້ນ"ຄວາມຮັບຜິດຊອບຮ່ວມທີ່ມີຄວາມແຕກຕ່າງກັນ" ເພື່ອບັນລຸການພັດທະນາແບບຍືນຍົງໃນທົ່ວໂລກ. ຕ້ອງມີການປະດິດສ້າງດ້ານແນວຄິດ, ໃຫ້ຄວາມສໍາຄັນທີ່ຫລາຍກວ່າເກົ່າຕໍ່ຄຸນນະພາບແລະປະສິດທິພາບຂອງການພັດທະນາ ໄປຄຽງຄູ່ກັບການຊຸກຍູ້ການພັດທະນາແບບຍືນຍົງຂອງເສດຖະກິດ, ຕ້ອງເອົາການຄໍ້າປະກັນແລະປັບປຸງຊີວິດການເປັນຢູ່ຂອງປະຊາຊົນ, ຄວາມຍຸຕິທໍາແລະຄວາມຄືບໜ້າຂອງສັງຄົມໄວ້ຢູ່ຖານະທີ່ພົ້ນເດັ່ນກວ່າເກົ່າ.
