ບົດລາຍງານຂອງ ສປຊ ກ່າວວ່າ ຊາວອົບພະຍົບຊີຣີທີ່ໜີໄປຮອດລີບັງມີຫຼາຍກວ່າ 7 ແສນ 5 ໝື່ນ 5000 ຄົນ
ຕາມຂ່າວສານຊິນຮວາ: ອົງການຂ້າຫຼວງໃຫຍ່ ສປຊ ເພື່ອຊາວອົບພະຍົບ ຫຼື UNHCR ໄດ້ເຜີຍແຜ່ບົດລາຍງານຢູ່ທີ່ນະຄອນຫຼວງເບຣຸດຂອງລີບັງໃນວັນທີ 25 ກັນຍານີ້ວ່າ: ນັບມາຮອດປັດຈຸບັນ, ປະຊາຊົນຊີຣີທີ່ໜີໄປຮອດລີບັງເພື່ອສະແຫວງຫາຖານະຊາວອົບພະຍົບໄດ້ບັນລຸເຖິງ 7 ແສນ 5 ໝື່ນ 5000 ຄົນ, ເພີ່ມຂຶ້ນ 1 ໝື່ນ 6000 ຄົນເມື່ອທຽບກັບອາທິດຜ່ານມານີ້. ບົດລາຍງານຂຽນວ່າ, ອົງການ UNHCR ໄດ້ໄຂຫ້ອງການຈົດທະບຽນຢູ່ບາງເຂດແຄວ້ນຂອງລີບັງເພື່ອດຳເນີນກາຈົດທະບຽນໃຫ້ແກ່ຊາວອົບພະຍົບຊີຣີ. ຊາວອົບພະຍົບເຫຼົ່ານີ້ສ່ວນຫຼາຍຖືກຈັດສັນຢູ່ເຂດພາກເໜືອແລະພາກຕາເວັນອອກທີ່ໃກ້ກັບຊາຍແດນຊີຣີ, ນະຄອນຫຼວງເບຣຸດ ແລະ ພາກໃຕ້ຂອງລີບັງ.
ຊາວອົບພະຍົບຊີຣີໄດ້ຫຼັ່ງໄຫຼເຂົ້າລີບັງເປັນຈຳນວນຫຼວງຫຼາຍ ເຮັດໃຫ້ອົງການຂ້າຫຼວງໃຫຍ່ ສປຊ ເພື່ອຊາວອົບພະຍົບ ຫຼື UNHCR ແລະລັດຖະບານລີບັງປະເຊີນກັບຄວາມກົດດັນອັນມະຫາສານ, ຫວ່າງມໍ່ໆນີ້, ໂຄສົກອົງການ UNHCR ກ່າວວ່າ: ເນື່ອງຈາກງົບປະມານບໍ່ພຽງພໍ, ເລີ່ມແຕ່ເດືອນຕຸລາໜ້ານີ້ເປັນຕົ້ນໄປ, ອົງການ UNHCR ອາດຈະເລີ່ມຫຼຸດຜ່ອນການຊ່ວຍເຫຼືອດ້ານອາຫານແກ່ຊາວອົບພະ ຍົບຊີຣີທີ່ລີ້ໄພຢູ່ລີບັງລົງ, ລັດຖະບານລີບັງກໍກ່າວຫຼາຍເທື່ອວ່າ: ບໍ່ມີຄວາມສາມາດໃນການຮັບຜິດຊອບແຕ່ຝ່າຍດຽວຕໍ່ຊາວອົບພະຍົບຊີ ຣີທີ່ຫຼັ່ງໄຫຼເຂົ້າປະເທດຕົນຈຳນວນຫຼວງຫຼາຍເຊິ່ງໄດ້ສ້າງຄວາມກົດດັນອັນມະຫາສານ, ແລະມີຄວາມຕ້ອງການຢ່າງຮີບດ່ວນທີ່ໃຫ້ປະຊາຄົມໂລກຈົ່ງອຳນວຍການຊ່ວຍເຫຼືອອັນຈຳເປັນແກ່ລີບັງໃນທັນທີ.
