ທ່ານສີຈິ້ນຜິງພົບປະເຈລະຈາກັບທ່ານຈູມມາລີ ໄຊຍະສອນ ໂດຍເນັ້ນໜັກການສ້າງການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງ ສອງປະເທດຈີນ-ລາວໃຫ້ອຸດົມສົມບູນແລະໄດ້ຮັບການພັດທະນາຢ່າງບໍ່ຢຸດຢັ້ງ
ວັນທີ 26 ກັນຍານີ້ ຢູ່ທີ່ນະຄອນຫຼວງປັກກິ່ງ, ທ່ານ ສີຈິ້ນຜິງ, ເລຂາທິການໃຫຍ່ສູນກາງພັກກອມມູນິດຈີນ, ປະທານປະເທດຈີນ ໄດ້ພົບປະເຈລະຈາກັບທ່ານ ຈູມມາລີ ໄຊຍະສອນ, ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວ, ປະທານປະເທດລາວ ທີ່ເດີນທາງມາຢ້ຽມຢາມຈີນ. ທ່ານສີຈິ້ນຜິງ ກ່າວວ່າ: ການພົວພັນລະຫວ່າງສອງປະເທດຈີນ-ລາວບໍ່ແມ່ນການພົວພັນສອງຝ່າຍທີ່ມີຄວາມໝາຍທຳມະດາເທົ່ານັ້ນ, ຫາກແມ່ນປະຊາຄົມໂຊກຊາຕາກຳທີ່ມີຜົນປະໂຫຍດຮ່ວມອັນກວ້າງຂວາງ, ສອງຝ່າຍຕ້ອງສ້າງການພົວພັນຄູ່ຮ່ວມມືຍຸດທະສາດຮອບດ້ານ ລະຫວ່າງຈີນ-ລາວໃຫ້ອຸດົມສົມບູນແລະໄດ້ຮັບການພັດທະນາຢ່າງບໍ່ຢຸດຢັ້ງ.
ໃນຖານະທີ່ເປັນປະເທດບ້ານໃກ້ເຮືອນຄຽງທີ່ມີໄມຕິຈິດມິດຕະພາບຕໍ່ກັນແລະມີສາຍພູແລະແມ່ນ້ຳລຳເຊຕິດຈອດກັນ, ລາວແມ່ນຄູ່ຮ່ວມມືທີ່ສຳຄັນຂອງຈີນໃນພາກພື້ນອາຊີຕາເວັນອອກສຽງໃຕ້. ໃນການພົບປະເຈລະຈາກັນໃນວັນທີ 26 ກັນຍານີ້, ທ່ານສີຈິ້ນຜິງພໍເລີ່ມຕົ້ນກໍໄດ້ສົມທຽບການພົວພັນລະຫວ່າງສອງປະເທດວ່າ "ຍາດພີ່ນ້ອງໄປມາຫາສູ່ກັນຍິ່ງຫຼາຍກໍຍິ່ງສະໜິດສະໜົມກັນ". ທ່ານກ່າວວ່າ: "ເຊື່ອວ່າ ການມາຢ້ຽມຢາມຈີນຂອງສະຫາຍເລຂາທິການໃຫຍ່ຈຸມມາລີ ໄຊຍະສອນ ໃນຄັ້ງນີ້ ຄົງຈະສາມາດຊຸກຍູ້ຄວາມໄວ້ເນື້ອເຊື່ອໃຈເຊິ່ງກັນແລະກັນ ທາງດ້ານການເມືອງ ແລະ ການຮ່ວມມືທີ່ຕ່າງຝ່າຍຕ່າງມີຜົນປະໂຫຍດ ລະຫວ່າງສອງຝ່າຍເຮົາ, ສ້າງການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງສອງປະເທດຈີນ-ລາວໃຫ້ອຸດົມສົມບູນແລະໄດ້ຮັບການພັດທະນາຢ່າງບໍ່ຢຸດຢັ້ງ".
ທ່ານ ຈຸມມາລີ ໄຊຍະສອນ ກ່າວວ່າ: ພັກ-ລັດແລະປະຊາຊົນລາວ ໄດ້ຖືພັກ-ລັດແລະປະຊາຊົນຈີນເປັນມິດສະຫາຍທີ່ສະໜິດສະໜົມທີ່ສຸດແລະໄວ້ເນື້ອເຊື່ອໃຈໄດ້ມາໂດຍຕະຫຼອດ. ຝ່າຍລາວຂອບໃຈນຳຝ່າຍຈີນທີ່ໄດ້ໃຫ້ການສະໜັບສະໜູນແລະການຊ່ວຍເຫຼືອທີ່ບໍ່ເຫັນແກ່ຕົວ ແກ່ລາວ ໃນໄລຍະຍາວນານມານີ້, ຫວັງວ່າຈະຮ່ວມກັນກັບຈີນ ເພື່ອເພີ່ມທະວີການແລກປ່ຽນປະສານງານດ້ານຍຸດທະສາດ, ລົງເລິກການຮ່ວມມືແບບຕ່າງຝ່າຍຕ່າງມີຜົນປະໂຫຍດ, ຈັດຕັ້ງປະຕິບັດຕາມຄວາມຮັບຮູ້ທີ່ເປັນເອກະສັນກັນທີ່ສຳຄັນ ແລະ ເອກະສານການຮ່ວມມື ລະຫວ່າງສອງຝ່າຍທີ່ຈະເຊັນກັນໃນການຢ້ຽມຢາມຄັ້ງນີ້, ປະສານສົມທົບກັນຢ່າງແໜ້ນແຟ້ນໃນວຽກງານອາຊຽນ ແລະ ສາກົນ, ປົກປັກຮັກສາຜົນປະໂຫຍດຮ່ວມ, ບັນລຸການພັດທະນາຮ່ວມກັນ.
