ຈໍານວນຜູ້ເສຍຊີວິດຈາກເຫດແຜ່ນດິນໄຫວທີ່ຮ້າຍແຮງຂອງປາກີສະຖານເພີ່ມຂຶ້ນເຖິງ 348 ຄົນ ປະທານປະເທດຈີນສົ່ງໂທລະເລກໄປຍັງປະທານາທິບໍດີປາກີສະຖານເພື່ອສະແດງຄວາມເຫັນໃຈ
ວັນທີ 25 ກັນຍານີ້, ເຈົ້າໜ້າທີ່ປາກີສະຖານກ່າວວ່າ, ແຜ່ນດິນໄຫວຂະໜາດ 7,8 ລິກເຕີທີ່ເກີດຂຶ້ນຢູ່ແຂວງບາໂລຊີສະຖານທາງພາກຕາເວັນຕົກສຽງໃຕ້ຂອງປະເທດໃນຕອນບ່າຍວັນທີ 24 ກັນຍານີ້ ໄດ້ເຮັດໃຫ້ມີຜູ້ເສຍຊີວິດ 348 ຄົນ ແລະຫລາຍກວ່າ 500 ຄົນໄດ້ຮັບບາດເຈັບ.
ວັນທີ 25 ກັນຍານີ້, ທ່ານສິຈີ້ນຜິງ, ປະທານປະເທດຈີນ, ໄດ້ສົ່ງໂທລະເລກໄປຍັງທ່ານມາມນູນ ຮູຊາອິນ, ປະທານາທິບໍດີປາກີສະຖານເພື່ອສະແດງຄວາມ ເຫັນໃຈກ່ຽວກັບແຜ່ນດິນໄຫວທີ່ຮ້າຍແຮງຂອງປາກີສະຖານ.ໂທລະເລກຂອງທ່ານສິຈີ້ນຜິງຂຽນວ່າ, ຂ້າພະເຈົ້າຮູ້ສຶກຕື່ນຕົກໃຈທີ່ໄດ້ຮູ້ວ່າແຂວງບາໂລຊີສະຖານຂອງປາກີສະຖານເກີດແຜ່ນດິນໄຫວຂະໜາດ 7,8 ລິກເຕີ ເຊິ່ງໄດ້ເຮັດໃຫ້ມີຜູ້ເສຍຊີວິດແລະບາດເຈັບ ແລະມີຄວາມເສຍຫາຍດ້ານຊັບສິນຢ່າງຫລສງຫລາຍ. ຂ້າພະເຈົ້າຮູ້ສຶກເສົ້າສະຫລົດໃຈທີ່ສຸດ ຄືກັນກັບປະຊາຊົນປາກີສະຖານຖານອ້າຍນ້ອງ. ຂ້າພະເຈົ້າຂໍຕາງໜ້າລັດຖະບານແລະປະຊາຊົນຈີນແລະໃນນາມສ່ວນຕົວ, ສະແດງຄວາມເສົ້າສະຫລົດໃຈຢ່າງສຸດຊຶ້ງຕໍ່ຜູ້ເສຍຂີວິດ ແລະສະແດງຄວາມເຫັນໃຈຢ່າງຈິງໃຈຕໍ່ຄອບຄົວຂອງຜູ້ເສຍຂີວິດແລະຜູ້ທີ່ໄດ້ຮັບບາດເຈັບ.
ຂ້າພະເຈົ້າເຊື່ອໝັ້ນວ່າພາຍໃຕ້ການນໍາພາຂອງທ່ານປະທານາທິບໍດີແລະລັດຖະບານປາກີສະຖານ, ປະຊາຊົນປາກີສະຖານຍ່ອມຈະສາມາດສາມັກຄີກັນເຂົ້າຜ່ານຜ່າຄວາມຫຍຸ້ງຍາກ, ເອົາຊະນະໄພພິບັດແລະສ້າງບ້ານແປງເມືອງໃຫ້ດີງາມຄືນໃໝ່. ຈີນແລະປາກີສະຖານເປັນປະເທດບ້ານໃກ້ເຮືອນຄຽງທີ່ມີໄມຕີຈິດມິດຕະພາບຢ່າງສະໜິດສະໜົມ, ຈີນຈະຢືນຢູ່ຄຽງຂ້າງປະຊາຊົນປາກີສະຖານຖານອ້າຍນ້ອງ ແລະຣ່ວມກັນຜ່ານຜ່າຄວາມຫຍຸ້ງຍາກຢ່າງສະເໝີຕົ້ນສະເໝີປາຍ. ລັດຖະບານແລະປະຊາຊົນຈີນຍິນດີຈະໃຫ້ການຊ່ວຍເຫລືອທີ່ຈໍາເປັນທຸກຢ່າງແກ່ປາກີສະຖານ.
ວັນທີ 25 ກັນຍານີ້, ທ່ານຫົງເຫລີຍ, ໂຄສົກກະຊວງການຕ່າງປະເທດຈີນກ່າວວ່າ, ຈີນໃຫ້ຄວາມເອົາໃຈໃສ່ເປັນຢ່າງສູງຕໍ່ສະພາບແຜ່ນດິນໄຫວຂອງປາກີສະຖານ. ທ່ານສິຈີ້ນຜິງ,ປະທານປະເທດຈີນໄດ້ສົ່ງໂທລະເລກໄປຍັງທ່ານມາມນູນ ຮູຊາອິນ, ປະທານາທິບໍດີປາກີສະຖານ, ແລະທ່ານຫລີເຄີ້ສຽງ, ນາຍົກລັດຖະມົນຕີຈີນກໍໄດ້ສົ່ງໂທລະເລກໄປຍັງທ່ານຊາລິຟ, ນາຍົກລັດຖະມົນຕີປາກີສະຖານ ເພື່ອສະແດງຄວາມເຫັນໃຈເຊັ່ນກັນ . ລັດຖະບານຈີນຈະໃຫ້ການຊ່ວຍເຫລືອສຸກເສີນຕາມຄວາມຮຽກຮ້ອງຕ້ອງການຂອງປາກີສະຖານ. ມາຮອດປັດຈຸບັນນີ້, ຍັງບໍ່ມີການລາຍງານທີ່ວ່າມີພົນລະເມືອງຈີນໄດ້ເສຍຊີວິດແລະໄດ້ຮັບບບາດເຈັບຈາກເຫດແຜ່ນດິນໄຫວຄັ້ງນີ້.
