ລັດຖະມົນຕີການຕ່າງປະເທດຈີນພົບປະກັບລັດຖະມົນຕີການຕ່າງປະເທດອາເມລິກາ
ຕອນເຊົ້າວັນທີ 26 ກັນຍານີ້, ທ່ານຫວາງຢີ້, ລັດຖະມົນຕີວ່າການກະຊວງການຕ່າງປະເທດຈີນທີ່ກໍາລັງເຂົ້າຮ່ວມກອງປະຊຸມໃຫຍ່ອົງການສະຫະປະຊາຊາດຄັ້ງທີ 68 ຢູ່ນະຄອນນິວຢອກໄດ້ພົບປະກັບທ່ານຈອນ ເຄຣີ, ລັດຖະມົນຕີວ່າການກະຊວງການຕ່າງປະເທດອາເມລິກາ. ທ່ານຫວາງຢີ້ກ່າວວ່າ, ການປຶກສາຫາລືກ່ຽວກັບບັນຫາຊີຣີຂອງສະພາຄວາມໝັ້ນຄົງອົງການສະຫະປະຊາຊາດໄດ້ມີຄວາມຄືບໜ້າຢ່າງເດັ່ນຊັດ, ຈີນສະແດງຄວາມຊົມເຊີຍຕໍ່ເລື່ອງນີ້.
ທ່ານຫວາງຢີ້ກ່າວຕື່ມວ່າ, ຈີນຫວັງວ່າຈະຊຸກຍູ້ຂະບວນການແກ້ໄຂບັນຫາອາວຸດເຄມີຊີຣີໃຫ້ກ້າວໄປໜ້າຢ່າງສະດວກໂດຍຜ່ານຂະບວນການສັນຕິວິທີ ຫາກບໍ່ແມ່ນວິທີກໍ່ສົງຄາມ. ຈີນຈະສືບຕໍ່ເສີມຂະຫຍາຍບົດບາດທີ່ມີລັກສະນະສ້າງສັນຕໍ່ຂະບວນການນີ້.
ຕອນບ່າຍວັນດຽວກັນ, ທ່ານຫວາງຢີ້ແລະທ່ານເຄຣີໄດ້ພ້ອມກັນເຂົ້າຮ່ວມກອງປະຊຸມລັດຖະມົນຕີການຕ່າງປະເທດ 6 ປະເທດກ່ຽວກັບບັນຫານິວເຄຼຍອີຣານ ແລະຮ່ວມກັບລັດຖະມົນຕີການຕ່າງປະເທດອັງກິດ, ຝຣັ່ງ, ເຢຍລະມັນແລະອີຣານ ເພື່ອປຶກສາຫາລືສະພາບບັນຫານິວເຄຼຍອີຣານໃນປັດຈຸບັນ ແລະການເຈລະຈາລະຫວ່າງ 6 ປະເທດດັ່ງກ່າວກັບອີຣານໃນບາດກ້າວຕໍ່ໄປ.
