ກອງປະຊຸມນັກທຸລະກິດເຊື້ອສາຍຈີນທົ່ວໂລກໄດ້ອັດລົງ ຍອດມູນຄ່າການລົງທຶນບັນລຸເຖິງປະມານ 132 ຕື້ຢວນ
ຕອນຄໍ່າວັນທີ 26 ກັນຍານີ້, ກອງປະຊຸມນັກທຸລະກິດເຊື້ອສາຍຈີນທົ່ວໂລກຄັ້ງທີ 12 ທີ່ໄດ້ດໍາເນີນເປັນເວລາ 2 ມື້ ໄດ້ອັດລົງຢູ່ນະຄອນສືງຕູ່ ແຂວງເຊສວນຂອງຈີນ. ໃນໄລຍະຈັດກອງປະຊູມຄັ້ງນີ້, ໄດ້ເຊັນໂຄງການຮ່ວມມື 241 ໂຄງການ ແລະຍອດມູນຄ່າການລົງທຶນໄດ້ບັນລຸເຖິງ 132,3 ຕື້ຢວນ. ກອງປະຊຸມນັກທຸລະກິດເຊື້ອສາຍຈີນຂອງໂລກທີ່ຈັດຂຶ້ນຢູ່ພາກຕາເວັນຕົກຂອງຈີນເປັນຄັ້ງທໍາອິດນີ້ ໄດ້ສ້າງຄວາມພໍໃຈໃຫ້ແກ່ນັກທຸລະກິດເຊື້ອສາຍຈີນເປັນຈໍານວນຫລວງຫລາຍ ແລະໄດ້ມີແຂກທັງພາຍໃນແລະຕ່າງປະເທດ 3000 ກວ່າທ່ານ ທີ່ມາຈາກ 104 ປະເທດແລະພາກພື້ນເຂົ້າຮ່ວມ. ທ່ານກ່ານຫລີນ, ຮອງເຈົ້າແຂວງແຂວງເຊສວນກ່າວວ່າ, ປັດຈຸບັນນີ້, ປະລິມານແລະຂະໜາດຂອງນັກທຸລະກິດຕ່າງປະເທດເຊື້ອສາຍຈີນທີ່ລົງທຶນຢູ່ເຊສວນກໍາລັງເພີ່ມຂຶ້ນຢ່າງບໍ່ຢຸດຢັ້ງ, ຂົງເຂດການລົງທຶນກໍໄດ້ຮັບການເປີດກວ້າງ ຢ່າງບໍ່ຢຸດຢັ້ງເຊັ່ນກັນ. ນັກທຸລະກິດຕ່າງປະເທດເຊື້ອສາຍຈີນແລະແຂວງເຊສວນໄດ້ກ້າວເຂົ້າສູ່ໄລຍະຂອງການແລກປ່ຽນແລະການຮ່ວມມືຮອບດ້ານ.
ກອງປະຊຸມນັກທຸລະກິດເຊື້ອສາຍຈີນທົ່ວໂລກທີ່ຈັດຂຶ້ນຢູ່ນະຄອນສືງຕູ່ ແຂວງເຊສວນຄັ້ງນີ້ ໄດ້ສ້າງເວທີທີ່ກວ້າງຂວາງໃຫ້ແກ່ນັກທຸລະກິດເຊື້ອສາຍຈີນ ເພື່ອໃຫ້ເຂົ້າຮ່ວມການພັດທະນາພາກຕາເວັນຕົກຂອງຈີນຢ່າງຕັ້ງໜ້າ ເຊິ່ງຈະຊຸກຍູ້ໃຫ້ມີນັກທຸລະກິດເຊື້ອສາຍຈີນທີ່ຫລາຍກວ່າເກົ່າມາລົງທຶນແລະປະກອບທຸລະກິດຢູ່ພາກຕາເວັນຕົກຂອງຈີນ.
