ນະຄອນຈົງກິ່ງຂອງຈີນແລະນະຄອນຫລວງພະນົມເປັນຂອງກໍາປູເຈຍສ້າງສາຍພົວພັນຕົວເມືອງໄມຕີຈິດມິດຕະພາບ
ນະຄອນຈົງກິ່ງຂອງຈີນແລະນະຄອນຫລວງພະນົມເປັນຂອງກໍາປູເຈຍຈະສ້າງສາຍພົວພັນຕົວເມືອງໄມຕີຈິດມິດຕະພາບ. ຕອນເຊົ້າວັນທີ 25 ກັນຍານີ້, ກອງປະຊຸມຄັ້ງທີ 5 ຄະນະກໍາມະການປະຈໍາສະພາຜູ້ແທນປະຊາຊົນສະໄໝທີ 4 ຂອງນະຄອນຈົງກິ່ງໄດ້ຜ່ານຍັດຕິດັ່ງກ່າວ. ນະຄອນຫລວງພະນົມເປັນແມ່ນແຫ່ງທີ 2 ຂອງອາຊີຕາເວັນອອກສຽງໃຕ້ທີ່ສ້າງສາຍພົວພັນຕົວເມືອງໄມຕີຈິດມິດຕະພາບກັບຈົ່ງກິ່ງເຊິ່ງຮອງຈາກຈາກນະຄອນຫລວງບາງກອກຂອງໄທ ແລະເປັນນະຄອນ（ແຂວງ ຫລືມູນລະລັດ）ຕ່າງປະເທດທີ 24 ທີ່ ສ້າງສາຍພົວພັນຕົວເມືອງໄມຕີຈິດມິດຕະພາບກັບນະຄອນຈົງກິ່ງ.
ທ່ານຮຸນແຊນ, ນາຍົກລັດຖະມົນຕີກໍາປູເຈຍໄດ້ມາຢ້ຽມຢາມນະຄອນຈົງກິ່ງໃນປີ 2004 ແລະໄດ້ຊຸກຍູ້ໃຫ້ລັດຖະບານກໍາປູເຈຍສ້າງສະຖານກົງສູນໃຫຍ່ປະຈໍານະຄອນຈົງກິ່ງ. ໃນປີ 2012, ການແລກປ່ຽນແລະຢ້ຽມຢາມກັນໃນລະດັບສູງລະຫວ່າງນະຄອນຈົງກິ່ງກັບນະຄອນຫລວງພະນົມເປັນໄດ້ບັນລຸຄວາມຮັບຮູ້ທີ່ເປັນເອກະສັນກັນໃນການສ້າງສາຍພົວພັນແບບໄມຕີຈິດມິດຕະພາບ ແລະໄດ້ຮັບການສະໜັບສະໜູນຈາກຜູ້ນໍາຂອງສອງປະເທດ. ໃນປີ 2012, ຍອດມູນຄ່າການນໍາເຂົ້າແລະສົ່ງອອກດ້ານການຄ້າລະຫວ່າງນະຄອນຈົງກິ່ງແລະກໍາປູເຈຍໄດ້ບັນລຸເກືອບ 44 ລ້ານໂດລາ.
ກໍາມາທິການວຽກງານການຕ່າງປະເທດ, ວຽກງານຊາວຈີນຕ່າງດ້າວ, ສາສະໜາແລະຊົນເຜົ່າສະພາຜູ້ແທນປະຊາຊົນຈົງກິ່ງເຫັນວ່າ, ການສ້າງສາຍພົວພັນຕົວເມືອງແບບໄມຕີຈິດມິດຕະພາບຄັ້ງນີ້ ມີຜົນດີຕໍ່ການຍົກສູງຊື່ສຽງແລະອິດທິພົນຂອງນະຄອນຈົງກິ່ງໃນປະເທດອາຊີຕາເວັນອອກສຽງໃຕ້ ແລະຍັງມີຜົນດີຕໍ່ການເພີ່ມທະວີແລະລົງເລິກການຮ່ວມມືລະຫວ່າງສອງຝ່າຍໃນດ້ານຕ່າງໆເຊັ່ນ ເສດຖະກິດການຄ້າ, ວັດທະນະທໍາ, ການສຶກສາ, ການທ່ອງທ່ຽວ ແລະອື່ນໆ.
