ອົງການຈັດຕັ້ງທາງສັງຄົມຍີ່ປຸ່ນອອກຖະແຫຼງການດ່ວນເພື່ອກ່າວປະນາມທ່ານຊິນໂຈ ອາເບະທີ່ກ່າວປາຖະກະຖາຢູ່ສະມັດຊາໃຫຍ່ ສປຊ
ຕອນບ່າຍວັນທີ 26 ກັນຍານີ້ຕາມເວລາທ້ອງຖິ່ນ, ທ່ານຊີນໂຈ ອາເບະ, ນາຍົກລັດ ຖະມົນຕີຍີ່ປຸ່ນໄດ້ກ່າວປາຖະກະຖາຢູ່ສຳນັກງານໃຫຍ່ອົງການສະຫະປະຊາຊາດທີ່ນິວຢອກອາເມລິກາ, ເຊິ່ມີບາງຕອນໄດ້ເນັ້ນໜັກວ່າຕ້ອງສະໜັບສະໜູນການພັດທະນາຂອງແມ່ຍິງ, ປ້ອງກັນບໍ່ໃຫ້ເກີດເຫດການໃຊ້ຄວາມຮຸນແຮງທາງເພດຕໍ່ແມ່ຍິງ ແລະອື່ນໆ. ແຕ່ຄຳເວົ້າດັ່ງກ່າວຂອງທ່ານຊີນໂຈ ອາເບະ ໄດ້ຖືກອົງການຈັດຕັ້ງທາງສັງຄົມຂອງຍີ່ປຸ່ນທີ່ມີຊື່ວ່າ "ການເຄື່ອນໄຫວທົ່ວປະເທດເພື່ອແກ້ໄຂບັນຫານາງບຳເລີກອງທະຫານຍີ່ປຸ່ນ" ກ່າວປະນາມຢ່າງຮຸນແຮງ, ອົງການຈັດຕັ້ງດັ່ງກ່າວໄດ້ອອກຖະແຫຼງການດ່ວນໃນຫວ່າງມໍ່ໆມານີ້ ເພື່ອກ່າວປະນາມທ່ານຊີນໂຈ ອາເບະມີສອງທ່າທີທີ່ແຕກຕ່າງກັນຕໍ່ພາຍນອກແລະພາຍໃນ ໃນບັນຫາປ້ອງກັນບໍ່ໃຫ້ເກີດເຫດການໃຊ້ຄວາມຮຸນແຮງທາງເພດຕໍ່ແມ່ຍິງ.
ໃນຖະແຫຼງການດ່ວນ, ອົງການຈັດຕັ້ງດັ່ງກ່າວ ໄດ້ຂຽນວ່າ: "ຖ້າລັດຖະບານຫວັງຢາກມີການປະກອບສ່ວນໃນບັນຫາປ້ອງກັນບໍ່ໃຫ້ເກີດເຫດການໃຊ້ຄວາມຮຸນແຮງທາງເພດຕໍ່ແມ່ຍິງແລ້ວ, ກໍຄວນແກ້ໄຂບັນຫາ "ນາງບຳເລີກອງທະຫານ" ທີ່ຕົກທອດມາແຕ່ສະໄໝສົງຄາມໂລກຄັ້ງທີ 2 ຢ່າງເໝາະສົມກ່ອນ."
ໃນຖະແຫຼງການຍັງໄດ້ຊີ້ອອກວ່າ: ຈົນຮອດປັດຈຸບັນ, ຍີ່ປຸ່ນກໍຍັງບໍ່ທັນໄດ້ໄຊ້ແທນຢ່າງເໝາະສົມຕໍ່ "ນາງບຳເລີ" ແລະ ຟື້ນຟູກຽດສັກ ສີຂອງເຂົາເຈົ້າເທື່ອ, ພຽງແຕ່ໄດ້ໄຊ້ແທນ "ນາງບຳເລີ" ທີ່ຍັງມີຊີວິດຢູ່ບາງຄົນ ໂດຍຜ່ານການບໍລິຈາກຂອງເອກະຊົນ ຫາກບໍ່ແມ່ນຜ່ານວິທີການສ້າງຕັ້ງກອງທຶນສະເພາະແຫ່ງຊາດ.
ອົງການຈັດຕັ້ງ "ການເຄື່ອນໄຫວທົ່ວປະເທດເພື່ອແກ້ໄຂບັນຫານາງບຳເລີກອງທະຫານຍີ່ປຸ່ນ" ໄດ້ສ້າງຕັ້ງຂຶ້ນເປັນເວລາ 20 ກວ່າປີແລ້ວ, ເພື່ອສຸມໃສ່ການປົກປັກຮັກສາສິດທິຂອງແມ່ຍິງປະເທດອາຊີທີ່ຖືກບັງຄັບໃຫ້ເປັນນາງບຳເລີກອງທະຫານ ໃນສະໄໝສົງຄາມໂລກຄັ້ງທີ 2.
