ລັດຖະບານຟິລິບປິນປະກາດວ່າວິກິດການຕົວປະກັນຊຳໂບນກາສິ້ນສຸດລົງແລ້ວ
ຕາມຂ່າວສານຊິນຮວາ: ວັນທີ 28 ກັນຍານີ້, ທຳນຽບປະທານາທິບໍດີຟິລິບປິນ ກ່າວວ່າ: ກອງທັບລັດຖະບານໄດ້ຊ່ວຍເຫຼືອປະຊາ ຊົນປະມານ 200 ຄົນທີ່ຖືກ "ແນວໂຮມປົດປ່ອຍຊາດໂມໂຣ" ເຊິ່ງເປັນກຸ່ມປະກອບອາວຸດຕໍ່ຕ້ານລັດຖະບານກັກເປັນຕົວປະກັນນັ້ນໄດ້ທັງໝົດແລ້ວ, ວິກິດການຕົວປະກັນຊຳໂບນກາທີ່ຍືດເຍື້ອມາເປັນເວລາເກືອບ 3 ອາທິດກໍໄດ້ສິ້ນສຸດລົງ. ລັດຖະບານຟິລິບປິນກຳລັງນຳຈັບຜູ້ປະກອບອາວຸດຂອງ "ແນວໂຮມປົດປ່ອຍຊາດໂມໂຣ" ທີ່ຍັງເຫຼືອຢູ່.
ເຈົ້າໜ້າທີ່ຕຳຫຼວດຟິລິບປິນໄດ້ປະກາດຕົວເລກຫຼ້າສຸດໃຫ້ຮູ້ວ່າ: ນັບແຕ່ລັດຖະບານຟິລິບ ປິນກັບຜູ້ປະກອບອາວຸດຂອງ "ແນວໂຮມປົດປ່ອຍຊາດໂມໂຣ" ເກີດການປະທະກັນຢູ່ເມືອງຊຳໂບນກາເມື່ອວັນທີ 9 ກັນຍານີ້ເປັນຕົ້ນມາ, ຢ່າງໜ້ອຍມີ 200 ຄົນເສຍຊີວິດ, ໃນນັ້ນມີ 167 ຄົນແມ່ນຜູ້ປະກອບອາວຸດຂອງ "ແນວໂຮມປົດປ່ອຍຊາດໂມໂຣ", ສ່ວນເຫຼືອນັ້ນແມ່ນທະຫານ, ຕຳຫຼວດ ແລະ ປະຊາຊົນທົ່ວໄປ. ໃນການເຄື່ອນໄຫວຊຳໂບນກາໃນຄັ້ງນີ້, ໄດ້ຊ່ວຍເຫຼືອກູ້ເອົາຕົວປະກັນໄດ້ປະມານ 200 ຄົນ, ນອກນີ້ມີຜູ້ປະກອບອາວຸດຂອງ "ແນວໂຮມປົດປ່ອຍຊາດໂມໂຣ" ປະມານ 270 ຄົນຖືກລັດຖະບານຈັບເປັນຊະເລີຍເສິກ.
ທ່ານ ໂດມິງໂກ ຕູຕາອັນ, ໂຄສົກກອງທັບລັດຖະບານຟິລິບປິນ ກ່າວວ່າ: ປັດຈຸບັນນີ້, ກອງທັບແລະຕຳຫຼວດຟິລິບປິນກຳລັງດຳເນີນການເຄື່ອນໄຫວກວາດລ້າງຢູ່ເມືອງຊຳໂບນກາ, ເພື່ອກຳຈັດຜູ້ປະກອບອາວຸດຂອງ "ແນວໂຮມປົດປ່ອຍຊາດໂມໂຣ" ທີ່ຍັງເຫຼືອແລະລີ້ຊ່ອນຢູ່ໃນເມືອງດັ່ງກ່າວນັ້ນໃຫ້ໝົດ.
