ທ່ານປະທານສີຈິ້ນຜິງ ຈະຢ້ຽມຢາມອິນໂດເນເຊຍ ເປັນເຫດການສຳຄັນໃນການພົວພັນລະຫວ່າງສອງປະເທດຈີນ-ອິນໂດເນເຊຍ
ຕາມຂ່າວສານຊິນຮວາ: ເນື່ອງໃນໂອກາດທ່ານສີຈິ້ນຜິງ, ປະທານປະເທດຈີນ ຈະເດີນທາງໄປຢ້ຽມຢາມອິນໂດເນເຊຍໃນໄວໆນີ້, ທ່ານຫຼິວຈ້ຽນຊາວ, ເອກອັກຄະລັດຖະທູດຈີນປະຈຳອິນໂດເນເຊຍ ໄດ້ໃຫ້ສຳພາດຕໍ່ສື່ມວນຊົນຈີນໃນວັນທີ 29 ກັນຍານີ້ວ່າ: ໂດຍຕອບສະໜອງຕາມຄຳເຊີນຂອງທ່ານ ຊູຊີໂລ ບຳບັງ ຢຸດໂຮໂຢໂນ, ປະທານາທິບໍດີອິນໂດເນເຊຍ, ທ່ານສີຈິ້ນຜິງ, ປະທານປະເທດຈີນ ຈະເດີນທາງໄປຢ້ຽມຢາມອິນໂດເນເຊຍທາງລັດຖະກິດໃນຕົ້ນເດືອນຕຸລານີ້, ແມ່ນເຫດການສຳຄັນໃນການພົວພັນລະຫວ່າງສອງປະເທດຈີນ-ອິນໂດເນເຊຍ, ມີຄວາມໝາຍອັນເລິກເຊິ່ງຍາວໄກ.
ທ່ານຫຼິວຈ້ຽນຊາວ ກ່າວວ່າ: ອິນໂດເນເຊຍແມ່ນປະເທດອາຊີຕາເວັນອອກສຽງໃຕ້ປະເທດທຳອິດ ທີ່ທ່ານ ສີຈິ້ນຜິງ ຈະໄປຢ້ຽມຢາມ ພາຍຫຼັງຂຶ້ນຮັບຕຳແໜ່ງປະທານປະເທດຈີນ, ນີ້ໄດ້ສະແດງໃຫ້ເຫັນຢ່າງເຕັມສ່ວນເຖິງຖານະສຳຄັນຂອງອິນໂດເນເຊຍໃນຍຸດທະສາດການຕ່າງປະເທດກັບປະເທດອ້ອມຂ້າງຂອງຈີນ. ໃນໄລຍະຢ້ຽມຢາມ, ທ່ານປະທານສີຈິ້ນຜິງ ຈະແລກປ່ຽນຄວາມເຫັນຢ່າງເລິກເຊິ່ງກັບຝ່າຍອິນໂດເນເຊຍ ກ່ຽວກັບການພັດທະນາການພົວພັນຄູ່ຮ່ວມຍຸດທະສາດລະຫວ່າງຈີນ-ອິນໂດເນເຊຍໃນອະນາຄົດ ແລະ ບັນຫາສາກົນແລະພາກພື້ນທີ່ສຳຄັນທີ່ສອງຝ່າຍສົນໃຈຮ່ວມກັນ. ເຊື່ອວ່າ ຜ່ານການທຳຄວາມພະຍາຍາມຮ່ວມຂອງສອງຝ່າຍ, ການຢ້ຽມຢາມໃນຄັ້ງນີ້ຈະໄດ້ຮັບໝາກຜົນອັນອຸດົມສົມບູນ, ຊຸກຍູ້ຄວາມໄວ້ເນື້ອເຊື່ອໃຈທາງຍຸດທະສາດເຊິ່ງກັນແລະກັນ, ຮັດແໜ້ນການຮ່ວມມືທາງຍຸດທະສາດໃນຂົງເຂດຕ່າງໆ, ພັດທະນາການພົວພັນຄູ່ຮ່ວມຍຸດທະສາດລະຫວ່າງສອງປະເທດໃຫ້ຂຶ້ນສູ່ລະດັບໃໝ່, ແລະກາຍເປັນຂີດໝາຍໃໝ່ໃນປະຫວັດການພັດທະນາການພົວພັນລະຫວ່າງສອງປະເທດຈີນ-ອິນໂດເນເຊຍ.
ທ່ານຫຼິວຈ້ຽນຊາວ ກ່າວວ່າ: ປີນີ້ແມ່ນປີທີ 10 ແຫ່ງການສ້າງການພົວພັນຄູ່ຮ່ວມຍຸດທະສາດລະຫວ່າງຈີນ-ອາຊຽນ. ໃນ 10 ປີຜ່ານມາແມ່ນ "10 ປີຄຳ" ແຫ່ງການພົວພັນລະຫວ່າງຈີນ-ອາຊຽນ. ຈີນຍິນດີທຳຄວາມພະຍາຍາມຮ່ວມກັນກັບອິນໂດເນເຊຍ, ຍົກລະດັບການພົວພັນຄູ່ຮ່ວມຍຸດທະສາດລະຫວ່າງສອງປະເທດຢ່າງບໍ່ຢຸດຢັ້ງ, ປະກອບສ່ວນຢ່າງຕັ້ງໜ້າຕໍ່ການສ້າງ "10 ປີເພັດພອຍ" ແຫ່ງການພົວພັນລະຫວ່າງຈີນ-ອາຊຽນໃນອະນາຄົດ.
