ໄທແລະປະເທດອື່ນໆຈະສຸມຄວາມພະຍາຍາມໃນການຍົກສູງຄຸນນະພາບການບໍລິການເພື່ອຕ້ອນຮັບນັກທ່ອງທ່ຽວຈີນເນື່ອງໃນໂອກາດວັນຊາດຈີນວຽນມາເຖິງ
ຕາມຂ່າວ CRI: ການພັກວຽກເປັນເວລາໜຶ່ງອາທິດເນື່ອງໃນໂອກາດວັນຊາດຈີນປີ 2013 ໄດ້ວຽນມາເຖິງ, ຄົນຈີນຈຳນວນບໍ່ໜ້ອຍກໍຈະເລືອກໄປທ່ອງທ່ຽວປະເທດໄທ ເຊິ່ງເປັນປະເທດອາຊີຕາເວັນອອກສຽງໃຕ້ທີ່ມີແຫຼ່ງທ່ອງທ່ຽວທີ່ສວຍງາມ. ເວົ້າສຳລັບປະເທດໄທແລ້ວ, ໄລຍະພັກວຽກວັນຊາດຈີນທີ 1 ຕຸລາຂອງທຸກໆປີ ແມ່ນໄລຍະທີ່ມີນັກທ່ອງທ່ຽວຈີນໄປທ່ຽວຈຳນວນຫຼວງ ຫຼາຍທີ່ສຸດ ເຊິ່ງພຽງຖັດຈາກໄລຍະບຸນກຸດຈີນເທົ່ານັ້ນ, ສະເພາະໃນວັນຊາດຈີນປີນີ້, ການສັ່ງຈອງຫ້ອງໂຮງແຮມໃນເຂດທ່ອງທ່ຽວທີ່ໄດ້ຮັບຄວາມນິຍົມ ເຊັ່ນ: ບາງ ກອກ, ພູເກັດ, ຊຽງໃໝ່ ແລະ ເກາະສະໝຸຍເປັນຕົ້ນ ປັດຈຸບັນໄດ້ມີການເພີ່ມຂຶ້ນໃນລະດັບທີ່ຕ່າງກັນ, ສ່ວນສູນການຄ້າຂະໜາດໃຫຍ່ແຫ່ງຕ່າງໆຂອງນະຄອນຫຼວງບາງກອກ ກໍໄດ້ຈັດກິດຈະກຳຫຼຸດລາຄາສິນຄ້າເພື່ອດຶງດູດນັກທ່ອງທ່ຽວຈີນ.
ຜູ້ປະກອບການຂະແໜງການທ່ອງທ່ຽວໄທບາງຄົນກ່າວວ່າ, ປັດຈຸບັນນີ້, ຄົນຈີນໄປທ່ຽວປະເທດໄທມີຈຳນວນນັບມື້ນັບຫຼາຍຂຶ້ນແລະສ່ວນຫຼາຍແມ່ນເລືອກການວາງແຜນທ່ອງທ່ຽວດ້ວຍຕົນເອງ ຫາກບໍ່ແມ່ນຜ່ານບໍລິສັດທ່ອງທ່ຽວ, ຈຳນວນນັກທ່ອງທ່ຽວນີ້ໄດ້ເພີ່ມຂຶ້ນ ຢ່າງວ່ອງໄວໃນຊຸມປີຜ່ານມານີ້. ປັດຈຸບັນ ຂະແໜງການທ່ອງທ່ຽວຂອງໄທຄວນເອົາໃຈໃສ່ການຍົກສູງຄຸນນະພາບດ້ານການບໍລິການໃຫ້ຫຼາຍຍິ່ງຂຶ້ນ, ເພື່ອເຮັດໃຫ້ຂະແໜງການທ່ອງທ່ຽວຂອງໄທບັນລຸການພັດທະນາຢ່າງຕໍ່ເນື່ອງ.
ນອກຈາກປະເທດໄທແລ້ວ, ໃນຊຸມປີຜ່ານມານີ້, ປະເທດອາຊີຕາເວັນອອກສຽງໃຕ້ອື່ນໆອີກຫຼາຍປະເທດ ເຊັ່ນ: ກຳປູເຈຍ, ລາວ ແລະ ອື່ນໆກໍກາຍເປັນທາງເລືອກໃໝ່ຂອງນັກທ່ອງທ່ຽວຈີນເປັນກ້າວໆ. ຕົວຢ່າງ, ພຽງແຕ່ໃນ 6 ເດືອນຕົ້ນປີນີ້ເທົ່ານັ້ນ, ນັກທ່ອງທ່ຽວຈີນທີ່ໄປທ່ຽວກຳປູເຈຍ ກໍໄດ້ເພີ່ມຂຶ້ນຫຼາຍກວ່າ 50%, ສະນັ້ນ ກຳປູເຈຍຈຶ່ງໄດ້ວາງແຜນເພີ່ມສາຍການບິນໂດຍກົງກັບຈີນ, ເພື່ອດຶງດູດນັກທ່ອງທ່ຽວຈີນໄປທ່ຽວກຳປູເຈຍ.
