ປະທານາທິບໍດີຊີຣີກ່າວວ່າຈະບໍ່ຈັດການເຈລະຈາກັບຝ່າຍຕໍ່ຕ້ານປະກອບອາວຸດຂະນະທີ່ຝ່າຍຕໍ່ຕ້ານຕົ້ນຕໍກ່າວວ່າຊົມເຊີຍມະຕິສະພາຄວາມໝັ້ນຄົງ
ເມື່ອບໍ່ດົນມານີ້, ໃນເວລາໃຫ້ສໍາພາດຕໍ່ສະຖານີໂທລະພາບທາງການຂອງອີຕາລີ, ທ່ານບາຊາ ອານ-ອັດຊາດ, ປະທານາທິບໍດີຊີຣີ ກ່າວວ່າ, ການກະທໍາຂອງຝ່າຍຕໍ່ຕ້ານປະກອບອາວຸດໃນດິນແດນຊີຣີລວມທັງການທໍາລາຍ, ການຂ້າຟັນລັນແທງ ແລະການລອບສັງຫານ. ທຸກປະເທດໃນທົ່ວໂລກລ້ວນແຕ່ຈະເອີ້ນພວກນີ້ວ່າເປັນກໍາລັງກໍ່ການຮ້າຍ, ຫາກບໍ່ແມ່ນຝ່າຍຕໍ່ຕ້ານ. ລັດຖະບານຊີຣີຈະບໍ່ຈັດການເຈລະຈາກັບພວກເຂົາ ນອກຈາກວ່າພວກເຂົາວາງອາວຸດເທົ່ານັ້ນ.
ໃນການໃຫ້ສໍາພາດ, ທ່ານບາຊາກ່າວເນັ້ນອີກວ່າລັດຖະບານຊີຣີຈະເຮັດຕາມມະຕິກ່ຽວກັບຊີຣີທີ່ສະພາຄວາມໝັ້ນຄົງອົງການສະຫະປະຊາຊາດໄດ້ຕົກລົງເມື່ອບໍ່ດົນມານີ້.
ພ້ອມນັ້ນ, ທ່ານຊາຟວານ ອາຄາເຊ, ສະມາຊິກສໍາຄັນຂອງຝ່າຍຕໍ່ຕ້ານຕົ້ນຕໍຂອງຊີຣີ ຄືອົງການປະສານງານແຫ່ງຊາດຂອງກໍາລັງປະຕິຮູບປະຊາທິປະໄຕແຫ່ງຊາດຊີຣີກ່າວວ່າ, ທຸກຝ່າຍການເມືອງຊີຣີຄວນເຂົ້າຮ່ວມກອງປະຊຸມສາກົນກ່ຽງກັບບັນຫາຊີຣີທີ່ຈະຈັດຂຶ້ນຢູ່ນະຄອນເຊີແນວໃນກາງເດືອນພະຈິກປີນີ້ ແລະທໍາຄວາມພະຍາຍາມເພື່ອໃຫ້ສາມາດຈັດຂຶ້ນຢ່າງມີຜົນສໍາເລັດ.
