ງານວາງສະແດງລົດຍົນອິນໂດເນເຊຍເນັ້ນການສົ່ງເສີມລາຄາຖືກແລະການປົກປັກຮັກສາສິ່ງແວດລ້ອມ
ງານວາງສະແດງລົດຍົນສາກົນອິນໂດເນເຊຍຄັ້ງທີ 21 ໄດ້ຈັດຂຶ້ນແຕ່ວັນທີ 19 ຫາວັນທີ 29 ກັນຍານີ້ຢູ່ນະຄອນຫລວງຈາກາກຕາຂອງອິນໂດເນເຊຍ. ງານວາງສະແດງລົດຍົນຄັ້ງນີ້ມີວິສາຫະກິດຜະລິດລົດຍົນ 36 ແຫ່ງແລະວິສາຫະກິດຜະລິດອາໄຫລ່ 275 ແຫ່ງທີ່ມາຈາກທົ່ວໂລກເຂົ້າຮ່ວມ. ເນື້ອທີ່ຫໍວາງສະແດງຫລາຍກວ່າ 7 ໝື່ນ 5 ພັນຕາແມັດ ແລະໄດ້ດຶງດູດຜູ້ຊົມເຂົ້າຮ່ວມປະມານ 3 ແສນຄົນ.
ທ່ານດີຢາ, ຜູ້ອໍານວຍການຝ່າຍປະຊາສໍາພັນສະມາຄົມອຸດສາຫະກໍາລົດຍົນອິນໂດເນເຊຍກ່າວວ່າ, ງານວາງສະແດງລົດຍົນປີນີ້ເນັ້ນໜັ້ກການສະເໜີລົດຍົນແບບປະຢັດພະລັງງານແລະຫລຸດຜ່ອນການປ່ອຍມົນລະພິດ ເຊິ່ງໄດ້ສະແດງອອກໃຫ້ເຫັນການພັດທະນາຂອງການປະດິດສ້າງໃນດ້ານເຕັກນິກວິທະຍາສາດດ້ານອະນຸລັກສິ່ງແວດລ້ອມຂອງຂະແໜງການຜະລິດລົດຍົນຂອງອິນໂດເນເຊຍ. ຫວັງວ່າໃນອະນາຄົດ, ການພັດທະນາຂອງລົດຍົນຈະບໍ່ພຽງແຕ່ເນັ້ນໜັກລະດັບການນໍາໃຊ້ທີ່ສະດວກສະບາຍແລະຄວາມສາມາດທາງດ້ານເສດຖະກິດຂອງຜູ້ຊົມໃຊ້ເທົ່ານັ້ນ, ຍັງຈະໃຫ້ຄວາມສໍາຄັນຢ່າງສູງຕໍ່ການປະຢັດພະລັງງານແລະຫລຸດຜ່ອນການປ່ອຍມົນລະພິດອີກ.
ການຜະລິດລົດຍົນແບບອະນຸຮັກສິ່ງແວດລ້ອມແລະມີລາຄາຖືກຂອງວິສາຫະກິດຫລາຍແຫ່ງຂອງຂະແໜງການຜະລິດລົດຍົນແມ່ນກ່ຽວພັນກັບກົດລະບຽບສະບັບໜຶ່ງທີ່ລັດຖະບານອິນໂດເນເຊຍຈະປະກາດໃຊ້. ເພື່ອຫລຸດຜ່ອນການສິ້ນເປືອງພະລັງງານແລະຫລຸດຜ່ອນມົນລະພິດ, ລັດຖະບານອິນໂດເນເຊຍມີແຜນຈະວາງກົດລະບຽບໃໝ່ ເຊິ່ງໃຫ້ບູລິມະສິດດ້ານນະໂຍບາຍທີ່ມີອັດຕາພາສີຕໍ່າສຸດໃຫ້ແກ່ ວິສາຫະກິດທີ່ສອດຄ່ອງກັບມາດຕະຖານອະນຸຮັກສິ່ງແວດລ້ອມແລະມີລາຄາຖືກ.
