ສານອວຍພອນວັນຊາດ ສປ ຈີນ
(GMT+08:00) 2013-10-01 16:58:55 cri
ວັນທີ 30 ກັນຍາ 2013, ສະບາຍຈູມມາລີ ໄຊຍະສອນ, ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວ ປະທານປະເທດແຫ່ງ ສປປ ລາວ, ສະຫາຍທອງສິງທຳມະວົງ ນາຍົກລັດຖະມົນຕີແຫ່ງ ສປປ ລາວ, ສະຫາຍນາງປານີ ຢາທໍ່ຕູ້ ປະທານສະພາແຫ່ງຊາດ ແຫ່ງ ສປປ ລາວໄດ້ສົ່ງສານອວຍພອນເຖິງສະຫາຍ ສີຈິ້ນຜິງ, ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຈີນ, ປະທານປະເທດແຫ່ງ ສາທາລະນະລັດ ປະຊາຊົນຈີນ, ສະຫາຍຫລີເຄີ້ສຽງ, ນາຍົກລັດຖະມົນຕີແຫ່ງ ສາທາລະນະລັດປະຊາຊົນຈີນ, ສະຫາຍຈາງເຕີຈຽງ ປະທານຄະນະປະຈຳສະພາຜູ່ແທນປະຊາຊົນທົ່ວປະເທດ ແຫ່ງ ສາທາລະນະລັດປະຊາຊົນຈີນ.
ທີ່ນະຄອນຫລວງປັກກິ່ງ
ເຊິ່ງເນື້ອໃນຂອງສານມີດັ່ງນີ້:
ບັນດາສະຫາຍທີ່ຮັກແພງ,
ເນື່ອງໃນໂອກາດວັນສະຖາປະນາສາທາລະນະລັດ ປະຊາຊົນຈີນ ຄົບຮອບ 64 ປີ, ໃນນາມຄະນະບໍລິຫານງານສູນກາງພັກ ປະຊາຊົນ ປະຕິວັດລາວ, ລັດຖະບານ, ສະພາແຫ່ງຊາດ ແຫ່ງສາທາລະນະລັດປະຊາທິປະໄຕ ປະຊາຊົນລາວແລະປະຊາຊົນລາວບັນດາເຜົ່າ ກໍ່ຄືໃນນາມສ່ວນຕົວ, ພວກຂ້າພະເຈົ້າມີຄວາມປິຕິຊົມຊື່ນເປັນຢ່າງຍິ່ງ, ສົ່ງຄຳຊົມເຊີຍອັນອົບອຸ່ນ ແລະພອນໄຊອັນປະເສີດມາຍັງບັນດາສະຫາຍ ແລະ ໂດຍຜ່ານບັນດາສະຫາຍໄປຍັງ ຄະນະບໍລິຫານງານສູນກາງພັກກອມມູນິດຈີນ, ລັດຖະບານ, ສະພາຜູ່ແທນ ປະຊາຊົນທົ່ວປະເທດ ແຫ່ງ ສາທາລະນະລັດ ປະຊາຊົນຈີນ ແລະ ປະຊາຊົນຈີນ ອ້າຍນ້ອງທຸກຖ້ວນຫນ້າ.
ຕະຫລອດໄລຍະ 64 ປີຜ່ານມາ, ໂດຍພາຍໃຕ້ການນຳພາອັນສະຫລາດສອ່ງໃສຂອງພັກກອມມູນິດຈີນ, ປະຊາຊົນຈີນ ຜູ່ດຸຫມັ່ນ ແລະ ພິລະອາດຫານໄດ້ຍົກສູງຄັນທຸງສ້າງສາສັງຄົມນິຍົມທີ່ມີສີສັນແບບຈີນ, ໄດ້ຜ່ານຜ່າອຸປະສັກນາໆປະການ, ອັນໄດ້ສ້າງໃຫ້ປະເທດຈີນ ທີ່ທຸກຍາກຫລ້າຫລັງໃນເມື່ອນກ່ອນກາຍເປັນປະເທດສັງຄົມນິຍົມທີ່ມັ່ງຄັ່ງເຂັ້ມແຂງແລະທັນສະໄຫມ, ຊີວິດການເປັນຢູ່ຂອງປະຊາຊົນມີຄວາມອີ່ມຫນຳສຳລານ.
ພກຂ້າພະເຈົ້າມີຄວາມເຊື່ອມຫມັ້ນຢ່າງຫນັກແຫນ້ນວ່າ ພາຍໃຕ້ການຊີ້ນຳນຳພາຂອງພັກກອມມູນິດຈີນ ອັນມີສະຫາຍສີຈິ້ນຜິງ ເປັນເລຂາທິການໃຫຍ່, ສປ ຈີນ ຈະປະສົບຜົນສຳເລັດທີ່ໃຫຍ່ຫລວງກວ່າເກົ່າໃນການປະຕິບັດມະຕິກອງປະຊຸມໃຫຍ່ຄັ້ງທີ 18 ຂອງພັກກອມມູນິດຈີນ ແລະການປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ 5 ປີຄັ້ງທີ 12, ເຮັດໃຫ້ບົດບາດຂອງ ສປ ຈີນ ສູງເດັ່ນຂຶ້ນໃນເວທີສາກົນ.
ສປປ ລາວ ແລະ ສປ ຈີນ ເປັນປະເທດທີ່ມີສາຍພູແລະສາຍນ້ຳຕິດຈອດກັນ, ປະຊາຊົນສອງຊາດມີມູນເຊື້ອມິດຕະພາບມາແຕ່ບູຮານນະການ, ກ້າວເຂົ້າສູ່ສະຕະວັດທີ 21, ການພົພວັນຢ່າງຮອບດ້ານ ແລະ ເຂົ້າສູ່ລວງເລິກອັນໄດ້ນຳເອົາຜົນປະໂຫຍດຕົວຈິງຢ່າງຫລວງຫລາຍມາສູ່ປະຊາຊົນສອງຊາດ. ໃນອະນາຄົດຂ້າງຫນ້າເຖິງວ່າສະພາບການຂອງໂລກຈະມີການຜັນແປຢ່າງສະຫລັບສັບຊ້ອນກໍ່ຕາມ, ພັກ, ລັດ ແລະ ປະຊາຊົນລາວ ຈະສືບຕໍ່ຊຸກຍູ້ສາຍພົວພັນມິດຕະພາບຖານບ້ານໃກ້ເຮືອນຄຽງ ແລະ ການພົວພັນແບບຄູ່ຮ່ວມມືຍຸດທະສາດຢ່າງຮອບດ້ານລະຫວ່າງ ສປປ ລາວ ແລະ ສປ ຈີນ ໃຫ້ມີການພັດທະນາເລື້ອຍໆໄປ.
ຂໍອວຍພອນໄຊໃຫ້ບັນດາສະຫາຍ ຈົ່ງມີສຸກຂະພາບເຂັ້ມແຂງ ແລະປະສົບຜົນສຳເລັດໃຫມ່ຍິ່ງໃຫຍ່ກວ່າເກົ່າໃນຫນ້າທີ່ອັນມີກຽດ ແລະ ສູງສົ່ງຂອງຕົນ.
