ທ່ານສີຈິ້ນຜີງເດີນທາງໄປເຖິງກົວລາລຳເປີເລີ່ມຢ້ຽມຢາມມາເລເຊຍທາງລັດຖະກິດ
ຕອນຄຳວັນທີ 3 ຕຸລານີ້ພາຍຫຼັງສິ້ນສຸດການຢ້ຽມຢາມອິນໂດເນເຊຍທາງລັດຖະກິດແລ້ວ, ທ່ານສີຈິ້ນຜີງ, ປະທານປະເທດຈີນໄດ້ເດີນທາງໄປເຖິງນະຄອນຫຼວງກົວລາລຳເປີ, ເລີ່ມຢ້ຽມ ຢາມມາເລເຊຍທາງລັດຖະກິດ.
ທ່ານສີຈິ້ນຜີງກ່າວວ່າ, ຈີນແລະມາເລເຊຍລ້ວນແຕ່ແມ່ນປະເທດສຳຄັນໃນພາກພື້ນນີ້, ມີຜົນປະໂຫຍດຮ່ວມກັນຢ່າງກວ້າງຂວາງ, ລົງເລິກການຮ່ວມມືທີ່ມີລັກສະນະຍຸດທະສາດລະຫວ່າງຈີນກັບມາເລເຊຍແມ່ນຖືກກັບຄວາມມຸ່ງຫວັງປາຖະໜາຂອງປະຊາຊົນສອງປະເທດແລະເປັນທາງອ່ຽງທີ່ຕ້ອງເປັນໄປ. ຂ້າພະເຈົ້າຄອງຄອຍການພົບປະເຈລະຈາກັບທ່ານ ອັບດູລາ ຮາລິມ ມຸອັດຊາມ ຊາ, ປະມຸກລັດສູງສຸດແລະທ່ານນາຈິບ ດຸນ ຣະຊັກ, ນາຍົກລັດຖະມົນຕີມາເລເຊຍ, ເຂົ້າຮ່ວມເວທີປຶກສາຫາລືສຸດຍອດການຮ່ວມມືເສດຖະກິດລະຫວ່າງຈີນກັບມາເລເຊຍ, ແລະພົບປະກັບບຸກຄົນຜູ້ມີໄມຕີຈິດຂອງວົງການຕ່າງໆຢ່າງກວ້າງຂວາງ, ສົ່ງເສີມມິດຕະພາບທີ່ມີມູນເຊື້ອ, ຍົກສູງລະດັບການຮ່ວມມື, ຊຸກຍູ້ການຮ່ວມມືທີ່ມີລັກສະນະຍຸດທະສາດລະຫວ່າງຈີນກັບມາເລເຊຍໃຫ້ໄດ້ຮັບຄວາມຄືບໜ້າໃໝ່.
ຫຼັງຈາກສິ້ນສຸດການຢ້ຽມຢາມມາເລເຊຍແລ້ວ, ທ່ານສີຈິ້ນຜີງຍັງຈະເດີນທາງໄປເກາະບາຫຼີຂອງອິນໂດເນເຊຍເພື່ອເຂົ້າຮ່ວມກອງປະຊຸມບໍ່ເປັນທາງການຜູ້ນຳອົງການຮ່ວມມືເສດຖະກິດອາຊີປາຊີຟິກຫຼືເອເປັກຄັ້ງທີ 21.
