ເຈົ້າໜ້າທີ່ສໍາຄັນຂອງລັດຖະບານອິນໂດເນເຊຍຕີລາຄາສູງຕໍ່ການກ່າວປາຖະກະຖາຢູ່ສະພາແຫ່ງຊາດອິນໂດເນເຊຍຂອງທ່ານປະທານສີຈິ້ນຜິງແລະການຮ່ວມມືລະຫວ່າງຈີນກັບອິນໂດເນເຊຍ
ວັນທີ 2 ຫາ ວັນທີ 3 ຕຸລານີ້, ທ່ານສີຈິ້ນຜິງ, ປະທານປະເທດຈີນໄດ້ເດີນທາງໄປຢ້ຽມຢາມອິນໂດເນເຊຍທາງລັດຖະກິດ. ໃນໄລຍະຢ້ຽມຢາມອິນໂດເນເຊຍ, ທ່ານປະທານສີຈິ້ນຜິງໄດ້ຈັດການເຈລະຈາກັບທ່ານຊູຊີໂລ ບໍາບັງ ຢຸດໂຮໂຢໂນ, ປະທານາທິບໍດີອິນໂດເນເຊຍຢູ່ນະຄອນຫລວງຈາກາກຕາ, ສອງຝ່າຍໄດ້ຕົກລົງຮ່ວມກັນຈະຍົກລະດັບການພົວພັນລະຫວ່າງຈີນກັບອິນໂດເນເຊຍເປັນການພົວພັນຄູ່ຮ່ວມມືຍຸດທະສາດຮອບດ້ານ, ທ່ານປະທານສີຈິ້ນຜິງຍັງໄດ້ກ່າວປາຖະກະຖາຢູ່ສະພາແຫ່ງຊາດອິນໂດເນເຊຍ. ເຈົ້າໜ້າທີ່ສໍາຄັນຂອງລັດຖະບານອິນໂດເນເຊຍໄດ້ຕີລາຄາສູງຕໍ່ເລື່ອງນີ້.
ໃນເວລາໃຫ້ສໍາພາດຕໍ່ນັກຂ່າວ cri, ທ່ານມາຕີ ເອັມ. ນາຕາເລກາວາ, ລັດຖະມົນຕີວ່າການກະຊວງການຕ່າງປະເທດອິນໂດເນເຊຍກ່າວວ່າ, ພາຍຫລັງການພົວພັນລະຫວ່າງສອງປະເທດໄດ້ຮັບການຍົກລະດັບເປັນການພົວພັນຄູ່ຮ່ວມມືຍຸດທະສາດຮອບດ້ານ, ອະນາຄົດຂອງການຮ່ວມມືແມ່ນດີທີ່ສຸດ. ທ່ານກ່າວຕື່ມວ່າ, ການຢ້ຽມຢາມອິນໂດເນເຊຍຂອງທ່ານປະທານສີຈິ້ນຜິງແລະຍົກລະດັບການພົວພັນລະຫວ່າງສອງປະເທດເປັນການພົວພັນຄູ່ຮ່ວມມືຍຸດທະສາດຮອບດ້ານ, ບໍ່ພຽງແຕ່ແມ່ນຄວາມຄືບໜ້າສໍາຄັນໃນລະດັບການຮ່ວມມືສອງຝ່າຍລະຫວ່າງສອງປະເທດເທົ່ານັ້ນ, ຍັງມີຄວາມສໍາຄັນຫລາຍຕໍ່ສັນຕິພາບ, ສະຖຽນລະພາບ, ແລະຄວາມຈະເລີນເຂັ້ມແຂງຂອງພາກພື້ນອາຊີປາຊີຟິກອີກ.
ທ່ານມາຊູກີ ອາເລ, ປະທານສະພາແຫ່ງຊາດອິນໂດເນເຊຍກ່າວວ່າ, ໃນຊຸມປີມໍ່ໆມານີ້, ອິນໂດເນເຊຍແລະຈີນໄດ້ຮັບຄວາມຄືບໜ້າທີ່ມີລັກສະນະສ້າງສັນໃນການຮ່ວມມືໃນຂົງເຂດຕ່າງໆ, ພວກຂ້າພະເຈົ້າຈະສືບຕໍ່ສະໜັບສະໜູນສອງຝ່າຍຍົກສູງລະດັບການຮ່ວມມື ແລະເປີດກວ້າງຂົງເຂດການຮ່ວມມື ໂດຍສະເພາະແມ່ນຂົງເຂດໃໝ່ທີ່ມີກໍາລັງບົ່ມຊ້ອມຂອງການພັດທະນາ ແລະມີຜົນດີຕໍ່ສອງປະເທດ.
