ໃນເວລາເຂົ້າຮ່ວມເວທີປຶກສາຫາລືຊັ້ນສູງການຮ່ວມມືດ້ານເສດຖະກິດລະຫວ່າງຈີນກັບມາເລເຊຍ, ທ່ານປະທານສີຈິ້ນຜິງກ່າວເນັ້ນວ່າຈະກໍາໂອກາດເພື່ອສືບຕໍ່ສ້າງໄລຍະໃໝ່ຂອງການຮ່ວມມືແບບຕ່າງຝ່າຍຕ່າງມີຜົນປະໂຫຍດ
ວັນທີ 4 ຕຸລານີ້, ທ່ານ ສີຈິ້ນຜິງ, ປະທານປະເທດຈີນ ໄດ້ຮ່ວມກັບທ່ານນາຈີບ ຕັນ ຣາຈັກ, ນາຍົກລັດຖະມົນຕີມາເລເຊຍ ເຂົ້າຮ່ວມເວທີປຶກສາຫາລືຊັ້ນສູງການຮ່ວມມືດ້ານເສດຖະກິດລະຫວ່າງຈີນກັບມາເລເຊຍ ແລະໄດ້ກ່າວປາຖະກະຖາທີ່ສໍາຄັນກ່ຽວກັບການຮ່ວມມືທີ່ຕິດແທດກັບຕົວຈິງລະຫວ່າງສອງປະເທດແລະການພັດທະນາຂອງເສດຖະກິດຈີນ, ຫວັງວ່າບຸກຄົນວົງການເສດຖະກິດຂອງສອງປະເທດຈະກໍາໂອກາດ ສືບຕໍ່ສ້າງໄລຍະໃໝ່ຂອງການຮ່ວມມືແບບຕ່າງຝ່າຍຕ່າງມີຜົນປະໂຫຍດ.
ໃນເວລາກ່າວປາຖະກະຖາ, ທ່ານປະທານສີຈິ້ນຜິງກ່າວວ່າ, ນັບແຕ່ຈີນແລະມາເລເຊຍໄດ້ສ້າງການພົວພັນທາງການທູດເປັນເວລາ 39 ປີມານີ້, ການຮ່ວມມືແບບຕ່າງຝ່າຍຕ່າງມີຜົນປະໂຫຍດໄດ້ລົງໄປສູ່ລວງເລິກຢ່າງບໍ່ຢຸດຢັ້ງ. ຈີນໄດ້ເປັນຄູ່ການຄ້າໃຫຍ່ທີ່ສຸດຂອງມາເລເຊຍເປັນເວລາ 4 ປີຢ່າງລຽນຕິດ, ມາເລເຊຍກໍເປັນຄູ່ການຄ້າໃຫຍ່ທີ່ສຸດຂອງຈີນຢູ່ອາຊຽນເປັນເວລາ 5 ປີຢ່າງລຽນຕິດ, ການຮ່ວມມືໃນຂົງເຂດຕ່າງໆຂອງສອງປະເທດລ້ວນແຕ່ຢູ່ໃນແຖວໜ້າຂອງການຮ່ວມມືລະຫວ່າງຈີນກັບອາຊຽນ.
ທ່ານປະທານສີຈິ້ນຜິງໄດ້ສະເໜີຂໍ້ສະເໜີກ່ຽວກັບການເພີ່ມທະວີການຮ່ວມມືລະຫວ່າງສອງປະເທດດັ່ງຕໍ່ໄປນີ້ ຄື ໜຶ່ງ, ເປີດກວ້າງການຄ້າສອງຝ່າຍ, ພະຍາຍາມເຮັດໃຫ້ຍອດມູນຄ່າການຄ້າສອງຝ່າຍໃນປີ 2017 ບັນລຸເຖິງ 160 ຕື້ໂດລາ. ສອງ, ຊຸກຍູ້ການລົງທຶນເຊິ່ງກັນແລະກັນ, ສືບຕໍ່ສະໜັບສະໜູນການກໍ່ສ້າງເຂດນິຄົມອຸດສາຫະກໍາຊິນໂຈ່ວແລະກວ່ານຕ່ານ, ສົ່ງເສີມວິສາຫະກິດຈີນເຂົ້າຮ່ວມໂຄງການຕ່າງໆເຊັ່ນໂຄງການແລວທາງການພັດທະນາໃຫຍ່ແຫ່ງຂອງມາເລເຊຍ ແລະໂຄງການອື່ນໆ. ສາມ, ເປີດກວ້າງການຮ່ວມມືດ້ານການທະນາຄານ, ເພີ່ມທະວີຂະໜາດການແລກປ່ຽນເງິນຕາເຊິ່ງກັນແລະກັນ, ຫລົບຫລີກຄວາມສ່ຽງໄພດ້ານການທະນາຄານ.ສີ່ລົງເລິກການຮ່ວມມືດ້ານກະສິກຳແລະການປະມົງ, ສືບຕໍ່ເພີ່ມທະວີການຮ່ວມມືໃນຂົງເຂດການປູກຝັງແລະປຸງແຕ່ງຢາງພາລາທຳມະຊາດ, ການຄ້າເຄື່ອງຈັກກະສິກຳເປັນຕົ້ນ.ຫ້າແມ່ນຮ່ວມກັນຊຸກຍູ້ການຮ່ວມມືໃນພູມີພາກ, ຊຸກຍູ້ການພັດທະນາຮ່ວມກັນ.
ໃນຄຳປາໃສເວລາກ່າວ, ທ່ານນາຈີບໄດ້ຊົມເຊີຍການຮ່ວມມືລະຫວ່າງມາເລເຊຍຈີນໄດ້ຮັບຜົນສຳເລັດອັນອຸດົມສົມບູນ, ຕັ້ງໜ້າຕອບຮັບຂໍ້ສະເໜີການຮ່ວມມືຂອງຝ່າຍຈີນ. ທ່ານນາຈີບກ່າວວ່າ, ປັດຈຸບັນ, ທ່ວງທ່າເຕີບໂຕຂອງເສດຖະກິດອາຊີແມ່ນເຂັ້ມແຂງ, ຖານະຂອງອາຊີໃນເວທີສາກົນນັບມື້ນັບຍົກສູງຂຶ້ນ. ອະນາຄົດອັນດີງາມຂອງການພັດທະນາອາຊີແມ່ນຄືກັນກັບຄວາມໄຝ່ຝັນຈີນທີ່ປະເທດມັ່ງຄັ່ງເຂັ້ມແຂງ, ປະຊາຊາດພັດທະນາໃຫ້ຈະເລີນກ້າວໜ້າແລະປະຊາຊົນມີຄວາມສຸກ. ມາເລເຊຍກັບຈີນເປັນຄູ່ຮ່ວມມືອັນສຳຄັນເຊິ່ງກັນແລະກັນ, ສອງປະເທດຕ້ອງຖືການສ້າງຕັ້ງການພົວພັນຄູ່ຍຸດທະສາດຮອບດ້ານເປັນໂອກາດດີອັນສຳຄັນ, ລົງເລິກການຮ່ວມມືແບບຕ່າງຝ່າຍຕ່າງມີຜົນປະໂຫຍດ, ບັນລຸການພັດທະນາຮ່ວມກັນ, ປະກອບສ່ວນເຂົ້າໃນການຊຸກຍູ້ສັງຕິພາບແລະຄວາມຈະເລີນຂອງເຂດແຄວ້ນແລະຂອງໂລກ. ຝ່າຍມາເລເຊຍຊົມເຊີຍວິສາຫະກິດຈີນທີ່ເພີ່ມທະວີການລົງທຶນຕໍ່ມາເລເຊຍ, ຫວັງໃຫ້ວິສາຫະກິດສອງປະເທດເຂົ້າຮ່ວມການສ້າງສາເສດຖະກິດແລະການຮ່ວມມືໃນພູມີພາກຂອງສອງປະເທດຢ່າງຕັ້ງໜ້າກວ່າເກົ່າ.
ທ່ານສີຈີ້ນພິງແລະທ່ານນາຈີບຍັງເປັນສັກຂີພິຍານຮ່ວມໃນພິທີເຊັນແຜນການ5ປີການຮ່ວມມືເສດຖະກິດການຄ້າຂອງລັດຖະບານສອງປະເທດແລະສັນຍາການຮ່ວມມືຫຼາຍສະບັບຂອງເຂດສວນອຸດສາຫະກຳຊິ່ນໂຈ່ວ, ກວານຕັນເປັນຕົ້ນ.
