ວົງການຕ່າງໆຂອງຕ່າງປະເທດຕີລາຄາສູງຕໍ່ການຢ້ຽມຢາມມາເລເຊຍຂອງທ່ານປະທານສີຈິ້ນຜິງ
ວັນທີ 3 ຫາວັນທີ 5 ຕຸລານີ້, ທ່ານສີຈິ້ນຜິງ, ປະທານປະເທດຈີນໄດ້ເດີນທາງໄປຢ້ຽມຢາມມາເລເຊຍທາງລັດຖະກິດ, ບຸກຄົນແລະສື່ມວນຊົນຕ່າງປະເທດໄດ້ຕີລາຄາສູງຕໍ່ເລື່ອງນີ້ ແລະເຫັນວ່າ ການຢ້ຽມຢາມມາເລເຊຍຂອງທ່ານປະທານສີຈິ້ນຜິງຄັ້ງນີ້ມີຄວາມໝາຍອັນສໍາຄັນຕໍ່ການຍົກລະດັບການພົວພັນການຮ່ວມມືທີ່ມີໄມຕີຈິດມິດຕະພາບລະຫວ່າງຈີນກັບມາເລເຊຍ ກໍຄື ການພົວພັນລະຫວ່າງຈີນກັບອາຊຽນ.
ທ່ານ ອີ ຊັນ ໂອ, ນັກວິເຄາະການເມືອງ ອະດີດເລຂາການເມືອງຂອງທ່ານນາຍົກລັດຖະມົນຕີນາຈີບຂອງມາເລເຊຍກ່າວວ່າ, ໝາກຜົນສໍາຄັນທີ່ສຸດຂອງການຢ້ຽມຢາມມາເລເຊຍຂອງທ່ານປະທານສີຈິ້ນຜິງຄັ້ງນີ້ແມ່ນໄດ້ຍົກລະດັບການພົວພັນລະຫວ່າງສອງປະເທດເປັນການພົວພັນຄູ່ຮ່ວມມືຍຸດທະສາດຮອບດ້ານ ນີ້ໄດ້ສະແດງໃຫ້ເຫັນວ່າ ມາເລເຊຍເປັນໜຶ່ງໃນບັນດາປະເທດອ້ອມຂ້າງແລະໝູ່ຄູ່ທີ່ຈີນໃຫ້ຄວາມສໍາຄັນທີ່ສຸດ. ທ່ານ ບົງ ຮອນ ລຽງ, ປະທານສະມາຄົມໃຫຍ່ເສດຖະກິດການຄ້າມາເລເຊຍ-ຈີນກ່າວວ່າ, ການຍົກລະດັບການພົວພັນເສດຖະກິດການຄ້າມາເລເຊຍ-ຈີນໄດ້ສ້າງໂອກາດທີ່ດີໃຫ້ແກ່ວົງການທຸລະກິດມາເລເຊຍ. ການລົງທຶນຈາກຈີນທີ່ນັນມື້ນັບຫລາຍຂຶ້ນກໍມີຜົນດີຕໍ່ການພັດທະນາຂອງເສດຖະກິດມາເລເຊຍ.
ຫລາຍມື້ມານີ້, ສື່ມວນຊົນຂອງມາເລເຊຍແລະປະເທດອາຊີອື່ນໆກໍໄດ້ຕິດຕາມການຢ້ຽມຢາມມາເລເຊຍຂອງທ່ານປະທານສີຈິ້ນຜິງຄັ້ງນີ້ຢ່າງໃກ້ສິດ. ໜັງສືພິມ Sin Chew Daily ທີ່ເປັນໜັງສືພິມທີ່ມີປະລິມານຈໍາໜ່າຍຫລາຍທີ່ສຸດຂອງມາເລເຊຍລາຍງານວ່າ, ການພົບປະກັນລະຫວ່າງທ່ານສີຈິ້ນຜິງ, ປະທານປະເທດຈີນກັບທ່ານນາຈີບ, ນາຍົກລັດຖະມົນຕີມາເລເຊຍ ຈະຕື່ມພະລັງຊຸກຍູ້ໃໝ່ແກ່ການພັດທະນາຂອງການພົວພັນມາເລເຊຍ-ຈີນໃນອະນາຄົດ ແລະນໍາພາປະຊາຊົນສອງຊາດກ້າວເຂົ້າສູ່ໄລຍະໃໝ່. ໜັງສືພິມ Bangkok post ຂອງໄທລາຍງານວ່າ, ການຢ້ຽມຢາມປະເທດອາຊີຕາເວັນອອກສຽງໃຕ້ຄັ້ງທໍາອິດຂອງທ່ານປະທານສີຈິ້ນຜິງຫລັງຈາກດໍາລົງຕໍາແໜ່ງແລ້ວມີຜົນດີຕໍ່ການຮັດແໜ້ນການພົວພັນທີ່ສະໜິດແໜ້ນແຟ້ນລະຫວ່າງຈີນກັບປະເທດອາຊຽນ.
