ຈີນແລະອາຊຽນຈະສະແຫວງຫາການບຸກທະລຸໃໝ່ທາງດ້ານຍຸດທະສາດ--ການສໍາພາດທູດໃຫຍ່ຈີນປະຈໍາອາຊຽນ
ກອງປະຊຸມຕ່າງໆຜູ້ນໍາອາຊີຕາເວັນອອກຈະໄຂຂຶ້ນຢູ່ບຣູໄນ ໃນວັນທີ 9 ຕຸລານີ້. ໃນເວລາໃຫ້ສໍາພາດທາງລາຍລັກອັກສອນຕໍ່ນັກຂ່າວກ່ອນຈັດກອງປະຊຸມ, ທ່ານນາງຢາງຊິ້ວຜິງ, ເອອັກະລັດຖະທູດຈີນປະຈໍາອາຊຽນກ່າວວ່າ, ຈີນກັບອາຊຽນໄດ້ຮັບຜົນສໍາເລັດອັນພົ້ນເດັ່ນໃນ"ສິບປີຄໍາ"ທີ່ຜ່ານມາ, ໃນຕໍ່ໜ້າຈະຊຸກຍູ້ການຮ່ວມມືທີ່ຕິດແທດກັບຕົວຈິງຮອບດ້ານຕື່ມອີກ, ສະແຫວງຫາການບຸກທະລຸໃໝ່ທາງດ້ານຍຸດທະສາດ ບົນພື້ນຖານທີ່ເພີ່ມທະວີຄວາມໄວ້ເນື້ອເຊື່ອໃຈເຊິ່ງກັນແລະກັນຢ່າງບໍ່ຢຸດຢັ້ງ.
ທ່ານນາງຢາງຊິ້ວຜິງໄດ້ສະເໜີຂໍ້ສະເໜີ 6 ຂໍ້ກ່ຽວກັບການພັດທະນາການຮ່ວມມືລະຫວ່າງຈີນກັບອາຊຽນໃນອະນາຄົດ ຄື: ໜຶ່ງ, ສືບຕໍ່ເພີ່ມຄວາມໄວ້ເນື້ອເຊື່ອໃຈກັນດ້ານການເມືອງ. ສອງ, ຍົກລະດັບເຂດການຄ້າເສລີຈີນ-ອາຊຽນ, ຍົກລະດັບຄວາມສະດວກແລະເສລີພາບຂອງການຄ້າແລະການລົງທຶນຕື່ມອີກ. ສາມ, ຊຸກຍູ້ການເຊື່ອມຈອດກັນ. ສີ່, ເພີ່ມທະວີການຮ່ວມມືດ້ານການທະນາຄານ. ຫ້າ, ດໍາເນີນການຮ່ວມມືເທິງທະເລ. ຫົກ, ເພີ່ມທະວີການແລກປ່ຽນກັນທາງດ້ານວັດທະນະທໍາ.
ຕໍ່ກອງປະຊຸມສຸດຍອດອາຊີຕາເວັນອອກທີ່ໃກ້ຈະມາເຖິງນີ້, ທ່ານນາງຢາງຊິ້ວຜິງກ່າວວ່າ, ຝ່າຍຕ່າງໆຄວນສວຍໃຊ້ເວທີນີ້ໃຫ້ດີ, ດໍາເນີນການປຶກສາຫາລືກັນໂດຍປິ່ນອ້ອມຫົວຂໍ້ທີ່ຝ່າຍຕ່າງໆສົນໃຈທີ່ສຸດ. ພ້ອມກັນນັ້ນ, ກອງປະຊຸມສຸດຍອດອາຊີຕາເວັນອອກຄວນສືບຕໍ່ຍຶດໝັ້ນຫລັກການທີ່ມີປະສິດທິຜົນ ເຊັ່ນອາຊຽນເປັນຜູ້ນໍາທາງ, ປະສານງານເປັນເອກະສັນກັນ, ຄ່ອຍເປັນຄ່ອຍກ້າວໄປ, ພິຈາລະນາເຖິງຄວາມສະບາຍໃຈຂອງທຸກຝ່າຍ ແລະອື່ນໆ, ແກ້ໄຂບັນຫາທີ່ອ່ອນໄຫວຢ່າງເໝາະສົມ, ຫລີກເວັ້ນການເຂົ້າກ່ຽວພັນກັບວຽກງານພາຍໃນຂອງປະເທດໃດໜຶ່ງ ແລະຂໍ້ຂັດແຍ້ງສອງຝ່າຍລະຫວ່າງປະເທດ ເພື່ອບໍ່ໃຫ້ເກີດມີຄວາມຂັດແຍ້ງແລະເປີດກວ້າງຄວາມຂັດແຍ້ງ ທໍາລາຍບັນຍາກາດທີ່ໄມຕີຈິດຮ່ວມມືກັນຂອງກອງປະຊຸມສຸດຍອດຄັ້ງນີ້.
