ທ່ານສິຈິ້ນຜິງເຂົ້າຮ່ວມພິທີປິດກອງ ປະຊຸມສຸດຍອດຜູ້ນຳອຸດສາຫະກຳການຄ້າຂອງອົງການອາເປັກແລະກ່າວເນັ້ນວ່າມີຄວາມໝັ້ນໃຈຢ່າງເຕັມປ່ຽມຕໍ່ເສດຖະກິດຈີນ
ຕາມຂ່າວສານຊິນຮວາ: ວັນທີ 7 ຕຸລານີ້, ທ່ານສິຈິ້ນຜິງ, ປະທານປະເທດຈີນໄດ້ເຂົ້າຮ່ວມກອງປະຊຸມສຸດຍອດຜູ້ນຳອຸດສາຫະກຳການຄ້າຂອງອົງການອາເປັກທີ່ຈັດຂຶ້ນຢູ່ເກາະບາຫຼີອິນໂດເນເຊຍ, ແລະໄດ້ກ່າວຄຳປາໄສສຳຄັນທີ່ພາດຫົວເລື່ອງວ່າ: ລົງເລິກການປະຕິຮູບແລະໄຂປະຕູສູ່ພາຍນອກ ຮ່ວມກັນສ້າງອະນາຄົດທີ່ດີງາມຂອງພາກພື້ນອາຊີປາຊີຟິກ.
ທ່ານສິຈິ້ນຜິງ ຊີ້ອອກວ່າ: ປັດຈຸບັນ, ເສດຖະກິດໂລກກຳລັງຟື້ນຕົວແຕ່ປະສົບຄວາມຫຍຸ້ງຍາກຕ່າງໆນາໆ, ບໍ່ວ່າຈະແມ່ນອົງກອນເສດຖະກິດທີ່ພັດທະນາແລ້ວ ຫຼືວ່າແມ່ນອົງກອນເສດຖະກິດທີ່ພວມພັດທະນາ, ລ້ວນແຕ່ພວມສະແຫວງຫາພະລັງແຮງໃໝ່ເພື່ອຊຸກຍູ້ການເຕີບໂຕ. ອົງກອນເສດຖະກິດອາຊີປາຊີຟິກຄວນຊຸກຍູ້ຮູບແບບພັດທະນາເສດຖະກິດແບບເປີດປະຕູ ທີ່ພັດທະນາການປະດິດສ້າງ, ການເຕີບໂຕຢ່າງມີຄວາມຍູ້ດັນເຊິ່ງກັນແລະກັນ ແລະ ຜົນປະໂຫຍດເຊື່ອມໂຍງເຊິ່ງກັນແລະກັນ, ເຮັດໃຫ້ເສດຖະກິດອາຊີປາຊີຟິກເສີມຂະຫຍາຍບົດບາດນຳພາໃນການຟື້ນຕົວຂອງເສດຖະກິດໂລກ.
ທ່ານສີຈິ້ນຜິງ ກ່າວວ່າ: ມີຄວາມໝັ້ນໃຈຢ່າງເຕັມປ່ຽມຕໍ່ອະນາຄົດຂອງການພັດທະນາເສດຖະກິດຂອງຈີນ. ຈີນພວມວາງແຜນລວມໃນການລົງເລິກການປະຕິຮູບຢ່າງຮອບດ້ານ, ຈີນຈະປະຕິບັດຍຸດທະສາດການເປີດປະຕູຢ່າງຕັ້ງໜ້າແລະເປັນເຈົ້າການຫຼາຍກວ່າເກົ່າ, ປັບປຸງບູລະນະລະບົບເສດຖະກິດແບບເປີດປະຕູ ທີ່ຕ່າງຝ່າຍຕ່າງມີຜົນປະໂຫຍດ, ດຸນດ່ຽວກັນລະຫວ່າງຫຼາຍຝ່າຍ, ມີຄວາມປອດໄພແລະມີປະສິດທິພາບສູງ.
ທ່ານສີຈິ້ນຜິງ ກ່າວເນັ້ນວ່າ: ຈີນແມ່ນໜຶ່ງໃນມະຫາຄອບຄົວອາຊີປາຊີຟິກ. ເສດຖະກິດຈີນພັດທະນາຢ່າງປອດໃສແລະຕໍ່ເນື່ອງ, ຈະສະໜອງໂອກາດຫຼາຍກວ່າເກົ່າໃຫ້ແກ່ການພັດທະນາຂອງພາກພື້ນອາຊີປາຊີຟິກ. ຈີນຫວັງວ່າຈະຮ່ວມຈິດຮ່ວມໃຈກັບຄູ່ຮ່ວມໃນພາກພື້ນອາຊີປາຊີຟິກ, ຮ່ວມກັນສ້າງອະນາຄົດອັນດີງາມຂອງພາກພື້ນອາຊີປາຊີຟິກ ທີ່ສາມາດນຳທາງທົ່ວໂລກ, ສ້າງຜົນປະໂຫຍດໃຫ້ຝ່າຍຕ່າງໆ ແລະ ສ້າງຄວາມສຸກໃຫ້ແກ່ຮຸ່ນລູກຮຸ່ນຫຼານ.
