ພັກກໍາອໍານາດຂອງມຽນມາສະແດງທ່າທີຢ່າງເປັນທາງການວ່າຄັດຄ້ານການຮ່າງລັດຖະທໍາມະນູນສະບັບໃໝ່
ວັນທີ 6 ຕຸລານີ້, ພັກສາມັກຄີແລະການພັດທະນາສະຫະພັນ ຫລື USDP ທີ່ເປັນພັກກໍາອໍານາດຂອງມຽນມາໄດ້ອອກຖະແຫລງການ ໂດຍສະແດງທ່າທີຢ່າງເປັນທາງການເປັນຄັ້ງທໍາອິດວ່າຄັດຄ້ານການຮ່າງລັດຖະທໍາມະນູນສະບັບໃໝ່.
ຄະນະກໍາມະການດັດແກ້ລັດຖະທໍາມະນູນຂອງພັກດັ່ງກ່າວກ່າວວ່າ, ການເລີກໃຊ້ລັດຖະທໍາມະນູນສະບັບປີ 2008 ທີ່ນໍາໃຊ້ໃນປັດຈຸບັນ ແລ້ວຮ່າງລັດຖະທໍາມະນູນສະບັບໃໝ່ ຈະສ້າງຄວາມອັນຕະລາຍຢ່າງຫລວງຫລາຍໃຫ້ແກ່ລັດແລະປະຊາຊົນ. ພັກສາມັກຄີແລະການພັດທະນາສະຫະພັນຈະສະເໜີຂໍ້ສະເໜີແລະຫລັກໝັ້ນກ່ຽວກັບການດັດແກ້ລັດຖະທໍາມະນູນຕໍ່ຄະນະກໍາມະການປະສົມຕີລາຄາລັດຖະທໍາມະນູນ.
ໃນເດືອນແລ້ວນີ້, ພັກສັນນິບາດແຫ່ງຊາດເພື່ອປະຊາທິປະໄຕມຽນມາ ຫລື NLD ທີ່ນໍາໂດຍທ່ານນາງອອງຊານຊູຈີ ກ່າວວ່າ, NLD ໄດ້ປຶກສາຫາລືກັບພັກການເມືອງຊົນເຜົ່າສ່ວນໜ້ອຍກ່ຽວກັບບັນຫາລັດຖະທໍາມະນູນແລ້ວ ແຕ່ວ່າຍັງບໍ່ໄດ້ບັນລຸຄວາມເປັນເອກະສັນກັນກ່ຽວກັບການຈະດັດແກ້ລັດຖະທໍາມະນູນຫລືຮ່າງລັດຖະທໍາມະນູນສະບັບໃໝ່.
ລັດຖະທໍາມະນູນແຫ່ງສາທາລະນະລັດສະຫະພັນມຽນມາທີ່ນໍາໃຊ້ໃນປັດຈຸບັນແມ່ນຖືກຮັບຮອງໂດຍປະຊາມະຕິທົ່ວປະເທດໃນປີ 2008 ເຊິ່ງໄດ້ກໍານົດມາດຖານການດໍາລົງຕໍາແໜ່ງຂອງຜູ້ນໍາປະເທດໄວ້ຢ່າງຈະແຈ້ງ. ຖ້າວ່າບໍ່ດັດແກ້ລັດຖະທໍາມະນູນ, ທ່ານນາງອອງຊານຊູຈີກໍຈະບໍ່ມີຄວາມອາດສາມາດເປັນຜູ້ນໍາປະເທດໄດ້.
