ວຽກງານທໍາລາຍອາວຸດເຄມີຊີຣີສືບຕໍ່ດໍາເນີນໄປ ຝ່າຍຕໍ່ຕ້ານເຫັນດີຈະເຂົ້າຮ່ວມກອງປະຊຸມເຊີແນວຄັ້ງທີ 2 ກ່ຽວກັບບັນຫາຊີຣີ
ວັນທີ 7 ຕຸລານີ້, ໜ່ວຍງານຊ່ຽວຊານເພື່ອກວດກາອາວຸດເຄມີຊີຣີຂອງອົງການຫ້າມໃຊ້ອາວຸດເຄມີໄດ້ສືບຕໍ່ດໍາເນີນວຽກງານທໍາລາຍອາວຸດເຄມີຢູ່ຊີຣີ. ຂະບວນການໄລຍະທີໜຶ່ງຄືຊີຣີເປີດເຜີຍສະຖານທີ່ເກັບມ້ຽນອາວຸດເຄມີໃກ້ຈະສິ້ນສຸດລົງແລ້ວ, ປັດຈຸບັນນີ້ໜ່ວຍງານຊ່ຽວຊານໄດ້ກ້າວເຂົ້າສູ່ໄລຍະທີສອງກໍຄືກວດກາ, ມ້າງ ແລະທໍາລາຍອາວຸດເຄມີແລະອຸປະກອນທີ່ກ່ຽວຂ້ອງ.
ພ້ອມກັນນັ້ນ, ຫລັງຈາກທ່ານຈອນ ເຄຣີ, ລັດຖະມົນຕີການຕ່າງປະເທດອາເມລິກາແລະທ່ານເຊີເກ ຣາຟໂຣຟ, ລັດຖະມົນຕີການຕ່າງປະເທດລັດເຊຍໄດ້ສະແດງຢູ່ເກາະບາຫລີຂອງອິນໂດເນເຊຍ ໃນວັນທີ 7 ຕຸລານີ້ ວ່າຈະສະໜັບສະໜູນການຊຸກຍູ້ໃຫ້ຈັດກອງປະຊຸມເຊີແນວຄັ້ງທີ 2 ກ່ຽວກັບບັນຫາຊີຣີໂດຍໄວ, ຝ່າຍຕໍ່ຕ້ານທັງພາຍໃນແລະຕ່າງປະເທດຊີຣີຕ່າງກໍ່ໄດ້ສະແດງວ່າຍິນດີຈະເຂົ້າຮ່ວມການເຈລະຈາສັນຕິພາບ.
ວັນທີ 7 ຕຸລານີ້, ທ່ານອາຮາມເມັດ ຈາບາ, ຫົວໜ້າສະຫະພັນແຫ່ງຊາດຝ່າຍຕໍ່ຕ້ານແລະກໍາລັງປະຕິຮູບຊີລີ ທີ່ເປັນຝ່າຍຕໍ່ຕ້ານຕົ້ນຕໍຢູ່ນອກຊີຣີກ່າວວ່າ, ຝ່າຍຕໍ່ຕ້ານຊີຣີຍິນດີເຂົ້າຮ່ວມ
ກອງປະຊຸມສາກົນຄັ້ງທີ 2 ກ່ຽວກັບບັນຫາຊີຣີທີ່ຈະຈັດຂຶ້ນຢູ່ເຊີແນວ. ວັນທີ 7 ຕຸລານີ້, ອົງການປະສານງານແຫ່ງຊາດເພື່ອການປະຕິຮູບທາງດ້ານປະຊາທິປະໄຕ ທີ່ເປັນຝ່າຍຕໍ່ຕ້ານພາຍໃນຊີຣີໄດ້ຈັດກອງປະຊຸມຂ່າວຢູ່ນະຄອນຫລວງດາມາສ ໂດຍເຜີຍແຜ່ວ່າອົງການດັ່ງກ່າວຈະເຂົ້າຮ່ວມການເຈລະຈາເຊີແນວ.
