ທ່ານຫວາງອີ້ແລະເລຂາທິການໃຫຍ່ອາຊຽນສົ່ງໂທລະເລກໃຫ້ກັນ ອວຍພອນການສ້າງສາຍພົວພັນຄູຍຸດທະສາດຈີນອາຊຽນຄົບຮອບ10ປີ
ຕາມຂ່າວCRI: ປີນີ້ແມ່ນການສ້າງພົວພັນຄູ່ຍຸດທະສາດຈີນອາຊຽນຄົບຮອບ10ປີ. ຫວ່າງມໍ່ໆນີ້, ທ່ານຫວາງອີ້, ລັດຖະມົນຕີວ່າການກະຊວງການຕ່າງປະເທດຈີນແລະທ່ານເລເລືອງມິນ, ເລຂາທິການໃຫຍ່ອາຊຽນໄດ້ສົ່ງໂທລະເລກໃຫ້ກັນອວຍພອນການສ້າງສາຍພົວພັນຄູ່ຍຸດທະສາດຈີນອາຊຽນຄົບຮອບ10ປີ.
ທ່ານຫວາງອີ້ກ່າວໃນໂທລະເລກອວຍພອນວ່າ, ໃນ10ປີທີ່ຜ່ານມາ, ຈີນກັບອາຊຽນເຄົາລົບເຊິ່ງກັນແລະກັນ, ປະຕິບັດຕໍ່ກັນຢ່າງສະເໝີພາບ, ມີໄມຕີຈິດມິດຕະພາບຖານບ້ານໃກ້ເຮືອນຄຽງ, ນຳໃຊ້ໂອກາດດ້ານການພັດທະນາຮ່ວມກັນ, ການຮ່ວມມືໃນທຸກຂົງເຂດໄດ້ຮັບຜົນສຳເລັດອັນອຸດົມສົມບູນ, ໄດ້ສ້າງ "ທົດສະວັດຄຳ" ແຫ່ງການຮ່ວມມືລະຫວ່າງສອງຝ່າຍ. ລັດຖະບານຈີນຊຸດໃໝ່ເອົາໃຈໃສ່ອາຊຽນໃນລະດັບສູງ, ຍຶດໝັ້ນຖືອາຊຽນເປັນທິດບູລິມະສິດແຫ່ງການຕ່າງປະເທດຕໍ່ປະເທດອ້ອມຂ້າງຂອງຈີນ, ຍຶດໝັ້ນປັບປຸງແລະລົງເລິກການພົວພັນຄູ່ຍຸດທະສາດກັບອາຊຽນ. ຈີນຍິນດີພະຍາຍາມຮ່ວມກັນກັບອາຊຽນ, ຊຸກຍູ້ໃຫ້ການພົວພັນຄູ່ຍຸດທະສາດລະຫວ່າງຈີນອາຊຽນແລະການຮ່ວມມືຂອງອາຊີຕາເວັນອອກພັດທະນາລົງສູ່ລວງເລິກຢ່າງຮອບດ້ານ.
ທ່ານເລເລືອງມິນກ່າວໃນໂທລະເລກອວຍພອນວ່າ, ນັບແຕ່ປີ2003ເປັນຕົ້ນມາ, ການພົວພັນຄູ່ຮ່ວມມືຍຸດທະສາດລະຫວ່າງຈີນ-ອາຊຽນໄດ້ຮັບການເພີ່ມທະວີຢ່າງບໍ່ຢຸດຢັ້ງ, ການຮ່ວມມືລະຫວ່າງສອງຝ່າຍໄດ້ບຸກເບີກເຂົ້າຂົງເຂດຢ່າວກວ້າງຂວາງຕ່າງໆຄືຂົງເຂດຄວາມໝັ້ນຄົງດ້ານການເມືອງ, ເສດຖະກິດ, ວັດທະນະທຳສັງຄົມ.ຄຽງຄູ່ກັບການພົວພັນລະຫວ່າງສອງຝ່າຍກ້າວເຂົ້າສູ່ໄລຍະໃໝ່, ອາຊຽນກັບຈີນຕ້ອງຊອກຫາຮູບການໃໝ່ແລະຍືນຍົງໄດ້ເພື່ອເພີ່ມທະວີແລະລົງເລິກການພົວພັນຄູ່ຍຸດທະສາດຕື່ມອີກ. ອາຊຽນຫວັງຮ່ວມມືກັບຈີນຢ່າງແໜ້ນແຟ້ນ, ຊຸກຍູ້ໃຫ້ພາກພື້ນນີ້ມີສັນຕິພາບ, ສະຖຽນລະພາບແລະຄວາມຈະເລີນຮຸ່ງເຮືອງ.
