ນາຍົກລັດຖະມົນຕີຈີນພົບປະກັບປະທານາທິບໍດີມຽນມາ, ນາຍົກລັດຖະມົນຕີມາເລເຊຍ, ນາຍົກລັດຖະມົນຕີອົສຕຼາລີແລະລັດຖະມົນຕີການຕ່າງປະເທດອາເມລິກາ
ຕອນບ່າຍວັນທີ 9 ຕຸລານີ້, ທ່ານຫລີເຄີ້ສຽງ, ນາຍົກລັດຖະມົນຕີຈີນໄດ້ພົບປະກັບທ່ານອູ ເທັນ ເຊັນ, ປະທານາທິບໍດີມຽນມາ, ທ່ານນາຈີບ ຕູນ ຣາຊັກ, ນາຍົກລັດຖະມົນຕີມາເລເຊຍ, ທ່ານໂຕນີ ອາໂບທ໌, ນາຍົກລັດຖະມົນຕີອົສຕຼາລີ ແລະທ່ານຈອນ ເຄລີ, ລັດຖະມົນຕີວ່າການກະຊວງການຕ່າງປະເທດອາເມລິກາ ຢູ່ນະຄອນຫລວງບັນດາສິຣິເບກາວັນ ບຣູໄນ ດາຣູຊາລາມ.
ໃນເວລາພົບປະກັບທ່ານອູ ເທັນ ເຊັນ, ທ່ານຫລີເຄີ້ສຽງກ່າວວ່າ, ຈີນສະໜັບສະໜູນມຽນມາຊຸກຍູ້ຂະບວນການສັນຕິພາບພາຍໃນປະເທດ ແລະຍິນດີຮ່ວມກັບມຽນມາຮັກສາສະຖຽນລະພາບຂອງເຂດຊາຍແດນລະຫວ່າງສອງປະເທດ. ຫວັງວ່າມຽນມາຈະສືບຕໍ່ເສີມຂະຫຍາຍບົດບາດທີ່ມີລັກສະນະສ້າງສັນໃນການພັດທະນາການພົວພັນຈີນ-ອາຊຽນ. ທ່ານອູ ເທັນ ເຊັນກ່າວວ່າ, ມຽນມາຍິນດີປະສານສົມທົບຢ່າງແໜ້ນແຟ້ນກັບຈີນ, ຊຸກຍູ້ການພົວພັນຄູ່ຍຸດທະສາດຮອບດ້ານມຽນ-ຈີນໃຫ້ໄດ້ຮັບຜົນສໍາເລັດທີ່ຫລາຍກວ່າເກົ່າ ແລະຍິນດີເສີມຂະຫຍາຍບົດບາດທີ່ຫລາຍກວ່າເກົ່າໃນການພັດທະນາການພົວພັນອາຊຽນ-ຈີນ.
ໃນເວລາພົບປະກັບທ່ານນາຈີບ, ທ່ານຫລີເຄີ້ສຽງກ່າວວ່າ, ປີໜ້າແມ່ນປີທີ່ຈີນແລະມາເລເຊຍສ້າງການພົວພັນທາງການທູດຄົບຮອບ 40 ປີ, ຈີນຍິນດີລົງເລິກຄວາມໄວ້ເນື້ອເຊື່ອໃຈດ້ານຍຸດທະສາດແລະການເມືອງຕື່ມອີກກັບມາເລເຊຍ, ເປີດກວ້າງການຮ່ວມມືໃນຂົງເຂດຕ່າງໆ ຊຸກຍູ້ການພົວພັນຄູ່ຍຸດທະສາດຮອບດ້ານລະຫວ່າງສອງປະເທດແລະການພົວພັນຄູ່ຍຸດທະສາດຈີນ-ອາຊຽນໃຫ້ມີການພັດທະນາຢ່າງໂປ່ງໃສແລະໝັ້ນທ່ຽງ. ທ່ານນາຈີບກ່າວວ່າ, ມາເລເຊຍຍິນດີຮ່ວມກັບຈີນ ຈັດຕັ້ງປະຕິບັດຄວາມຮັບຮູ້ທີ່ເປັນເອກະສັນກັນຂອງຜູ້ນໍາສອງປະເທດກ່ຽວກັບການພັດທະນາການພົວພັນລະຫວ່າງສອງປະເທດຕື່ມອີກ, ເປີດກວ້າງຂະໜາດຂອງການຮ່ວມມື ແລະຍົກລະດັບການຮ່ວມມື. ຝ່າຍມາເລເຊຍໄດ້ສະແດງຄວາມຊົມເຊີຍແລະສະໜັບສະໜູນຂໍ້ລິເລີ່ມຂອງການຮ່ວມມືທີ່ທ່ານຫລີເຄີ້ສຽງໄດ້ສະເໜີໃນກອງປະຊຸມສຸດຍອດ ອາຊຽນ-ຈີນ ແລະຍິນດີທໍາຄວາມພະຍາຍາມຢ່າງຕັ້ງໜ້າເພື່ອພັດທະນາການພົວພັນອາຊຽນ-ຈີນ.
