ລັດຖະບານແລະນັກວິຊາການຂອງໄທຕີລາຄາສູງຕໍ່ຄຳປາໄສຂອງທ່ານຫລີເຄີ້ສຽງ
(GMT+08:00) 2013-10-11 16:54:15 cri
ກອງປະຊຸມສຸດຍອດອາຊຽນຄັ້ງທີ 23 ແລະກອງປະຊຸມສຸດຍອດຕ່າງໆອາຊີຕາເວັນອອກຄັ້ງທີ 8 ທີ່ຈັດຂຶ້ນຢູ່ນະຄອນຫລວງບັນດາເຊລີເບກາວັນຂອງບຼູໄນໄດ້ອັດລົງໃນວັນທີ 10 ຕຸລານີ້. ທ່ານຫລີເຄີ້ສຽງ, ນາຍົກລັດຖະມົນຕີຈີນໄດ້ເຂົ້າຮ່ວມກອງປະຊຸມເຫລົ່ານີ້ເປັນຄັ້ງທຳອິດ, ແລະໄດ້ບັນຍາຍນະໂຍບາຍການຕ່າງປະເທດຂອງລັດຖະບານຊຸດໃຫມ່ຂອງຈີນກ່ຽວກັບການເພີ່ມທະວີການພົວພັນກັບອາຊຽນ. ໃນຖານະເປັນປະເທດປະສານການພົວພັນລະຫວ່າງຈີນກັບອາຊຽນ, ໄທໄດ້ຕີລາຄາສູງຕໍ່ຂໍ້ສະເຫນີຕ່າງໆທີ່ທ່ານຫລີເຄີ້ສຽງສະເຫນີອອກໃນກອງປະຊຸມຄັ້ງນີ້.
ທ່ານ ກາວີ ຈົງກິດຖາວອນ ນັກຄົ້ນຄວ້າລະດັບສູງຂອງສະຖາບັນສຶກສາຄວາມຫມັ້ນຄົງແລະນານາຊາດຂອງມະຫາວິທະຍາໄລຈູລາລົງກອນໄທກ່າວວ່າ, ທ່ານຫລີເຄີ້ສຽງໄດ້ສະເຫນີຂໍ້ລິເລີ່ມຮອບດ້ານກ່ຽວກັບການເພີ່ມທະວີການຮ່ວມມືລະຫວ່າງຈີນກັບອາຊຽນ, ອັນໄດ້ສະແດງໃຫ້ເຫັນຄວາມຈິງໃຈແລະຄວາມຕັດສິນໃຈຂອງຈີນ.
ທ່ານກ່າວວ່າ, ຈີນແມ່ນຫນຶ່ງໃນບັນດາຄູ່ຍຸດທະສາດທີ່ສຳຄັນທີ່ສຸດຂອງອາຊຽນ, ການໄດ້ຮັບຜົນງານແນວນີ້ແມ່ນຍ້ອນວ່າຈີນໃຫ້ຄວາມສຳຄັນຕໍ່ການຮ່ວມມືກັບອາຊຽນໃນໄລຍະດົນນານມານີ, ແລະຊຸກຍູ້ການພົວພັນລະຫວ່າງຈີນກັບອາຊຽນໃຫ້ຂຶ້ນສູ່ລະດັບໃຫມ່ເລື້ອຍໆດ້ວຍການກະທຳຕົວຈິງ, ນີ້ໄດ້ສ້າງພື້ນຖານອັນຫມັ້ນແກ່ນໃຫ້ແກ່ການພັດທະນາການພົວພັນລະຫວ່າງຈີນກັບອາຊຽນໃຫ້ພັດທະນາເປັນເວລາຍາວນານ.
