ນາຍົກລັດຖະມົນຕີສິງກະໂປເຫັນດີນຳການສ້າງຕັ້ງທະນາຄານການລົງທຶນພື້ນຖານໂຄງລ່າງອາຊີ
(GMT+08:00) 2013-10-11 16:55:34 cri
ຕາມຂ່າວ cri: ຫນັງສືພິມຫລຽນເຫີຈ້າວປາວຂອງສິງກະໂປສະບັບວັນທີ 10 ຕຸລານີ້ໄດ້ລາຍງານວ່າ, ຫລັງຈາກທ່ານຫລີເຄີ້ສຽງ, ນາຍົກລັດຖະມົນຕີຈີນໄດ້ສະເຫນີຂອບການຮ່ວມມື 2+7 (2 ຄວາມຮັບຮູ້ທາງການເມືອງທີ່ຄືກັນແລະຮ່ວມມືໃນ 7 ຂົງເຂດ), ທ່ານລີຊຽນຫລົງ, ນາຍົກລັດຖະມົນຕີສິງກະໂປໄດ້ໃຫ້ຄຳຢືນຢັນຕໍ່ຂໍ້ສະເຫນີຂອງທ່ານນາຍົກລັດຖະມົນຕີຫລີເຄີ້ສຽງກ່ຽວກັບຈີນກັບອາຊຽນເຊັນສົນທິສັນຍາວ່າດ້ວຍມິດຕະພາບຖານບ້ານໃກ້ເຮືອນຄຽງແລະການຮ່ວມມືລະຫວ່າງຈີນກັບບັນດາປະເທດອາຊຽນ.
ກ່ຽວກັບຂໍ້ສະເຫນີທີ່ສ້າງຕັ້ງທະນາຄານລົງທຶນພື້ນຖານໂຄງລ່າງອາຊີແລະຊຸກຍູ້ການກໍ່ສ້າງພື້ນຖານໂຄງລ່າງໃນພາກພື້ນແຫ່ງນີ້ທີ່ສະເຫນີໂດຍທ່ານປະທານປະເທດ ສີຈິ້ນຜິງແລະທ່ານນາຍົກລັດຖະມົນຕີຫລີເຄີ້ສຽງ,ທ່ານລີຊຽນຫລົງໄດ້ສະແດງຄວາມຍິນດີແລະເຫັນວ່າ, ທະນາຄານລົງທຶນພື້ນຖານໂຄງລ່າງອາຊີທີ່ຈີນລິເລີ່ມນັ້ນສາມາດສະຫນອງຊ່ອງທາງລະດົມທຶນໃຫ້ແກ່ບັນດາປະເທດອາຊີຕາເວັນອອກສຽງໃຕ້ໃນການກໍ່ສ້າງພື້ນຖານໂຄງລ່າງ.
ທ່ານລີຊຽນຫລົງຊີ້ອອກວ່າ, ຈີນແມ່ນຫມູ່ເພື່ອນທີ່ໄວ້ໃຈໄດ້ໃນການຍົກສູງຄວາມສາມາດຂອງອາຊຽນ.ຈີນມີແຜນການຫລາຍສະບັບເພື່ອຊ່ວຍເຫລືອອາຊຽນ, ເຊິ່ງລວມທັງກອງທຶນຮ່ວມມືລົງທຶນອາຊຽນ ຈີນ, ໂຄງການເຊື່ອມຈອດກັນ, ແລະຄືທຶນຮ່ວມມືທາງທະເລອາຊຽນ-ຈີນ.
ທ່ານລີຊຽນຫລົງຍັງໄດ້ສະແດງຄວາມຊົມເຊີຍຕໍ່ຂໍ້ສະເຫນີຂອງທ່ານຫລີເຄີ້ສຽງກ່ຽວກັບການຍົກລະດັບຂອງເຂດການຄ້າເສລີອາຊຽນຈີນໃຫ້ສູງຂຶ້ນ, ເຫັນວ່າການເຮັດແນວນີ້ຈະເຮັດໃຫ້ສອງຝ່າຍຫຍັບເຂົ້າໃກ້ເປົ້າຫມາຍທີ່ຍອດມູນຄ່າການຄ້າລະຫວ່າງສອງຝ່າຍບັນລຸເຖິງ 500 ຕື້ໂດລາກ່ອນປີ 2015.
